婆媳關係係惡性循環？惡奶奶是這樣鍊成的
廣告
有人話「世界上最難相處嘅關係」，一定就係「婆媳關係」，做咗人妻嘅，應該好大部份都會大力點頭啦！雖然話大好嘅家庭關係，係建基於互相尊重，但係應該要點做先得呢？ 人氣專頁「診所低奇觀」嘅作者珍寶豬，就撰文紀錄咗兩個奶奶喺診所嘅對話，睇完真心覺得好大對比呀！唔通有咁惡嘅奶奶，先會再成就另一個惡奶奶？
原文：珍寶豬@診所低能奇觀 （文章得作者授權轉載）圖片：myTV截圖、燦媽寶典
原文如下：
有日兩位姨姨一齊嚟到睇醫生～
等睇醫生時，佢哋開始傾計。
A姨姨問B姨姨：「點呀，你個新抱點呀？」
B：「做咩無啦啦問起我新抱呀？」
A：「冇～～我聽阿C講你新抱成日喺邊度蒲咋嘛，好似唔痴家咁啫，怕佢激死你呀！」
B：「哦～冇激死我冇激死我」
A：「新抱要教㗎！唔可以俾佢三分顏色上大紅㗎！想當年我奶奶都係日日鬧我㗎咋！」
B：「唔駛啦，啲細路有自己世界㗎啦」
A：「咩你咁話呀？你唔出聲佢哋當你死㗎，唔聲唔聲坐埋你個位呀，一定要鬧㗎！得閒咪鬧囉，俾佢知道你大過佢，你係奶奶呀嘛！」
B嘆咗啖氣：「以前你奶奶喺度，你做人新抱開唔開心呀？」
A：「我奶奶死咗之後就一天都光晒囉！」
B：「咁咪係囉，你而家做返你奶奶以前做過嘅嘢，你新抱咪又係望你快啲死」
A：「佢邊敢呀？」
B：「啲細路自己開心咪得囉，我哋做阿媽嘅都係想個仔開心啫，搞到家嘈屋閉有咩謂呀，繼我話個新抱肯好好照顧我個仔我個孫，我多謝佢都嚟唔切啦！」
A：「我就真係做唔到你咁啦！」
有個好奶奶真係幾生修到…
