生育問題｜老公求生B承諾幫手湊 誕女後1原因反口 港媽忙足7日一呻即被鬧勁崩潰：好憎佢

撰文：Clara | 資料來源：網上討論區｜圖片來源：TVB劇集《BB來了》

老公求生育誓言幫手 女兒出世後變臉反口

一名港媽於網上討論區以「比（畀我呻吓，憎老公憎左（咗）3年」為題撰寫帖文，呻老公拒絕幫助照顧小朋友。事緣她最初不願生育，但老公表示想要小朋友，又答應會幫助照顧，所以她才改變主意，願意生小朋友，可是：「佢話佢會幫手，奶奶會幫手，再唔係請工人…口口聲聲話自己乜都會做！」

她指女兒出生後，初時老公都會幫手照顧，後來對方始知為人父母有多麼辛苦，常常卸膊，將照顧小朋友的責任推給她：「我最嬲就係無口齒，乜都話得，點知生咗就乜都唔得！」她每天24小時都要照顧小朋友，一星期湊足七日，即使她呻很辛苦，想老公幫幫忙，對方都會惡言相向：「我要返工搵錢，唔會幫手！」

港媽望奶奶幫手 老公為護母黑面揶揄

有時港媽想叫奶奶幫手照顧一日半日，老公竟然鬧她、揶揄她：「我驚我媽辛苦！人哋個個都係咁湊，點解人哋湊到你湊唔到？開心啦你！發達啦你！」她批評對方沒有考慮過她的感受：「佢又唔係媽寶，佢係覺得如果奶奶湊，我就好得閒，就好似益咗我咁。佢成日話：『做呀媽係要湊仔㗎啦，係辛苦㗎啦….』所以我一開口叫佢媽幫吓手，佢就會寸我、話我、黑面。」

老公曾說不想要女兒 港媽悔不當初恨足三年

港媽很後悔信錯老公：「只可以話我當初無同佢傾細節，無好認真咁講明第時工作分配的事，佢乜都話得，乜都話會做，我就以為佢真係會。當時唔通我整份contract佢簽咩….到生完反口，我又可以點，除咗怨自己當初信錯咗佢之外。」所以她想到一個好方法，就是主動應徵做兼職，每天工作幾小時，沒有時間照顧小朋友，男家才願意幫手。

不過她直言仍不會原諒老公，因為老公有時會發晦氣表示不想要女兒：「我最嬲係，我知會辛苦，我都無話唔做，但我做7日，可唔可以幫一日呢？佢連嗰一日都唔肯畀我，仲覺得唔使我湊一日就益咗我咁….或者係FTM（全職媽媽）問題啦，佢覺得我唔使返工，喺屋企係嘆世界。呢啲說話聽咗3年，積埋積埋，所以憎到佢一個點…如果我再發脾氣，佢就會話：『唔好X湊啦你！』後來我就唔駁了，由得佢講乜都好啦，總之係我錯，係我揀錯人！！呻完都係繼續憎佢！」

網民批評港媽老公自私無口齒

帖文一出即有不少網民留言批評港媽的老公自私：「男人的話不可盡信」、「做佢老婆就可憐，老公好自私及無口齒」、「老公好唔識體諒老婆，畀奶奶湊一天半天竟對老婆說咁難聽說話」但亦有網民認為港媽現在應該沒有她說的那樣辛苦：「憎咗三年，即小朋友現年三歲？咁應該開始好帶。」港媽回覆指：「依家係開始無之前咁辛苦，但呢 3 年的怨恨我仲未放得低。」