懷孕媽媽選擇護膚品及化妝品須知
撰文、圖片：和牛b的成長日記|編輯：TLY
孕媽媽選擇護膚品、化妝品須知
如果孕婦用咗含有化學成分、重金屬等有害物質嘅化妝品或者護膚品，係會影響BB正常發育。因為BB係透過胎盤從母體獲取營養，而化妝品、護膚品上嘅微細分子物質都能夠通過胎盤進入胎兒體內。如果成分係有害，就會影響BB嘅發育㗎啦！
所以孕婦要選化妝品、護膚品嘅話，都係要選擇返純天然成分。孕婦選擇護膚品，最好選擇無添加酒精、染料、礦物油、激素、重金屬、凡士林、丙二醇、異丙醇、石蠟等
而重點要留意，產品一定唔可以含有以下成分；
1、維A類成分
2、水楊酸 Salicylic acid (通常用於祛痘類嘅護膚品中)
3、過氧化苯甲醯 Benzoyl peroxide (通常用於祛痘類嘅護膚品中)
4、AHA (即果酸，通常用於去角質嘅護膚品)
另外，陀B期間都唔適宜用具有美白、祛痘、祛斑功效嘅護膚品了。
所以，孕媽媽要留意清楚護膚品成分先使用呀！唔好聽人講話好用就馬上使用呀。
同類文章
懷孕一胎 VS 二胎大不同
幾年後，我又再度懷孕了。陀和牛B嘅時候同二寶嘅發現時間都好相近，當年都係大概5週左右就發現有咗BB。陀和牛B嘅時候除咗因為經期遲咗，就係我飲凍嘢、追車個小腹有少少痛，之後我先驗。二寶就純粹係經期遲，不過自己有預料到生二寶。所以，好快就驗一驗。
我仲記得以前陀第一胎(和牛B)，我成個孕期都超級舒服。由懷孕初期，已經係好舒服，完全沒有孕吐，步速、胃口同平時一樣。只係懷孕初期超易攰，其他地方根本同正常人一樣無分別。但今胎可能我伴隨住生病。
懷孕初期有孕吐感
7週前我除咗有強烈嘅孕吐感、無胃口 (我直情有啲驚食物)、好驚雞蛋(聽到、望到都好想嘔)、長期覺得疲憊。唯有飲滴雞精補充營養吧！
7週後，我開始有返胃口，食到嘢。但夜晚時份，瞓覺就唔多舒服。打平瞓又唔得，打側身瞓又唔得⋯⋯總之唔識講，總之瞓得唔好啦。今胎，除咗有老公照顧我，仲有和牛B照顧我。和牛B超乖，知道要做姐姐，佢開心到不得了。佢係極之關懷我，就算好想去玩，但知道我攰或者唔舒服。佢都唔會扭計，會乖乖留喺屋企玩玩具，好讓我可以同BB一齊休息下。
作為媽媽，我真係好安慰。4歲嘅和牛B，已經超懂事。
面對Terrible3 媽媽最常忍不了口嘅說話
當小朋友進入兩歲茶煲二之後，小朋友就經常挑戰大人嘅底線。以為順利渡過Trouble 2（茶煲二）之後，可以鬆一口氣…原來Terrible3（茶煲三）嘅細路會將行動升級⋯⋯除咗行為、動作都會不停挑戰大人底線。作為父母嘅你，呢場育兒持久耐力戰，你還守得住嗎??
面對 Terrible3 媽媽最常忍不了口嘅說話
我實在守不住了，所以我經常講咗以下嘅說話；
「行快啲啦！」
「我數三聲，你好即刻同我…！」
「你好即刻同我…」
「我叫你好停啦吓！」
大叫「小朋友全名」N次…
又或者係，我改不了口嘅「唔好乜乜乜」。
「坐定啲啦，唔好再郁！」
「你可唔可以唔好咁曳！」
「你可唔可以乖啲呀！」
「你唔好再…！」
「點解叫極你都唔聽我講嘢，你要我講幾多次？」
其實，之前睇過唔少文章，都建議家長盡量講「不如你…乜乜」取代「你唔好…乜乜」。
但我發現已經進入癲狂狀態嘅父母，要好冷靜咁講「不如你…乜乜」代替「你唔好…乜乜」，真係好有難度。
或者咁，下次見到小朋友叫極都唔停。唯有大大力深吸呼，停一停，諗一諗先再開口啦。
父母共勉之，一齊努力！
參考資料：衛生處網頁
