責任心｜港爸40歲終大學畢業:學習永不嫌晚 用一法教育仔女 讓孩子無壓力下成長【五味人生】

資料、圖片授權：受訪者KOURMET 52 創辦人方國儒先生｜圖片來源：由受訪者KOURMET 52 創辦人方國儒先生提供

港爸責任心重一年只放十日假

方爸爸從事酒店飲食業超過20年，曾做過新世界旗下酒店、皇冠假日酒店。他有一班認識20多年的日本朋友從事漁農產業，由於日本的農產需要好的平台引入其他地方，需要香港方面的引入及宣傳配合 ，所以本來他已經退休，早前他都決定重投社會，與太太一起成為這個重要橋樑的角色，在香港經營日本直送時令產品生意。他每天六時正起床，八、九時就會準備回店工作，開始打文件、回覆日本公司的電郵。他指工作上要面對客人，常常有突發事情發生，要作出應對。

他坦言一星期七日都要開舖，一年365日只會容許自己放10日假，就是新年初一至初十。不過他是嚴己寬人的老闆，員工一定可以放假，有時他們準備在節日外出陪家人吃飯，他都會配合，提早關門。雖然工作忙碌，但他堅持只由早上十時半做到晚上七時半，準時回家吃無味精、有營養的住家飯。他解釋盡量避免外出吃飯，除了因為想追求健康生活之外，最重要是想享受家庭溫暖：「我做咗咁多年飲食，唔會再出街食，有咩好得過住家飯吖。」為了平衡工作與家庭，他回家就會放下公事，全心全意陪伴家人閒聊、看電視、一起下廚等，度過溫馨的家庭生活：「我放工就唔會諗其他嘢，收咗工大家都唔會講公司事，舒服咁過自己生活，同啲仔女一齊食吓飯咁樣。」

食譜詳情即睇：三文魚食譜-煎極都好嚡口？想外脆內軟入口即融好簡單 日本食材店老闆教你點煮

絕不將責任全推給別人

回想以前仔女還是襁褓中的嬰兒，方爸爸與太太都有一份正職，但又要同時照顧仔女，惟有加上外母、媽媽四個人進行輪更制，分配不同的職責。可能很多男士覺得自己要忙於工作，賺錢養家，故將湊仔責任推給太太，他絕不會這樣做：「好似編更咁樣，如果只係外母或者太太湊晒，會癲㗎！大家有時放吓假、唞吓氣會輕鬆啲。」

要仔女學會為自己人生負責

所謂「活到老，學到老」，方爸爸從不介意別人的眼光，40歲讀畢大學，為仔女做好榜樣。多年來他都抱有一個宗旨，不會強逼仔女讀書，他想他們明白，自己的人生要由自己負責，所以給予他們很大自由度，是位開明爸爸：「由細到大灌輸佢哋，書，係讀一世，做人就要細個開始學起。讀書要享受，你肯去讀，勤力去讀，你已經盡咗力。但如果你唔勤力去讀，無盡到力，最後唔得，只會後悔。你自己嘅人生嚟㗎嘛，將來條路係你嘅，無得督住你讀書，去做好。你哋放棄係你哋問題，唔係家長…」他指仔女常常笑言讀書完全無壓力，很輕鬆：「我哋管唔到㗎，畀咁多壓力佢做乜？佢想讀，自然會讀。」

他偏向做一個指導的角色，平時讓仔女自由發揮，見到有問題就會出手幫助，陪他們溫習：「有時偏咗少少就提佢哋…路係佢揀，我唔可能一世睇住佢。我會叫佢哋做事要認真，唔好放棄，無嘢做唔到，有足夠資源，乜都做到，唔好話唔得。」

現在仔大女大，25歲的大女已經畢業於酒店管理學系，現時在酒店工作；細仔亦已21歲，正就讀香港浸會大學幼兒教育系二年級。