虎爸老公粗口鬧3個月大兒子兼拍打 港媽自責太懦弱被網民斥責累咗個仔

撰文：Clara | 資料、圖片來源：「生仔要考牌」、shutterstock

意外懷孕奉子成婚

近日有名港媽於faceboook專頁「生仔要考牌」投稿，以長文控訴老公。她指自己出生於家教甚嚴的家庭，但她相當反叛，剛出社會，她就意外懷上男朋友的BB，男朋友叫她生出來，大家一齊照顧。當時她很信任男朋友，二人奉子成婚，惟她現在卻對當時決定感到非常後悔：「呢個係我最錯嘅決定，好多喺呀仔嘅事上，我同我老公係完全夾唔埋。」

罪狀一：虎爸拍打兒子

港媽指兒子3個月時，老公對他已經很兇，幫兒子換尿片時，當見到兒子不耐煩地轉身，他就會怒斥兒子：「唔好轉！」還拍打了兒子大腿一下。她馬上鬧老公：「做咩打個仔？」又叫老公給予耐性，兒子只得3個月，聽不明白。但她老公就堅持個仔識聽，還反駁：「我教仔你唔好咁多事，你唔好出聲，我細個都係被人打大，我一定會打個仔。」

她表示，老公比自己強勢，一直都是「有佢講冇我講」，所以她平時很少為仔發聲，但她難以容忍老公為打而打，所以才出言阻止。她指自己小時候「教極唔聽」，所以曾經被父母打過，然而她認為兒子已經很聽話，老公不應該因為自小被人打大，於是將痛楚轉嫁兒子。

罪狀二：虎爸對兒子講粗口

港媽又指兒子不時發脾氣，她都會大聲鬧他，但不會用到粗口。有次兒子吃飯發脾氣，她一走開，老公立即拍枱並用粗口鬧仔。她與老公對質，鬧他身為大人不應該用粗口鬧小朋友。結果二人對鬧，他們兒子在旁嚇到喊。

罪狀三：虎爸無視兒子跌倒

港媽指自己已經多次提醒老公不要獨留兒子坐在梳化，有次兩父子本來在客廳玩，怎料她老公突然行開，由得兒子自己一個，最後兒子從梳化跌落地。當時她沒有鬧老公，只是第一時間衝出客廳，很緊張地問兒子有沒有撞傷頭，望住兒子說：「sorry，我哋冇睇好你，令你整親痛痛！」之後既憤怒又心痛地抱兒子入房，惟她老公毫無悔意，還問她：「同個仔講乜嘢sorry呀你？」她沒有理會，全晚在房間觀察住兒子身體狀況，怕他會嘔。後來她老公入房，她以為老公終於懂得關心兒子，可是老公原來只是想鬧她：「頭先做乜喝我？」

為保完整家庭拒絕離婚

港媽表示他們兩夫婦還有發生過很多次類似的衝突，每次她都覺得很過分，可是她不敢與老公坐下來溝通，更因為「完整家庭」四字，拒絕離婚：「我懦弱，當刻件事完咗又冇拎返出嚟講，淨係覺得下次冇事嘅，我一直逃避⋯⋯好多人問我：『做乜唔走？仲同佢一齊？』我都答唔出，我想個仔有個完整家庭，但睇怕要個完整家庭，只係會每日吵吵鬧鬧。」

港媽指她老公的父母在外國生活，他在港獨居多年，沒有跟家人相處的時間，也沒有與家人過節的概念；但她與家人關係很好，假日會一齊飲茶、行山，節目亦會一齊慶祝。

她認為當兩個人成長背景截然不同，就要有心理準備，二人在生活與價值觀上會有好多差異。兩個人相處或者沒有大問題，但生兒育女後，身為父母總想把自己最好的，都留給仔女，此時二人就很容易產生分歧。

最後她勸勉大家：「要生小朋友出嚟唔難，但要點管教佢，俾咩家庭佢，呢啲先係重點。勸各位冇準備、冇共識點樣管教小朋友，唔好一時意氣，衝動生仔，會連累大人同小朋友一世。」

網民斥港媽太懦弱：害自己累埋個仔

帖文引來不少網民留言，有網民提醒港媽要留意虎爸老公的情緒問題：「我覺得可以嘗試搵下婚姻輔導，會由原生家庭睇起，唔知你老公咩想法，但咁落去唔係辦法」、「大家都忽略咗男人其實都有產後抑鬱，post主有無了解吓你老公？」但大部分網民都認為港媽為了自己與兒子著想，應及早離婚，否則兒子於終日吵鬧的環境長大，對他身心發展有負面影響：「嚟喇嚟喇，唔敢離婚賴落個仔度，又一成功例子」、「畀個咁樣嘅完整家庭佢，大個心理同待人接物方面都可能有問題。定係經濟上需要個所謂『爸爸』而已？離婚記得攞贍養費」、「每個人都會催眠自己，要畀小朋友有一個完整家庭，代價係佢要喺一個暴力家庭長大」。