產後發燒被遺產房2小時 公院生仔5日「地獄」生活 分分鐘死喺床
撰文、圖片：詩寧
產後發燒被遺產房2小時
原文：
終於生完BB，痛完可以休息下？
生完 將軍 之後，個醫生聯針錯完一次又一次，聯到第三次佢終於完成，我雙腳舉高咗幾個鐘亦終於可以放返落嚟。當時發緊高燒嘅我用盡全身力氣問醫生：「可唔可以比杯水我呀？唔該。」
佢話好，轉頭叫姑娘拎比我。結果⋯⋯我一等，就等咗兩個鐘⋯⋯唔好忘記，嗰兩個鐘我身上只穿著紫袍、沒有衣服的、人在發燒，漫長的兩個鐘，產房好凍、生完仔流失咗好多好多血，我覺得自己已經凍到似一條死屍，真心的，我當時覺得自己會慢慢的死去⋯⋯
點解唔叫救命？陣痛51小時再加生完仔，我真係零力氣了⋯⋯生過BB的媽媽會懂。
差唔多天光，掃地阿姐入嚟掃地，驚見我就死咁瞓喺度打冷震，問我：「你喺度做咩呀？」
我心諗，你覺得呢？我答：「無人⋯⋯水⋯⋯」
好彩佢醒，咁都明我講咩，佢大驚：「下！佢哋唔記得咗你呀？我幫你叫人嚟。」
跟住好快就有個護士好驚咁衝入嚟推我出去，仲比咗個電話我打比老公報平安，老公好擔心問我有無事，佢話佢有問護士點解咁耐都未出返去，護士答佢我聯緊針，一直都聯緊針⋯⋯（痴線，聯咗4個鐘?!）
產後BB發燒 媽媽一眼都無見過
因為我發燒，所以將軍一出世都被我傳染了，佢都發燒，我無望到佢一眼，佢就比人推咗去BB病房，之前幻想一生完要一家三口合照、BB會瞓喺我心口⋯⋯全部都無，我連自己個仔咩樣都唔知。
又等咗一個鐘，產後病房終於有位收留我，由於將軍唔係跟喺我身邊，所以我被安排於全房最窄嗰個床位，窄到點？窄到有人嚟探我係唔能夠企我隔離，只可以企床尾；窄到連放食物嗰張檯都推唔到埋嚟，我食嘢要捧住食，醫生埋嚟寫報告都要成份托住寫，有醫生因為無位放低份嘢而發脾氣。
在產後病房 要自行著M巾換衫
入到產後病房，個阿姐幫我過床之後就走咗，我繼續好凍同發燒，啲血係咁流出嚟，我隻手打咗豆但條死人喉又唔夠長，我伸唔到手去按鐘叫人比水我，只能夠好細聲咁叫救命、救命⋯⋯對面床個媽媽見我好慘就埋嚟問我咩事。
我：「我岩岩生完，而家應該點？」
佢：「下，你衫都未著喎，你著返M巾換返衫先啦。」之後佢就返咗自己床湊BB。
詳情我唔寫喇，總之我一邊喊一邊好困難咁幫自己著返啲衫褲，足足著咗一個鐘頭（都話打豆條死人喉唔夠長，我有一隻手郁唔到）！真正天光喇～護士們好忙咁喺度派藥、屌7其他阿媽唔餵人奶、踢啲人出院之類。而琴晚推我入產後房個阿姐埋嚟見到我，佢大叫：「哎呀！對唔住呀10號床媽媽！！我琴晚太忙唔記得幫你著返衫，哎呀！你自己著M巾呀？你點著到呀？你咁西利嘅生完都有力自己著。」呢個時候，我先知原來生完BB係有人會幫我著M巾同著衫嘅？！
我內心滿是粗口，但個口講咗更重要嘅嘢：「我想飲水呀唔該。」（仲記得嗎？我聯完針已經話想飲水，但你睇咗成千字我都未飲到啖水呀）
無畀水飲 焗插尿喉！
阿姐：「哎呀！對唔住呀10號床媽媽！我而家即刻比水你飲，你要全部飲哂呀！因為你一陣要屙尿，屙唔到要插尿喉架！」佢比咗壺水我，連飲幾杯之後舒服咗啲。先岩岩擺低個杯心諗終於可以瞓啦？我大約60個鐘無瞓過喇。點知就有個勁惡肥護士埋嚟睇睇我排板然後又大叫：「喂你仲未屙尿？琴晚到而家喎！唔得呀，你要插尿喉！」
我即刻喊出嚟：「唔係呀，我無飲過水呀。」
佢望一望見到有壺水喺度：「你講大話，呢度咪有水囉，做乜唔飲呀！點會唔飲呀！唔得呀，你屙唔到尿無得出院㗎，要插尿喉！」
