我的催奶手冊｜餵人奶迷思＋上奶湯水食療

懷孕資訊

Ariel

Sep 28 2017

最近不約而同有兩個剛生BB嘅朋友遇到無奶追奶嘅問題，茄蛋媽並唔係專家，但餵人奶已經一年一個月，曾經歷過唔夠奶或者奶太多嘅階段，希望喺度分享我的催奶經驗，等各位準媽媽可以鋪好媽媽奶之路。

撰文、圖片︰茄蛋媽

母乳VS奶粉

前提一下，人奶係好嘅，但配方奶粉都唔會食壞人，我都係食奶粉大，依家都肥施大隻。聽講食人奶嘅BB健康啲，但事實證明，唔可能套用每個BB身上。

茄蛋仔4個月開始鼻敏感瞓唔好，6個月開始傷風，到依家歲幾，睇醫生感冒病睇醫生食藥都五次喇。所以，茄蛋媽認為媽媽們可以變通下，如果真係上唔到奶、環境身體唔許可，餵奶粉都絕對唔會對唔住任何人，最緊要BB食飽飽呀。

心態最重要

茄蛋媽產前報咗幾個母乳講座，學餵奶基本動作、了解上奶周期等知識，好記得講者果句：「絕對唔會無奶」，聽完佢嘅理論，無再擔心過有無奶嘅問題，但前提係要做好上奶功夫。

雖然產後好攰，但提提大家，產後要努力擠初乳啊。我地嘅乳房係要透過吸啜刺激而產生母乳，不過新生BB未太識得點樣啜，所以產後我哋可以用手刺激乳房，之後上奶會順利好多，而且第一水嘅初乳被稱為「黃金初乳」就知幾咁矜貴。

初期母乳份量少

有啲媽咪會話擠到個乳頭勁痛都係得好少，其實當初茄蛋媽都係由5ml、10ml咁慢慢加上去㗎咋。提提你，留院期間可以問姑娘拎針筒收集初乳，香港嘅醫院係好鼓勵媽媽餵母乳，遇到唔識點餵，即管問姑娘啦，佢哋好樂意解答，甚至郁手幫你塞個胸入BB個口教你㗎。

坐月上奶湯水食療

係呢度唔詳細打字喇，自己睇圖，但提提大家，食飯，一定要食飯，雖然產後望住自己發漲晒嘅身形真係無乜胃口，但唔食飯就唔會有奶，記得要食嘢，減肥嘅事，奶量穩定咗再算啦。

圖中嘅係茄蛋媽嘅坐月湯水清單，喺婆婆屋企坐月果100日，佢每日都會照單執湯，上奶湯水日日飲一煲咁上下。

提提大家，產前要買定所有煲湯料（除咗新鮮料如豬肉魚雞果d）。建議大家用個盒裝好，每日請屋企人/ 陪月姐姐/ 老公買新鮮料，最好用電子煲啦，因為掉晒落去，較好時間2個鐘多d就飲得，唔駛睇火，把握時間休息。

呢種啜啜水樽好方便，隨身帶去邊飲到邊。用茶包袋裝住炒米果皮（剪幼條易出味），加熱水焗下就飲得。

補水足谷奶勁

除咗上奶湯水，大家記得記得長期補水。產後果一百日，茄蛋媽每一日都會用個水樽裝住炒米果皮水，跟身咁飲，粗略估計當時每日淨飲水都已經有5-6公升，谷奶谷到蛋仔食唔切，唯有沖涼時放奶😭好浪費。

補水對上奶谷奶嚟講係非常重要，如果你嫌水無味，鮮奶/ 果汁/ 豆漿都係非常好嘅選擇，總之補水補水補水。不過，重點提提大家，盡量呢個時候唔好飲咖啡，因為咖啡吸水吸得好犀利㗎。

飲米奶可以幫助谷奶上奶，但建議揀無糖米奶，唔好為咗餵奶而儲肥自己。除咗米奶，豆奶如鈣思寶都有效。

別忘記休息

休息瞓覺係上奶嘅主要條件之一，但坐月期間要夜晚好好瞓一覺係幾乎唔可能，因為初生BB胃仔細，裝唔到好多奶，兩個鐘左右就喊食奶，加上佢哋又啜得唔叻，好似食極都唔飽咁，一啜就啜成個鐘，飲完奶仲要掃風，一掃就掃大半個鐘（好運嘅話）。

可考慮做「泵媽」

雖然有姑娘講過，如果BB啜得啱，係唔會啜咗風入肚，但為咗安心，茄蛋媽都係有掃，唔係每次都有嗝。餵完奶、掃完風、換埋片，BB終於瞓咗喇，望吓個鐘，原來距離下一餐餵奶嘅時間得返半個鐘，天呀，就這樣，頭三個月，真係無乜點瞓覺。不過唔瞓覺係唔得嘅，如果比我揀多次，我會選擇做泵媽，因為泵出嚟可以請家人幫忙，自己把握時間瞓一陣。如果選擇埋身啜，唯有夜晚辛苦啲啦，盡量把握機會恰吓都好㗎。