中一分配放榜後 家長百問不厭的四條問題 解答助了解成功機率與流程

中一分配放榜後 家長百問不厭的四條問題

中一分配放榜後第一條問題

第一條問題是，中一自行分配放榜後，如果正取生已經在直資中學註了冊，連「家長承諾書」及「小六學生資料表」都畀埋佢，咁點算呢？

其實冇乜問題的。 家長如決定放棄直資學校那個位， 就可以同埋小朋友一齊去註了冊那間直資學校， 取回「家長承諾書」以及「小六學生資料表」 就可以了! 因為直資學校是要把那兩個文件給回家長的。 家長取回這兩個文件就可以把免費學額取回了。 家長唔使憂慮兩份文件不能取回，因該些文件是你的。

中一分配放榜後第二條問題

第二條問題是，如果學生不獲通知話佢哋係正取學生， 是否表示佢哋唔會得到學位呢？

答案是否定的。 因為就算佢哋喺自行分配呢個階段得唔到通知有派位畀佢哋 ，佢哋仍然係可以參加統一派位。 因為自行分配只係用了學校 30%學位， 還有70%學位係统一派位嗰度， 這是第一點。 第二點就是因為就算正取生派完啲學位之後，仲有一啲學位漏出來，部份正取生或會同時獲兩間參加派位中學通知為正取學生， 而根據現行嘅機制佢只可以獲派首選的學校，咁樣就會漏咗次選那個學位出來。 仲有部分正取生或者會選擇放棄自行分配學位而接納直資中學嘅學位， 如此這般亦都會騰空了一個學位 。總而言之，就算未獲通知嘅學生，都會以備取學生身份， 填補一些於自行分配學位騰空的學位的。無論如何，收唔到通知的學生，仍然係有機會被派到學位，機會在人間也。

中一分配放榜後第三條問題

第三條問題是，在這段時間，家長是否可以同小朋友去心儀嘅學校叩門呢？

答案是：不可以。 因為喺呢段時期， 中學係不會接受家長叩門的。就算係小學，叩門都係在統一派位放榜之後先至舉行 ，而唔係於自行分配學位放榜之後 ，所以叩門嘅時間，應該係喺7月統一派位放榜之後。這一點家長要知道。

中一分配放榜後第四條問題

最後一條問題是，統一派位填表有什麼值得留意嘅事項？

答案是：有以下幾點。第一點係中一派位與小學有不同的地方，中一派位甲和乙部，都係以組別來分先後嘅， 即係話先派band 1，然後派band2，然後派band3嘅學生 。舉例，如果你係band 1嘅學生 ，你就會獲得優先派位嘅機會； 然後呢一批band 1嘅學生再用抽籤(隨機編號)嚟決定邊個揀學校先。而揀校的方法，最好就係「竹門對竹門，木門對木門」。所以如果同學係 band 1就可以揀返你心目中band 1嘅學校， band2就可以揀band 2學校， 餘此類推。如果你「越級挑戰」，例如band2學生揀band 1學校，機會就不大了，因為band 1嘅學生經已揀曬band1學位。除非那年嗰啲學校退步跌咗watt， 否則你唔會揀到嘅 。你又會問，誰會

知道自己小朋友應該揀邊間學校？個答案係，最佳嘅人物應該係學校的班主任，或者熟悉小朋友嘅老師，又或者學校嘅校長 。所以，家長最好請教以上熟悉小朋友的人士，佢地會憑過往嘅經驗睇下佢班考第幾啲小朋友，多數派到邊間學校，講畀家長聽 ，家長要聽學校老師經驗分享，千萬不要亂填，呢一點家長要留意。重有一點要家長留意的，就係喺填表之前家長要參照「選校手冊」同埋「中學一覽表」，一覽表裏面的學校編號以及因應每間學校的嘅「非保留學位」有多少，作出明智的選擇。

以上四條問題係家長時常寫信嚟問我的，希望我的答覆能夠解決家長心裏面中一填表嘅問題 。以下係家長要緊記的幾個日子 ：

4月上旬 ：家長會接到「「中一派位選擇學校表格」與及相關嘅文件

4月10日 ：家長要回覆非參加派位直資中學是否保留學位。即係話家長如果係接受或者拒絕直資學校，就應該喺4月10號之前作出決定。

五月上旬 ：學校要遞交家長已填妥嘅「中一派位選擇學校表格」， 亦表示在5月上旬之前家長，就要遞交「中一派位選擇學校表格」。

最後於7月9號， 教育局就會公佈中學學位分配結果

7月11及12日 ：家長與學生會去獲派中學註冊。

祝各位家長的小朋友能派到中一心儀嘅學校！