甜心爺爺 劉丹 ：孫女係happy girl

編輯：Fiona Fong
圖片：新傳媒資料室
(內容節錄自986期東方新地)

劉丹 為孫女搬屋

早前 劉丹 全家搬屋，一來是因為校網，二來希望孫女有自己一間房。「佢都係時候要自己一間房，依家嗰度大啲、多間房。」

小糯米似公關　周圍同同學打招呼

問到孫女性格，丹爺笑說：「佢好奇怪，佢返學，一入到學校門口，主動同小朋友打招呼，同學仔啲名佢記得晒，周圍打招呼，好似做公關咁，見到鍾意嘅老師，自己走埋去拖，老師名又係記得晒，佢有個好處，就係成日笑，我同個仔都係鍾意笑，可能係遺傳到我哋啲基因，學校啲老師都話佢係『Happy Girl』，哈哈！」

孫女又有無遺傳到丹爺嘅演藝細胞呢？

丹爺笑說：「通常佢曳係我扮衰人，我會扮惡叫佢個名，有時我問佢爺爺做咩發脾氣，佢會扮番我發惡個樣，好多古靈精怪嘢，好好玩！」不過丹爺就唔係好想孫女成日曝光，所以好少帶孫女出街，返學、去街都係嫲嫲帶多，因為一見到丹爺就知道到佢係小糯米啦！

點睇對新抱楊冪的負面評價？

外界常傳出對楊冪的負面評價，丹爺一於少理！「通常我新抱同仔，睇到嗰啲新聞，就會話：『唔好理佢，愈理，愈多嘢寫，沒完沒了；唔理佢，反而慢慢靜咗冇事。』總之係唔係，自己知，怕咩人講，我哋全家人都採取呢種態度。」

丹爺仲大讚新抱「唔計較」：「問佢有冇睇負面報道，佢會話『不要理他！』一味喺度唸經，佢自己有個神壇，帶住去劇組周圍去，去到邊都唸經，揸住佛珠唸，一個咁虔誠嘅佛教徒，會衰得去邊？」

同阿仔、新抱多唔多見面？

原來呢排丹爺新抱同阿仔拍不同組嘅戲，「我個仔依家喺新疆，新抱依家喺北京，有時兩個夾啱一齊返嚟，有時邊個得閒就邊個返嚟，有次試過個仔上晝走，下晝新抱返嚟，佢哋有三幾日得閒，都飛返嚟睇個女，日日都視像通訊，初初孫女覺得好新奇，依家鏡頭對住都唔理，自己玩自己嘅嘢，哈哈！」

屢傳愷威同楊冪夫妻感情有問題，丹爺點睇？

丹爺就話眼見唔覺有問題，「只不過喺唔同地方拍戲，有時佢哋得閒都會喺北京碰頭，總之我哋自己屋企知道咩事就得。」

盛傳愷威楊冪整容，丹爺反擊！

丹爺反擊之餘，仲拎埋楊冪3歲嘅樣出記者睇，力證佢無整容！「同依家差唔多，都係鼻高高、眼大大，佢冇理由3歲走去整容，冇可能吖嘛！劉愷威嗰時有啲baby fat，年紀大咗，baby fat梗係冇鬼咗㗎啦，同埋佢後期真係搏命操，佢去邊度拍戲都帶埋做運動嘅架生去，有時又會跑步，佢又減得好快，有時一部戲完咗，休息幾日食到肥咗啲，過兩日開戲，跑番步佢又keep得番。」