岑潔儀 餵母乳辛酸史
藝人岑詠辰（原名 岑潔儀 ，Zoey）堅持餵母乳至囝囝一歲多，以上痛楚她也一一經歷過。從無奶到奶量僅僅夠，再透過多埋身、多食飯上奶；得不到陪月及長輩的支持，令她開始質疑自己應否放棄。最心痛是出外餵母乳所受過的白眼，在香港一個文明社會，仍有很多無知愚民投以歧視目光，試過飲茶被鄰桌茶客鬧餵奶核突，連五星級大酒店也催趕入廁所餵，「你會唔會入廁所食飯？點解BB要去廁所食？」」這段歷時15個月的餵母乳經歷，教Zoey 畢生難忘。
撰文：Ling
攝影：Killy Sung（部分相片由受訪者提供）
化妝及髮型：Hazi Leung
場地：What Cheers Studio（tel: 2332 0330）
曾以為餵母乳是easy job
餵母乳的媽咪若有同路人支持，就更有決心餵下去。Zoey懷孕時，身邊的朋友也是母乳媽媽，BB亦好健康，令Zoey早已決心餵母乳。
懷孕前她以為餵母乳是easy job，BB出世後即把說話收番，「原來餵母乳係極辛苦、極累嘅一件事！食母乳嘅BB好易肚餓，初時隔個幾兩個鐘就要飲奶，自己又有好多地方唔明，究竟佢係咪食唔飽？定係我啲奶唔夠營養？係咪我有問題？第一個月有好多疑問。」
奶量僅僅夠 險患抑鬱
Zoey坦言險些患上產後抑鬱，心裏有太多問號，而且開刀的傷口仍未復原，坐月期間又不能洗頭，食得又清淡，整個人變得鬱悶。Zoey記得自己第三日上奶，但奶量較少，形容自己是一個「窮媽媽」，「其實由頭到尾我啲奶只係啱啱夠，從來都唔係『富媽媽』，我只係『窮媽媽』，個感覺好挫敗，點解人哋多到放滿雪櫃，自己就僅僅夠，今餐食完又擔心下一餐有冇。」
陪月頻勸轉奶粉 壓力加重
因為奶量不多，令Zoey感到壓力，加上身邊的陪月、老爺、奶奶都勸她轉奶粉， 得不到支持的感覺很難受。「因為呢個陪月我喊咗最少三、四次，人哋話坐月喊嘅每滴眼淚都非常重要，每喊一滴就代表傷一次眼。」
找個新陪月不容易，而且仍需要她煲湯補身，故默默忍受了一段時間。幸好得到老公出聲支持，叫陪月應該支持她，「既然佢選擇餵母乳，你不如支持佢啦，唔好再話佢唔夠奶叫佢補奶粉。」陪月不再出聲，老公亦開解勸告盡力就好，Zoey開始放鬆心情，「如果真係冇就餵奶粉，其實我自己都係食奶粉長大，算啦，放鬆啲，盡咗力就得。」
全埋身 減追奶壓力
有幸做到全職媽咪的Zoey，第二個月選擇全埋身，餵母乳之路開始順利。「之前泵奶會睇到奶量，成日諗住要追奶，全埋身冇得睇奶量唔使追，BB一肚餓喊，就抱BB埋嚟食，少咗追奶嘅壓力，個人放鬆都餵得順利咗。」
為幫助上奶，Zoey每日飲大量清水、湯水、炒米茶及多食飯，「每人體質唔同，我自己要食好多飯，每次我碗飯都大過男人，加上勁大碗上奶湯，好似花生眉豆雞腳湯、豬腳湯、木瓜魚湯，次次食完飯都好上奶！」Zoey的工人姐姐也曾是母乳媽媽，沒有湯水，她們就飲大量清水，奶量一樣源源不絕。
奶量過多未必是一件好事，最令母乳媽媽痛不欲生可能是乳腺炎，因奶量多塞乳腺，胸部硬過石頭，更有針扎般的刺痛，Zoey亦差點患上。「我有次出街前冇泵奶，亦冇俾佢飲過，一路谷咗四個鐘，谷到石頭胸，筋都現晒，仲漏奶出嚟，所以我建議大家一定要用乳墊，否則整到件衫濕晒就好尷尬。」當谷奶至石頭胸時，她會用熱毛巾由胳肋底向胸部按摩紓緩，邊按邊泵奶，或者再用些cream，以免擦損皮膚。
