小一自行分配學位注意事項 避開陷阱要知道
撰文：趙榮德｜圖片來源：新傳媒資料庫｜編輯：Sunday Kiss
小一自行分配學位——不可放棄獲派學位
「如果子女成功被取錄，可否放棄該校在一月再參加統一派位搏另一間更加好的？」
昨日有一家長在用短訊向我提出以上問題，嚇咗我一跳，我第一時間用短訊答：「萬萬不可！」但怕該家長收不到，故此立即再用電話跟她解釋，以下為我和她的對話：
「你千祈唔好放棄教育局派俾你嘅學位呀，因為你放棄咗呢個公營學位，就唔可以再參加一月嗰個統一派位㗎啦！」
「點解唔可以呀，趙Sir！我都冇接受佢個學位，點解唔可以再申請多一次攞另一個學位呢？」家長理直氣壯地問。
「唔可以，因為每一個合資格的申請人，只獲派小一學位一次，派了一個學位俾你個仔或女，佢唔接受，就冇第二次機會了。所以你千祈唔好唔接受呀！」
「趙Sir，頭先你話，我唔可以今年帶個仔再參加一月嗰個統一派位，咁我可否帶佢第二年再參加自行分配學位？」家長似乎唔明我的解釋。
「唔得，我重複，每一個合資格的申請人，只獲派小一學位一次，你唔接受嗰個學位，就永遠唔會獲派第二個學位啦，明白未？」我有些勞氣。
「呵，明白啦！咁我接受咗個公營學位之後，仲可以申請乜嘢學位呢？」家長鍥而不捨地問。
「可以試用以下2 Do’s」
小一自行分配學位：2個可行方法
「第一樣可以做的係申請私立小學學位，只要你搵到啲質素好過官津嘅，又仍然有學位嘅私立小學，你大可以幫個仔申請嘅，因為教育局冇規定接受咗官津學位之後，唔可以再接受私立小學！」
「咁，啲私立小學收咗個仔之後，要唔要去嗰間原本取錄個仔嘅津貼小學取消學位？」家長都幾有責任感。
「最好去取消咗個學位啦，等嗰間小學可以立即收第二個申請者！」
「咁第二樣又係乜嘢？」
「第二樣可以申請的學校係直資小學，但最好申請私小先，因為直資小學喺你申請嗰陣時，可能問你有冇接受過官津小學嘅學位，亦可能要你簽『承諾書』，要你承諾呢樣，承諾嗰樣，總之好麻煩！」
「點解報直資會咁麻煩？」
「因為直資亦都接受政府資助，既然你個仔已經接受咁一個資助學位，就唔可以接受另一個資助學位啦！所以直資雖然都可以報，但如果俾教育局發現你個仔『一腳踏兩船』，便會要你放棄其中一間了，所以報直資冇報私立咁易收。綜合來講，除非私立係好過派俾你子女嗰間小學好多，否則，都係一動不如一靜。」
「係嘅，官津小學『四平八穩』，又唔使交學費，都係唔使諗咁多啦！」家長似乎有咗決定！
