講粗口｜港媽阻止鄰桌譚仔食客爆粗嫌教壞兒子 被批怪獸家長 正反網民掀罵戰

撰文：Clara | 資料來源：香港討論區 | 圖片來源：SHUTTERSTOCK、TVB劇集《親親我好媽》

港媽阻譚仔食客講粗口被公審

近日一名打工仔於「香港討論區」以「今日午餐食譚仔 隔籬個師奶過黎求我唔好講粗口」發文，指自己與同事到譚仔米線連鎖餐廳吃午飯，大家談笑風生時夾雜粗口，怎料隔籬枱的一位媽媽忽然走過來，禮貌地請求他不要再說粗口：「唔好意思啊！打擾你一陣，可唔可以唔好講粗口，我個仔全部聽曬入耳啊。真係唔好意思，麻煩你。」

他與幾位同事愕住了，對媽媽的行為大感無奈：「唔講以爲自己去咗高級餐廳。個仔唔聽教，其他人就要有義務配合你，母愛真係大過天。」不過他與成班同事最後還是停止再說粗口：「我地因爲母愛都無出啲咩聲，你知啦，如果你出聲話佢，又可以等被人公審。」他批評媽媽管得太多：「香港呢個地方依家連食個譚仔都要講道德倫理，真係怪獸家長啲仔女就大晒。香港已經沒落，完全被呢種道德文化籠罩，假文化。」

正反網民各持己見激起罵戰

有網民反對這位打工仔的看法，覺得他在公眾場合應該保持禮貌，以免影響其他人，而且他們覺得那位媽媽已經好有禮貌：「譚仔啲枱都有一定距離，逼到個呀媽走過嚟咁好聲好氣一定係講得唔係細聲」、「其實人哋好聲好氣叫你收斂啲都無咩問題啫」、「人地都無話唔教個仔，只係想你幫手講少陣啫」。

亦有媽媽網民認為家長才會明白這個問題有幾困擾：「我淨係教個仔唔好再講『你玩嘢咩？』都解釋咗一輪，仲要兩個禮拜左右佢先至唔再講，學就聽一兩次就學識。當然你有自由去講任何嘢，不過如果見到附近有細路唔講粗口，我諗都係一個尊重。媽媽如果好有禮貌咁要求你，咁大個人，忍一陣都無問題呀？」

這位打工仔就很不認同：「如果係我太大聲滋擾到人，我會細聲啲，但係你親子教育我哋有咩義務要配合？」有部分網民支持他的說法，覺得媽媽應該借機教小朋友不要說粗口：「個仔除非呢世都唔出街唔返學唔返工，唔係一定會有機會接觸」、「我會管自己小朋友把口，而唔係管人哋把口囉」、「教好個仔係你自己嘅責任，唔係街外人嘅責任」。