學校沒教的搭車禮儀！7大激嬲車主行為 教小朋友從小培養良好習慣

撰文：Mila｜圖片來源：網上圖片、新假期資料庫｜原文刊於：新假期

學校沒教的搭車禮儀！

1. 切勿大力閂車門

呢一項係大忌嘅第一位！很多人平時搭開的士，因為驚閂唔實車門，所以習慣大大力閂車門。但私家車嘅車門比起的士嘅車門設計更為複雜，可能有很多按鈕，所以相對上較脆弱，大力閂車門分分鐘震壞車門上嘅零件，整一整又要幾千蚊，車主真係多得你唔少！所以大家下次閂車門嘅時候記得溫柔返啲喇。

2. 切勿唔睇清楚就開車門

唔開大個車門點落車！？開大車門當然係無問題，問題係無睇清楚車門外面嘅情況就一嘢用力推門。很多時候，車門外可能係欄杆或者石壆，如果呢兩樣嘢的高度比較低，遮住視線，搞到一開門就刮花車門。最慘係開門果陣撞花了隔離車的車門，到時都唔知邊個賠好。

3. 唔好一上車就坐後座，淨返車主係前面

唔講你可能唔會為意，坐私家車時一黎就坐後座，留空副駕，淨返車主係前面渣車，其實十分不尊重。無論係因為大家搭的士習慣了，又或者係覺得副駕位唔敢亂坐，但咁樣會俾人一種「當人係的士司機」的感覺。因此，如果只係得你一個，或者架車未坐滿人嘅時候都盡量唔好留空副駕位，以示對車主嘅尊重。

4. 一上車就係副駕睡覺=唔尊重

就算你避開了上一個行為，好醒目咁坐上副駕位，但你都可能會犯這個禁忌。就係一上車就在副駕訓覺，特別係坐長途車／自駕遊嘅時候，咁樣一樣會令到車主唔係太好受。因為揸長途車其實都幾攰，所以最好就適當地同車主傾下計，令到佢無咁苦悶。不過如果你真係好攰，可以嘗試輕輕同車主說明原因才去睡，相信佢都會體諒，唔好誤會你。

5. 係車上面食嘢要小心

好多車主都唔鐘意乘客係佢車上面食嘢，特別係鹽酥雞、薯片、等等嘅食物，一來容易被車內的物料會吸味道，二來碎屑多，難以清理，容易惹蟲，清潔十分麻煩。

6. 唔好係咁亂㩒啲掣／開櫃

坐車隨意亂㩒車上的掣或者亂開人啲櫃，係非常失禮嘅行為。道理同去人屋企一樣，你都唔會去到人哋屋企就隨便入房開人哋個衣櫃啦。

7. 勿對人哋架車評頭品足

好多男人都當架車係第二個老婆，你彈人哋架車舊、牌子差，或者顏色唔好睇，就等於直接同佢講「你Taste好差！」一樣，所以都係厚道啲，收收口吧！

唔知大家有無曾經唔覺意做過失禮乘客呢？下次坐朋友車就記得要留意喇，也要提醒子女，別做以上失禮行為！各位車主仲有無遇過其他1秒激嬲你嘅行為呢？