呢個時候我諗起監獄風雲個魯芬喺度屈其他囚犯咁。
我：「壺水岩岩先拎嚟架，你啲同事琴晚唔記得比我呀，你比多少少時間我啦，我屙到架。」（喊到仆街）
佢好不爽咁話比多半個鐘我。
我真係好驚，個傷口本身就好痛，仲插喉？我同自己講，我一定要屙到、點都要屙到，但原來生完BB要屙篤尿都唔係咁簡單，由於我唔夠力坐起身，只能夠瞓喺度屙，係囉，瞓喺度點屙呢？所以半個鐘後都係屙唔到，我驚到自己倒咗啲水落個兜，希望呃到「魯芬」。
魯芬：「點呀，屙到未？」
我：「屙咗少少。」（勁心虛）
魯芬：「你呢啲邊係尿呀？！！惡露嚟咋嘛！」
最後，我輸咗。
然後到探病時間，60幾個鐘無瞓呀，我繼續死屍咁攤喺度郁唔到，家人幫我抹身、換衫，見到我成床血就叫姐姐幫我換床單，結果又比人屌：
「嘩你搞乜搞到成床都係血呀，咁污槽你琴晚唔出聲？」成床血就係因為你同事琴晚遺忘咗我囉⋯⋯
到夜晚我以為捱過70、80個鐘終於可以瞓喇卦？點知瞓瞓下，隔離床突然好熱鬧！有四個女人好開心咁傾傾傾，我比佢哋啲笑聲嘈醒咗，DKLM原來隔離床係該醫院嘅護士，探佢嗰啲係同醫院嘅同事，所以有特權可以半夜三點探病！佢哋傾得好興奮，我醒咗之後見到其他床都陸續開燈，然後啲BB又喊，一個喊、全部喊！ Oops，我好似未話你知，我間病房係30人大房呀！29個BB一齊喊，你想像到個聲浪嗎？
因為太辛苦，我又喊咗一晚⋯⋯
無人幫 瞓喺度食產後第一餐
終於等到第2日，早餐係麥皮，大約80、90個鐘無瞓過我好暈坐唔到起身，我哀求送早餐嗰個阿姐幫我較直張床（人手轉轉轉嗰種），
「唔該可唔可以幫我較直張床呀？我坐唔到起身食嘢呀，唔該你。」如果可以跪，我可能跪咗喺度求佢，我真係好肚餓好需要嗰碗麥皮！！！點知佢眼尾不屑地望望我就走咗，佢連Say No都沒有，直接轉身走咗。
點算呀？唯有瞓喺度飲落肚囉，真係好肚餓呀！二戰嗰時，我阿爺食樹皮都係咁啦！瞓喺度食麥皮有咩咁奇呀？！
點知飲完唔夠半分鐘，我立即就反胃嘔返出嚟，第一下嘔咗落地，之後已經好快手用膠袋接住，嘔完之後，我按鐘叫姐姐嚟幫手，佢一行嚟就屌：
「嘩！乜嘔到周圍都係呀！」（我發誓並無周圍都係，只係得少少喺地）
我無出聲，交咗袋嘢比佢，佢繼續屌屌屌⋯⋯我終於忍唔住：「我想嘔架？你估嘔唔辛苦呀？係你唔肯幫我較直張床，我被迫瞓低食先搞到嘔架！」之後佢就收咗聲。我當時覺得自己好蠢，原來要還拖，點解我之前係咁唔該前、唔該後呢？原來惡先有用。
到夜晚出院，嘩！終於可以離開地獄喇！！！點知魯芬又出嚟，話我因為一直都係插住尿喉，出院前要確保我屙到尿先放我，咩話？如果屙唔到就要住多晚？我即刻勁驚，我要走，我一定要走！雖然我好暈同傷口超痛，唔係幾行到路，我媽拖住我，慢慢行入廁所，等咗好耐⋯⋯屙唔出，一來係因為傷口痛，我唔敢用力，二來係⋯⋯條喉插咗一日一夜，有咩都放晒啦，仲邊有得屙⋯⋯但我真係唔可以再留喺地獄多一日，唯有求阿媽幫我出貓，佢初初唔肯，因為佢都驚我屙唔到係身體有事，夾硬出院好危險，但我覺得再唔出院會更危險，分分鐘死咗喺床都無人知。喊喊喊，最後喊到佢心軟了。
返到屋企，嘩我個身臭到不得了，立即沖涼洗頭然後極速瞓著。
就係咁，我產前產後一共喺公立地獄過咗5日，百幾個鐘無瞓過，而將軍BB呢？仲要住多幾日先出院，而當我探佢嘅時候，發現佢並不比我好過啊⋯⋯
參考資料：衛生處網頁