茶客鬧餵奶 酒店催入廁所
谷奶痛是身痛，受歧視則最心痛。Zoey最記得一次去飲茶，被鄰枱的茶客出言侮辱，「大約BB三、四個月，我帶BB去飲茶，枱與枱之間比較迫，BB肚餓我就用餵奶巾包住餵佢，我feel到隔籬枱一對40幾歲嘅夫婦用奇怪眼神望住我，咁我都冇理繼續餵，到佢哋走就行去我前面話我：『好心你啦咁核突，入廁所餵啦！』嘩！我都冇做錯乜嘢得罪你！只係我BB肚餓餵佢飲奶啫，其實你可以唔望我，唔使用呢啲眼神，仲要走埋嚟話我，嗰刻我真係好hurt！」
她不只一次被要求入廁所餵奶，連中環一間五星級酒店也是如此。「我喺間酒店飲茶，問侍應有冇餵奶房，佢拋下一句：『Sorry我哋冇呀，你入廁所啦。』我再問可唔可以開間房俾我，15分鐘就搞掂，佢哋都話唔可以。我叫佢搵經理出嚟傾，個經理都係拒絕，仲話佢哋個廁所都幾大，可以坐廁所張梳化餵，我真係好嬲！一間五星級大酒店都唔支持母乳，連一間餵奶房都冇！」
被批評炫富:我冇諗咁複雜
Zoey自結識富商老公Dixon之後，一直如公主般受寵愛， 生下囝囝即把自己放在後面，單是餵母乳已承受很多白眼，但為了兒子健康成長，她也一一捱過，足足餵了15個月。她更為囝囝改了乳名「小老闆」，「佢係我嘅老闆，我要服侍佢，哈哈。」
至於「大老闆」老公給予Zoey一個幸福的家，令她可以專心做全職媽媽，並打理自家珠寶生意。自小單親家庭長大的她，原本是TVB不起眼的藝員，跳槽HKTV以為有新氣象，拍了兩套劇集之後，最後亦因為無牌結束賓主關係，索性做全職媽媽。Zoey坦言現在好幸福，在人生最低落的時期遇到現任老公，「上天真係待我不薄，佢俾我好多愛。由細到大我都缺乏愛，因為單親家庭長大嘅小朋友冇乜安全感，依家有個完整家庭令我母愛氾濫！」Zoey曾被批評愛炫富，結婚前老公送豪宅，又放上網晒命，「我老公係好錫我，咩都俾晒我，所以佢冇錢㗎，哈哈！我係鍾意靚嘢，買咗靚嘢好開心先share出嚟，我冇諗到咁複雜話要炫富，啲人唔鍾意可以唔睇。」
客家人傳統 要對抗縱容
嫁入豪門亦非生活從此無憂，老公一家是客家人，堅持在家講客家話以保留傳統，一代傳一代，Zoey和囝囝亦要學習客家話，「佢哋覺得依家愈來愈少人識講呢啲話，如果再唔教，下一代就會冇咗㗎喇。老公依家教緊囝囝客家話，我就識聽唔太識講，佢哋平時溝通食飯都講，我一定要識，唔係俾人講壞話都唔知呀。」
傳統家庭都比較大男人，Zoey笑指老公也一樣，連囝囝的樣子和性格都遺傳了，「個樣係百分百似我老公！性格都睇到佢大男人，佢想你同佢睇書，拎住本書俾你就一定做；我同佢錫錫，佢就一定要錫埋爸爸，再推我哋個頭一齊錫，都係一個霸道嘅表現，但呢樣就好sweet嘅。」
有大男人的性格未嘗不可，責任心會較重，Zoey也希望囝囝做個男子漢，將來好好養家，但要先過老公和老爺奶奶一關。「客家人當男仔係金叵羅，老公係想將最好嘅留晒俾佢，等佢將來唔使點做，因為佢自己做得辛苦，唔想個仔都咁辛苦。呢方面我同佢有分歧，我一定唔可以俾佢哋縱容佢，我自己唔係富裕家庭長大，細個都好艱辛，所以自己性格比較tough，男仔更加要捱得苦，唔係將來點成家立室？無人可以幫到你，我哋可以做嘅就係供書教學，長大後一定要靠自己，條路自己揀。」
參考資料：衛生處網頁
