「生仔要考牌」 版主夫婦不再執著外人誤解 從投稿學身教 分享教3歲半早產兒法則【五味人生】
資料、 圖片授權：受訪者Facebook專頁「生仔要考牌系列」版主Kelvin
照顧早產兒子時感到迷茫 成為創立專頁契機
Kelvin、Mavis的兒子熹熹是一名在31、32周出世的早產兒，身體器官未發展完善，呼吸有問題，要戴氧氣樽、插喉，需在NICU（新生兒加護病房）住院70日。出院後，熹熹還要繼續戴氧氣樽、插喉，他們要上堂學懂如何更換、清洗。為了方便照顧熹熹，Mavis辭職成為全職媽媽，Kelvin負責上班賺錢養家。
他發現熹熹感官特別敏感，容易產生焦慮，很辛苦。他坦言無做過父母，亦無人教自己如何做父母，當時要慢慢學習怎樣做才對小朋友最好、最適合。他曾感到迷茫，不知道應否安排熹熹上很多特別訓練班，不知道應否當他是個特別的小朋友，偶爾與老婆意見不合，產生衝突：「擔心自己可唔可以做好…無乜方向。」
除了育兒問題，也要煩惱熹熹的升學問題，令他有段時間鑽了牛角尖。有次他在Facebook「問功課」，想聽取其他家長意見，忽發奇想想創立一個專頁，收集其他人的故事，齊齊自我反思甚麼叫好家長，「生仔要考牌系列」專頁就是這樣「出世」。
曾被外人誤會感氣餒 調整心態變得謙卑
Kelvin開始做版主，處理網民的故事，才發現香港人很壓抑自己，無從發洩，開始覺得這個專頁有存在價值。不過他曾經有過氣餒時候，試過被網民斥責：「你個Page個名已經有偏頗啦！你係咪即係叫人唔好生仔啊？」、「教壞人」，令他感到不開心，曾經停止更新一段時間，沉澱一下。重新振作後，他繼續經營專頁，竟見到網民很擔心他：「終於返嚟喇！」令他明白到自己需要調整心態。
因為這個經歷，亦讓他想通了、成長了，嘗試放開自己，接納、包容其他聲音，性格變成謙卑：「你鍾意講，無所謂，我拎一啲覺得啱嘅嘢，唔啱我聽完就算。」
最深刻的投稿：每年都會拎嚟警惕世人
對模型愛好者Kevin來說，被親戚整爛模型的故事最深刻，所以每次重溫都會感同身受，直言有些人不明白，也不尊重某些物件對其他人心中有獨特的價值，產生衝突。故事講述新年時，有親戚帶同小朋友上門拜年，事主已事先聲明房間內有很多珍藏玩具，叮囑小朋友不要進入。其後事主見到家中缺少盒裝飲品招呼客人，沒有鎖房門就落街，怎料一回家便發現模型殘骸。原來親戚沒有問過事主，就入房將模型拿給小朋友玩，最後玩爛。事主很生氣，就鎖門不見人。這個故事連台灣媒體都有報導出來，他笑言：「每年我都會拎出嚟警惕吓世人。」
除了搞笑故事，亦有些很有意義、感動的例子。有位媽媽育有一名患有妥瑞症的小朋友過馬路，小朋友聽到紅綠燈的聲響，驚到不敢走出馬路，甚至出現傷害自己的行為。途人開始對媽媽進行語言暴力：「呢個阿媽唔識教嘅」又嘲諷小朋友有問題。最後媽媽很放得開，沒有理會他人，只是專心安慰小朋友：「無事，放心！唔使驚，媽咪喺身邊，我慢慢帶你過馬路。」因為她明白仔女的感受才是最重要，其他人只是不知道他們的情況，才會攻擊他們，她不會怪責其他人。全因媽媽投稿，網民開始了解這個病，下次再見到同類情況就不會再亂說話。
望借「生仔要考牌」 專頁灌輸正確價值觀影響下一代
Kelvin指無論網民投稿的故事嚴重性是小是大，他都會認真看待，然後幫他們刊登。儘管有人罵他：「你亂咁批嘅啲稿！？」他都會堅持自己想法，因為那些事都是曾經真實發生過，而且可以讓各階層的人士更了解不同階層的家庭正在面對甚麼問題，豐富人生經驗。
他覺得專頁能夠借助網民在帖文下的討論，促使大家多角度思考：「可能有個小朋友著住鞋企喺凳度，有啲人話佢控制唔到，係SEN（特殊教育需要），一定要企喺度專注望住窗外風景，就唔會叫。但當你唔知小朋友狀況，就只會判斷佢係錯。」
現今社會盛行「贏在起跑線」的風氣，家長為免被比下去，會幫小朋友入學前報讀多個興趣班，增加優勢，但他並不認同，怕減低小朋友對學習的熱情：「我個年代，琴係興趣嚟，依家要好別樹一格先可以入到學校，對教育嚟講係本末倒置咗。」他盼望利用專頁去做多一步，希望宣揚、流傳好的價值觀，幫到下一代：「我想扭轉番好嘅價值觀，所以我攞番啲故事返嚟，畀大家去講件事啱定錯。」
早前有出版社公司聯絡Kelvin，想幫他出書。初時他想不通，曾感抗拒：「人哋嘅故事唔係屬於我，我無權攞人哋故事出書，好似對佢哋唔住，無佢哋無我。」後來他開始扭轉思維，出版社公司又找他時，他終於答應將投稿故事結集成書《生仔要考牌》：「個主編話佢睇咗我專頁好耐，佢都有小朋友，佢喺我度學到唔少。」對方大讚專頁帶出不少價值，影響其他人的生命，就是這句啟發了他。他強調出書並不是為了賺錢：「賺唔賺到錢我無所謂，更加想用本書影響人，幫到下一代。但好多人唔理解，唔理解唔緊要，無辦法，我唔會逼人理解。」
透過投稿學會如何做好身教
Kevin指熹熹是早產BB，身體發展追不上心理：「我小朋友都要上啲訓練、治療，鍛煉大小肌肉。佢條頸、隻手唔夠力，行路可能會平衡得唔好。佢一做唔到就會好焦慮、暴燥。」有時他想阻止熹熹做某些行為，但不成功：「叫佢做其他嘢，佢做唔到。」有些時候，他會因為網民的討論而反思自己，被啟發到如何教導兒子：「有時要接受佢。接受係好難，但我會試吓抽離少少，客觀啲對待佢。」
他指經營專頁後，自己都獲益良多：「有啲嘢以前啱，依家都啱。但以前嘅價值觀放落呢個時代度都可以係錯，唔一定啱，我就會配合番個社會，我都透過呢個平台學緊…明白到原來有啲人係會咁處理，呢個世界唔係得一個答案。人應該要向善，我會揀好嘅價值觀放喺心，將來教我小朋友。如果遇到呢啲情況，我會叫小朋友唔好咁做，應該點做，循循善誘。」
身為廿四孝爸爸，他最愛整玉子燒給熹熹食，還把食譜分享給大家：
食譜詳情即睇：玉子燒食譜+3個小貼士-港爸教路15分鐘即成 小朋友最愛吃
