索媽 陳爽 懷孕保養之道
Sherry 做人媽媽後，被大讚愈來愈靚，她笑言有小朋友後令她心情開朗，今次陀女亦因享受湊仔樂，令她今次懷孕的心情更放鬆。加上全家做海味生意，對進補有一定心得，懷孕期間有吃小量花膠、海參及燕窩等補品，助她keep 住靚。
撰文: Ling
攝影: Killy Sung（部分相片由受訪者提供）
化妝: King Yip@KINGS MAKEUP
髮型: Frankie Tang@KINGS MAKEUP
服裝: Mayarya
場地: MioXpace（tel: 9711 9533）
生仔個肚尖 生女圓渾
Sherry今胎陀女，比上次的肚形圓渾，果然睇得出生仔生女，「上次生仔個肚明顯凸出嚟尖啲，但從後睇仲見到腰，但今次陀女好似成嚿嘢，條腰都粗咗好多。」雖然條腰睇落無上次咁fit，但她覺得今次比上次陀得舒服，孕吐只有兩三次，「成日都唔記得自己懷孕，哈哈！」主要是囝囝Adrian令她分心，為了照顧他，有時忘記了自己的需要，而且第二次懷孕的心情放鬆許多，「我冇第一胎咁緊張，成日要去做運動、做按摩，上次懷孕心情好期待，第一次做媽咪要做好多功課；今次心情比較實際，睇吓有咩需要買，亦知道有咩一定要買、要布置啲咩嘢，所以輕鬆好多。」
2歲仔仍渴望做BB
她透露細女已取名Ashley，中文名交由長輩起，「我同老公睇咗好多書參考，最後覺得Ashley個名好聽，個字有上有下，簽名會幾靚。」兩夫婦正慢慢教導Adrian做哥哥，兄妹要相親相愛，「佢依家成日摸我個肚，我有揭開俾佢睇，俾佢錫吓。開頭我哋講好多關於小BB、哥哥要照顧弟妹嘅書佢聽，佢都明白嘅，但有時佢會自己想做番小BB，自己用被包住自己要人抱，我諗佢心入面仲係一個小BB。」Sherry的預產期在農曆新年，到時一定利是逗來！
已懷孕七個多月的她，孕期開始進入大直路，最近一個月肚皮急速脹大，但她天生麗質，長胎不長肉，體重至今僅重了約6公斤，而上胎總共重了13公斤，她希望可以保持着。她的keep fit心得除了控制飲食之外，更須配以適量運動，她建議孕媽媽多游泳及做孕婦瑜伽，「尤其係第一胎想順產嘅媽咪，孕婦瑜伽可以幫助呼吸，順產嗰陣會容易啲。」
花膠海參 零膽固醇零脂肪
飲食方面她戒掉海鮮、魚生，其餘飲食如常，因平日她的飲食習慣多菜多生果，另加小量海味進補。「我屋企做海味生意，成日食啲肥肚唔肥人嘅嘢，例如花膠、海參，呢兩樣係零膽固醇同零脂肪，對BB腦部發展好好，媽咪食咗都唔使擔心會肥。」她指花膠最啱一家大細，既可鋸花膠扒，又可煲湯，含豐富骨膠原，而且花膠種類多，有幫助懷孕、谷奶等等，可以選擇適合自己及家人所需。
Sherry最令人艷羨是白滑肌膚，她透露每日靠食小量燕窩，因當中含豐富膠原蛋白，「坐完月後食多咗燕窩，真係覺得皮膚質素有好大改善，同埋坐月吸收得好，膚質都改變咗，直到依家都仲有食。」連Adrian都識貨，每日求燕窩做早餐，「佢每朝都同我搶燕窩食，俾佢食少少，我食嗰啲嘢佢都有興趣。」
她指燕窩含小量激素，但看過一些研究後，發現牛和鴨等肉類亦含激素，總之不要食過量就好。「唔好每日成碗咁食，我只係食一湯匙左右，唔會有咩影響，我見奶奶同老公嘅婆婆，到咗七八十歲塊面同手仲係滑嘟嘟，原來佢哋自後生開始食燕窩，我希望到時我都可以keep得咁好。」
