單親媽媽患病向女討萬蚊醫藥費被拒鬧爆對方不孝網民點出原因斥自作自受

Nov 3 2021

單親媽媽要母兼父職，出外工作賺錢，又要照顧仔女，壓力極大。有些媽媽可能分身不瑕，沒有抽時間理會仔女的真正需要，結果仔女長大後與媽媽關係疏離。近日一名單親媽媽於社交平台撰文，鬧爆女兒未盡孝道，逐點「數臭」對方拒絕幫她繳付過萬元的醫藥費，又不為她交新屋的裝修錢。惟她沒有得到網民的同情，不少人紛紛留言批評這位單親媽媽自作自受：「我睇到…因果！」

單親媽媽鬧爆女兒不孝

近日一名單親媽媽於Facebook專頁「生仔要考牌系列」投稿，鬧爆女兒不孝。她透露女兒自23歲結婚後，直到現在40歲仍沒有工作，沒有生小朋友，只養了幾隻貓。

TVB劇集《親親我好媽》其中一幕，飾演媽媽的江美儀指自已所做之事都是為女兒好，惟飾演女兒Venus的江嘉敏反駁媽媽一直沒有聽過她真正的想法。這幕與樓主的母女矛盾非常相似。（圖片來源：TVB《親親我好媽》截圖；非當事人）

批評女兒不願為她繳付萬元醫藥費

上年，她發現呼吸有困難，覺得自己身體有問題，急症室醫生指現在未知道她身體有何問題，要排期做電腦素描，但就要等待一年，而這段時間內也因為未知病因，未能開到藥。後來她聽取建議，去私家診所照幾張電腦素描，埋單需要萬多元港幣。她向女兒索取醫藥費，但女兒表示自己生活費也是僅僅夠用，最盡只能給她一千元港幣。

之後她發現女兒講大話，懷疑她並非無錢，而是不願付錢：「女婿搵幾錢我就唔知，只係知佢哋住公屋。點知原來佢話要幫幾隻貓供保險，隻貓遲啲要做手術又要洗幾千蚊，而佢老公啱啱買咗車云云…估唔到，我喺佢心目中連隻貓都不如！」

批評女兒寧願去旅行也不理她

單親媽媽又指，女兒每年總要去一兩次旅行，疫情之前甚至曾經跟朋友去過法國旅行，有錢去這裡，去那裡，惟從來沒有給她家用，最多是兩母女出來吃飯時，有時會給少少家用。有時，她有些小事想找女兒幫手，但她斥責女兒寧願理隻貓都不理她，還叫她賣掉以前的金器就有錢：「佢話已經幫無可幫。」

批評女兒有錢吃飯無錢幫她付裝修錢

幾年前，這位單親媽媽獲派公屋，她上樓後馬上裝修，又買了新家俬、新電器，她向女兒索取相關費用，不過今次遭到拒絕：「佢同佢老公一毫子都無出過，又係話手頭緊，屋企好多維修都未有錢做。」她揭發女兒再次講大話：「佢哋兩公婆係唔會煮飯，每一餐起碼都要六、七十蚊，個女又大食，我真係覺得好心痛，唔通佢咁嘅情況要持續到一世？」

呻以前無時間理會女兒由婆婆湊大

單親媽媽回想從前，自認一直忙於工作，賺錢養家，由細到大都沒有時間關心女兒：「以前顧住做嘢，將佢寄託喺婆婆度照顧，缺乏溝通同關懷，只係掛住佢食得飽唔飽、著得暖唔暖，但原來咁樣係唔夠！」她自責不懂教女，令女兒變成懶人：「我以前真係唔識教女，從無好好認真同佢溝通，以為供書教學、餵飽佢就已經足夠。如果有得返轉頭，我都希望教佢要成為一個有用嘅人，對社會貢獻，要努力工作，唔係好似而家咁樣懶懶閒就一世。」她甚至反問網民，是否不應生她出來：「我喺出面做嘢，咁辛苦養大個女，佢大個之後不單只無盡孝道，而且顧住自己使、吃喝玩樂，連自己阿媽有難都唔幫助，你話係咪生錯咗佢？」

網民紛紛指單親媽媽咎由自取

本來單親媽媽想得到網民的認同，可是大部分網民都不支持她，指她沒有盡到做媽媽的責任：「她的童年時你有沒有在她身邊？錯過的時光追不回，如果只是把女兒丟給上一代，我只可說活該」、「要自己個老母幫佢湊大個女!咁自己做人老母時又有幫過個女啲咩？自己個老母幫自己應份，個女要幫老母又應份，自己對自己人生唔需要負責。」、「生得佢出嚟，就應該負番應負嘅責任」。

亦有人指她不應該抱著養兒防老的觀念：「仲覺得嗰陣養佢係借畀佢，依家要連本帶利還㗎？」、「佢做唔到你期望嘅嘢，你就要上網數臭自己個女，咁你生佢出嚟係為咗咩呢？回報你嘅期望？生佢出嚟係你嘅選擇，你係有必要養到佢18歲，呢個係你嘅義務。至於佢點樣對你，佢真係有選擇權利，可能你會覺得好難接受，生小朋友不嬲都係高付出，可能無回報嘅嘢」、「我睇到……因果」、「你生佢出嚟係你揀，係你帶佢嚟呢個世界，畀溫飽佢係應份，但佢被你生出嚟唔係佢揀，佢無責任養你一世」。