過度活躍女兒學有所成同時修讀3個學系！港媽靠1招令她愛讀書【五味人生】

資料、圖片授權：受訪者媽媽Fanny｜拍攝：Hugo（部分圖片由受訪者媽媽Fanny提供）

港媽身兼多職最大心願想幫到人

Fanny自小喜愛畫畫，後來發現自己可以將畫畫技巧放於人體上，繼而成為專業化妝師，擅長人體彩繪、特技化妝。她曾舉辦彩妝教室、擔任演藝界化妝工作，亦曾贏得特技化妝亞洲賽季軍。學習美容期間，她接觸到香薰油，自2005年開始鑽研香薰治療，並獲取國際認可英國IFA香薰治療師證書，取得專業資格，期間遠赴法國進修，並到英國和澳洲，採購純天然香薰精油。

她覺得這份工作很有意義，幫到很多人：「幫到有情緒壓力以及癌病嘅病人，連孕婦、BB也幫到。有個女客人後生嘅，啱啱結完婚三個月，發現有胰臟癌，我會幫佢按摩。丈夫唔知點幫到佢太太，太太又成日發脾氣。於是我教佢哋點同病人按摩，用手嘅溫度傳達愛畀佢哋，一來家屬覺得自己做到啲嘢，唔係眼白白睇住病人好辛苦，二嚟病人感受到人哋嘅關心。」

除此之外她還有跟瑞士品牌合作，推廣醫療產品「腦活益」，她指有些老人家有腦退化問題，吃完之後反應變快，而且睡得好，整個人更加樂觀。未來她將會送給有需要的低收入家庭：「幫咗人哋先，做呢個品牌更加有動力。」

願做生命導師教好過度活躍女兒

Fanny坦言要身兼幾職，生活非常忙碌，時間很緊密：「好多時我利用埋瞓覺嘅時間，工作完返到屋企，個女瞓咗覺，我先開始做文書工作、覆客人、準備聽日工作、設計課程。」雖然工作忙，但她沒有因此減少陪伴女兒的時間，反而邀請女兒陪自己一起工作，令她兼顧到家庭與工作，她大讚囡囡是好助手：「其實我用咗好多時間陪佢，佢會睇我同人哋試妝，我去進修，同人哋傾生意嘅時候，佢都會做我秘書，我哋係無分開過。」

食譜詳情即睇：曲奇食譜-自家製薰衣草曲奇甜而不膩 芳香傳遍家中

她坦言女兒有過度活躍：「問題比較多，佢唔鍾意瞓覺，同埋喺學校比較特別，我要同老師溝通，平伏佢心情。佢好多時唔開心，有情緒問題，我只可以做佢生命導師，鼓勵、開解佢，教佢邊度跌低，邊度企起身。問題唔喺佢自己度，只要改變態度就可以，呢個係最辛苦嘅地方。」有時她見到女兒做錯事，都會訓話，事後會解釋給女兒聽：「你唔好怪媽咪，因為媽咪係想你好。」女兒原來明白媽媽的苦心，曾經跟老師說出心底話：「媽咪雖然鬧我，但係係想為我好。」老師轉述給她聽，令她很感動，覺得自己的付出沒有白費到。

她不讓女兒吃西藥，通常會靠自然療法，亦有用自家香薰油幫女兒按摩減壓，讓她睡得更好，兩母女感情因此變得更親密：「佢一病就會諗起媽咪，因為我會幫佢腳底按摩。」

母女一起讀書 女兒終學有所成

現在Fanny女兒已離開香港，就讀加拿大著名學府─多倫多大學，同時修讀環境生物學、法政、地理學系，在較為自由、輕鬆的學習環境下讀書，在普遍人眼中算是學有所成。

Fanny笑言自己讀書不好，但她給了女兒很大學習空間，沒有為她安排補習班，讓她在無壓力下讀書：「佢盡咗力，唔合格都無所謂。佢小學問我：『表哥表姐都讀到大學，我讀唔到點算？』我話：『唔緊要，好多人中三、四先發力，我相信你將來都會發力。』跟住好開心，佢真係做到。」她亦給了強心針予女兒：「如果佢有一日讀書讀到好攰，我唔介意佢放低唔讀，只要佢開心就得。」

不過最重要是她會抽時間陪伴女兒讀書：「我每一晚都會陪佢讀書、睇書，令佢鍾意揸住本書，我哋喺屋企從來唔開電視，變咗佢咩都無得做，只可以讀書，佢好鍾意分享故事，我又好鍾意聽佢講，久而久之佢鍾意讀書。」

後來女兒迷上讀書，初中時曾經試過在學校暈倒、甩頭髮，頭皮上出現一個個洞，她擔心女兒身體健康，要關電腦、關燈，催促睡覺：「佢停唔到落嚟，鍾意讀書到唔瞓覺，我同佢鬧交要佢瞓，佢有時鬧我：『我同學讀到凌晨三點啊！』我話：『你唔同人哋，你一點好喇，因為你會病，』」她試過考慮讓女兒停學一年，幸好最後女兒能夠拿到平衡：「唔想佢讀到傻咗，讀書只係人生起步，唔係人生嚟，希望佢明白。」