Sherry提醒其他孕媽媽不要太急切進補，坐月才是大補之時，懷孕只是溫補，「即係慢慢小量食，我都聽過有人食得太多花膠唔舒服想嘔，所以食少少就好，一覺得唔舒服就要減量。」
忍痛堅持順產
Sherry上次是順產，回想十多小時的陣痛也有點害怕，但她希望今次依舊順產，因順產復元較快，對BB的健康亦較好。「我怕痛㗎……上次朝早六點幾開始陣痛，直到第二日凌晨1點幾先生到，冇諗過順產原來咁痛……由呢一刻開始體驗到媽咪真係好偉大，希望今次冇咁耐，可以快啲生到。」
上次生仔有段小插曲，Adrian是2014年10月出世，當時正值「佔中」，「我係星期六夜晚生，當時麻醉科醫生趕過嚟遇到塞車，我就白白痛多一個鐘……希望今次順順利利，天下太平。」
簡易白花膠湯
做法： 白花膠隔一晚浸泡，將浸泡後的紅棗去核，與杞子、元貝、瘦肉放入燉盅內，加入適量水燉兩小時即成。
功效： 白花膠對孕婦產前進補，手術創傷病患癒後調理尤有功效，男女老少都宜進食，蛋白質和膠質能令細胞重生，令肌膚回復彈性，有助皮膚癒合，保持青春，又有滋陰養血，固本培元的功效，有助人體迅速消除疲勞，加速傷口康復。而且花膠長胎不長肉，白花膠更是所有花膠中最易入口，少腥味的一種。
普通話發音最性感
訪問當日Sherry與Adrian以普通話溝通，語調溫柔，喜歡靚女的Adrian特別受落。Sherry笑言囝囝好喜歡她的一班華姐閨密，當中最冧朱璇姐姐，因為朱璇與他最玩得！
家鄉在哈爾濱的Sherry母語是普通話，與囝囝都以普通話溝通，老公講英文，爺爺嫲嫲講廣東話，令囝囝自小學好兩文三語。但爺爺嫲嫲並非同住，故囝囝現階段的英普能力較佳。Sherry不怕囝囝的廣東話差，始終在香港生活，隨着生活圈子擴大、返學讀書後，廣東話自然有進步。「佢依家接收到廣東話，佢係聽得明，只係講嗰陣冇國語咁流利。」
眾多語言之中，Sherry覺得普通話最好聽，發音好性感，「廣東話比較直接坦率，國語比較溫柔啲，講文言仲溫和，講完個人都平心靜氣咗。」一臉慈母的她未試過鬧仔，兩年來囝囝都很乖巧，是個肯聽道理的小朋友，她用國語講道理更顯得母愛溫柔。「始終佢仲細個，道理佢未必明晒，但一路同佢講番成件事，佢都接受到。」
無懼細B輸蝕
Adrian剛於10月度過2歲生日，身為細B的他，最近找學校遇到不少困難，報PN班有好多學校唔收細B。「好彩最後都搵到一間心儀嘅學校收佢，依家讀得好開心，個人定咗好多。呢排我同佢考K1實戰，啲大B真係高佢半個頭，成熟好多，但我相信呢啲小朋友個差距會愈來愈近，唔需要比較咁多，依家開心快樂最緊要，老師自然會就小朋友進度作出教學調節。」
Sherry重視兩文三語溝通，中文閱寫能力也同等重要，必須聽說讀寫打好中文底，故她希望先安排囝囝入讀傳統學校，將來才考慮出國讀書，最好能入到老公的母校St. Joseph，自畢業後老公對學校仍有好大歸屬感。但不怕傳統學校功課壓力大嗎？「我唔知幾難呀，可能到時我會癲咗，但我都想試吓。」
參考資料：衛生處網頁
