我的催奶手冊|餵人奶迷思+上奶湯水食療
撰文、圖片︰茄蛋媽
母乳VS奶粉
前提一下,人奶 係好嘅,但配方奶粉都唔會食壞人,我都係食奶粉大,依家都肥施大隻。聽講食人奶嘅BB健康啲,但事實證明,唔可能套用每個BB身上。
茄蛋仔4個月開始鼻敏感瞓唔好,6個月開始傷風,到依家歲幾,睇醫生感冒病睇醫生食藥都五次喇。所以,茄蛋媽認為媽媽們可以變通下,如果真係上唔到奶、環境身體唔許可,餵奶粉都絕對唔會對唔住任何人,最緊要BB食飽飽呀。
心態最重要
茄蛋媽產前報咗幾個 母乳講座,學餵奶基本動作、了解 上奶周期 等知識,好記得講者果句:「絕對唔會無奶」,聽完佢嘅理論,無再擔心過有無奶嘅問題,但前提係要做好上奶功夫。
雖然產後好攰,但提提大家,產後要努力擠 初乳 啊。我地嘅乳房係要透過吸啜刺激而產生 母乳 ,不過新生BB未太識得點樣啜,所以產後我哋可以用手刺激乳房,之後上奶會順利好多,而且第一水嘅初乳被稱為「 黃金初乳 」就知幾咁矜貴。
初期母乳份量少
有啲媽咪會話擠到個乳頭勁痛都係得好少,其實當初茄蛋媽都係由5ml、10ml咁慢慢加上去㗎咋。提提你,留院期間可以問姑娘拎針筒收集初乳,香港嘅醫院係好鼓勵媽媽 餵母乳 ,遇到唔識點餵,即管問姑娘啦,佢哋好樂意解答,甚至郁手幫你塞個胸入BB個口教你㗎。
![產後第二日嘅初乳收集成績幾好,漏夜醫院熄晒燈都努力擠母乳,要讚下自己。](https://imgs.sundaykiss.com/wp-content/uploads/2017/09/nhv4dxh3MJN7gxp/img_0796_86423435159c54c0d52e36-605x807.jpg)
坐月上奶湯水食療
係呢度唔詳細打字喇,自己睇圖,但提提大家,食飯,一定要食飯,雖然產後望住自己發漲晒嘅身形真係無乜胃口,但唔食飯就唔會有奶,記得要食嘢,減肥嘅事,奶量穩定咗再算啦。
![蒸肉餅係坐月必備菜式,茄蛋媽好鍾意食。加包滴雞精,就成為坐月時期最常食嘅午餐。](https://imgs.sundaykiss.com/wp-content/uploads/2017/09/nhv4dxh3MJN7gxp/img_0797_141634161259c54c0fa8fde-807x605.jpg)
圖中嘅係茄蛋媽嘅 坐月湯水清單 ,喺婆婆屋企坐月果100日,佢每日都會照單執湯,上奶湯水日日飲一煲咁上下。
提提大家,產前要買定所有煲湯料(除咗新鮮料如豬肉魚雞果d)。建議大家用個盒裝好,每日請屋企人/ 陪月姐姐/ 老公買新鮮料,最好用電子煲啦,因為掉晒落去,較好時間2個鐘多d就飲得,唔駛睇火,把握時間休息。
補水足 谷奶 勁
除咗上奶湯水,大家記得記得長期補水。產後果一百日,茄蛋媽每一日都會用個水樽裝住 炒米果皮水 ,跟身咁飲,粗略估計當時每日淨飲水都已經有5-6公升,谷奶谷到蛋仔食唔切,唯有沖涼時放奶😭好浪費。
補水對上奶谷奶嚟講係非常重要,如果你嫌水無味,鮮奶/ 果汁/ 豆漿都係非常好嘅選擇,總之補水補水補水。不過,重點提提大家,盡量呢個時候唔好飲咖啡,因為咖啡吸水吸得好犀利㗎。
![飲米奶可以幫助谷奶上奶,但建議揀無糖米奶,唔好為咗餵奶而儲肥自己。除咗米奶,豆奶如鈣思寶都有效。](https://imgs.sundaykiss.com/wp-content/uploads/2017/09/nhv4dxh3MJN7gxp/img_0792_203125903759c54c06418fe-454x807.jpg)
別忘記休息
休息瞓覺係上奶嘅主要條件之一,但坐月期間要夜晚好好瞓一覺係幾乎唔可能,因為初生BB胃仔細,裝唔到好多奶,兩個鐘左右就喊食奶,加上佢哋又啜得唔叻,好似食極都唔飽咁,一啜就啜成個鐘,飲完奶仲要 掃風 ,一掃就掃大半個鐘(好運嘅話)。
![兩個鐘餵一次奶嘅日子,到今日都仲歷歷在目。](https://imgs.sundaykiss.com/wp-content/uploads/2017/09/nhv4dxh3MJN7gxp/img_0807_140764922959c54c28bf7a5-605x807.jpg)
可考慮做「泵媽」
雖然有姑娘講過,如果BB啜得啱,係唔會啜咗風入肚,但為咗安心,茄蛋媽都係有掃,唔係每次都有嗝。餵完奶、掃完風、換埋片,BB終於瞓咗喇,望吓個鐘,原來距離下一餐餵奶嘅時間得返半個鐘,天呀,就這樣,頭三個月,真係無乜點瞓覺。不過唔瞓覺係唔得嘅,如果比我揀多次,我會選擇做 泵媽 ,因為泵出嚟可以請家人幫忙,自己把握時間瞓一陣。如果選擇 埋身 啜,唯有夜晚辛苦啲啦,盡量把握機會恰吓都好㗎。
![家人幫忙好重要,埋身餵嘅媽媽可以選用呢款仿乳頭奶樽,bb唔會混淆。](https://imgs.sundaykiss.com/wp-content/uploads/2017/09/nhv4dxh3MJN7gxp/img_0814_78040635259c54c369a7fb-605x807.jpg)
*呢大半年無更新,因為蛋仔半歲時跌親,發現咗少少問題呀。其實茄蛋媽日日都有好多嘢都想同人分享,更新慢啲,希望大家唔好介意啦*
參考資料:衛生處網頁