去遊樂場不應踩滑梯？港媽怒斥不合衛生惹網民激論

撰文：Clara | 資料來源：「生仔要考牌」| 圖片來源：「生仔要考牌」、shutterstock

港媽怒斥小朋友去遊樂場不應踩滑梯

一名港媽在facebook專頁「生仔要考牌」發文，她指很多家長喜歡帶小朋友去遊樂場玩，大多小朋友都應該玩過遊樂場內的瀡滑梯，她認為家長有責任教小朋友不應踩滑梯：「有冇家長明白咩叫做瀡滑梯呢？小朋友或者唔明，但係作為家長，我覺得係有義務去教導小朋友如何正確使用瀡滑梯！『瀡滑梯』咪就係字面咁解：『瀡』落條滑梯。但係，永遠去到公園玩時，都會見到有家長帶住個小朋友或者任由個小朋友 『行』上去 或者 『行』落去！」

港媽解釋，鞋底滿佈細菌，好污糟，所以她一直教導自己仔女去遊樂場不應踩滑梯，希望其他家長會仿傚自己：「其實有冇諗過，你咁行，對鞋有幾污糟，有幾多細菌，踩咗落喺條滑梯度呢？我由細到大都叫自己小朋友唔可以「行」滑梯，小朋友會問點解人哋可以，而佢唔可以？我會解釋，而佢哋都會明白接受！希望睇到呢篇文章嘅家長，可以教導下自己嘅小朋友『己所不欲，勿施於人』」

網民認為遊樂場難免有細菌

然而大部分網民都不認同港媽此言論，他們認為遊樂場難免會有細菌：「去公園到底係要幾乾淨，個個都成身汗污糟邋遢咁返屋企沖涼洗衫」而且，他們覺得港媽是怪獸家長，限制小朋友發展：「唔識點玩滑梯，以為滑梯得一種可能性，想限制小朋友想像力，盲目跟隨你自己嘅標準答案，出post嗰個應該未考到牌」、「香港啲公園已經悶，連滑梯玩法都要嚴格規管咁小朋友都好慘。」

有網民指自己看過一篇關於兒童成長心理學的文章，提到小朋友去到某個年齡就會建立挑戰常規的概念，想證明自己的想法是可行，所以他們喜歡將遊戲玩法用相反方法玩、將某啲物件用相反方法用，他指這是小朋友正常成長必經階段。

反對港媽的網民建議她若想完全避開細菌，只有留在家中最安全：「怕污糟就唔好出街啦」、「怕污糟不如屋企整條滑梯比佢滑啦 ？」、「要乾淨不如你（喺電腦）開個模擬市民起公園比佢玩好過啦。」、「着襪你又點肯定對襪一定係乾淨喎，最好小朋友好似醫生入手術室咁，全身上下都要換晒無菌衫啦」

亦有網民建議港媽自己想想辦法避開細菌：「原post仔女係咪每次都四腳朝天咁瀡？」、「兩隻腳搽晒金寶綠水，一路瀡，一路清潔條梯」、「每次爬完都要用1比99消毒番畀下一手」

網民指踩滑梯會引發安全問題

另一方面，有網民認同港媽部分言論，不過他們並非覺得踩滑梯是污糟，而是關乎秩序及安全問題：「行上滑梯，我覺得係阻住下一個小朋友玩」、「最重要係安全秩序問題，如果一路有人瀡緊，咁小朋友梗係唔應該行上去。」、「如果話人多夾硬行，話危險我都明」

資料來源：「生仔要考牌」