確診病徵＋肺炎自救群組｜18個月大兒子確診公私院拒收 媽媽分享求醫過程｜第五波疫情
第五波疫情｜1歲半兒燒至40度 私院拒收
事主表示家中外傭為最先出現陽性結果的一員，6日已立刻帶工人姐姐去博愛醫院急症室，但公立醫院只是要求姐姐留口水檢測之後便可回家。10日中午工人姐姐回家，當時仔仔尚未有病徵，唯有讓姐姐在房內隔離。事主表示又要做對外消毒、又要做埋對內消毒，令她的精神壓力接近崩潰邊緣。
10日當天晚上1歲半的仔仔發燒至40度，因為姐姐在急症室的待遇，令事主決定直飛去荃灣港安睇。醫生表示有大量個案都是因為工人姐姐曾去元朗廣場附近而確診，最後亦是做了檢測就讓嬰兒回家休息。私院醫生直言私家醫院不會再接收確診病人，要接受治療只可以去公立醫院急症室。
第五波疫情｜幸得港安護士相處教導
返家以後仔仔唔肯食藥，至凌晨4-5點仔仔又再發燒至40度，這次更變得毫無意識，反哂白眼、成身震哂、手腳發紫，處於半抽筋狀態。事主表示自己當時已經喊到不似人形，好彩老公冷靜下來打999，可是白車的回答，令她更為絕望，對方表示：
「未必安排到車過嚟，就算真係過嚟，都只會去急症室等做檢測，之後安排你哋返去，嬰兒留在家中可能仲安全。」
幸好之後有貴人相助，老公打多次電話求港安急症可唔可以幫手睇多次，電話中護士姐姐教事主如何用濕毛巾幫嬰兒抹身、點樣處理發燒情況、塞藥的頻率等，之後仔仔體溫終於下降返。事主表示好感謝荃灣港安護士姐姐及醫生，咁有愛心咁接聽佢哋當晚無數次的來電，好彩港安個邊幫忙解答。最後小朋友的情況亦有所好轉。
第五波疫情｜批衛生署安排混亂
之後兩日仔仔病情反覆，唔肯食藥，直至2月13日衛生署終於打黎表示仔仔初步確診，需要入院，而家中三位成人則要留待完成檢測後再作安排。及後事主表示打去熱線及衛生署查詢，職員對安排都不太清楚，而且十分混亂。衛生署方面在電話中表示：
「因為有BB，所以好大機會會入住醫院，即使有好轉都唔可以只做家居隔離。如果全家都有病徵就一定要送去隔離做檢查先，檢查到陰性先可以考慮做家居隔離。另外對方亦表示竹篙灣已經爆哂，因此有很大機會被安排去酒店或醫院，嬰兒送院時可以有一名成人陪同。」
事主無奈地表示：「算啦！仔仔都開始好返，唔好迫仔仔入院好無。」
第五波疫情｜自救交流 開Facebook群組
事後事主為了可以讓新手媽媽交流經驗，在Telegram及Facebook上都開了群組。接受Sundaykiss訪問時，事主表示佢係最先果批中左，自己是新手媽媽，她不斷試網搵相關資料，不斷去唔同媽媽群組請教人，想搵有無同路人，但真的很難，她好希望可以搵到相關BB肺炎確診既group，可惜一直找不到。
另一邊事主在不同媽媽group，分享完自己的經歷，一次又一次重複地講，事主覺得仲係有好多媽媽未有警覺性，亦有好多新手媽媽如事主一樣無知，差點害死自己個仔。她表示當時自己十分幸運可以問到，如果問唔到，仔仔都可能已經唔係度。
所以成立了第一個whatsapp group，收集同路人資訊以及、急症室輪候狀況，讓大家互相幫助。最後經谷友介紹開TG、Facebook group，令大家可以看到更多資訊。
第五波疫情｜幼兒確診可能出現病徵
- 發燒至40度
- 手腳發紫
- 嘔吐
- 半抽筋狀態
- 反白眼
- 毫無意識
