【產後調理】花膠螺頭燉瘦肉湯 補腰膝暖身
廣告
其實自小JM出世之後我條腰都時好時壞,有時抱完熟睡嘅小JM後,成個人就更加係散晒。做媽媽嘅都係忙忙忙同忙多,顧得小朋友來又往往忽略咗自己。而今次呢個湯水除咗啱媽媽們飲之餘,其實都好啱一家大細飲,補而不膩!
1.花膠螺頭燉瘦肉湯
呢個燉湯除咗滋補肝腎、養陰潤燥之餘,仲對腰膝酸軟,手腳冰冷及水腫嘅人任好啱飲,尤其適合孕媽咪產後調理。以瘦肉清燉及預先汆水,可減少燉湯嘅油份喔 !燉湯亦比較清甜濃郁,所以唔加蜜棗及鹽都一樣夠味。
![【產後調理】補腰膝暖身 花膠螺頭燉瘦肉湯](https://imgs.sundaykiss.com/wp-content/uploads/2019/01/nhv4dxh3MJN7gxp/1_17444686745c2cc26179d7f.jpg)
花膠螺頭燉瘦肉湯材料
材料 | 份量 |
花膠 | 1~2個 |
螺頭 | 2個 |
瘦肉 | 一件 |
桂圓 | 適量 |
小冬菇 | 6-8粒 |
薑片 | 2片 |
花膠螺頭燉瘦肉湯做法
- 將瘦肉及螺頭洗淨,再汆水數分鐘,備用。
- 桂圓及小冬菇需要洗淨再稍為浸一下。
- 已預先發好嘅花膠切成小片,備用。
- 將已汆水嘅螺頭切成片狀,備用。
- 慢慢將材料鋪係燉盅之內,先將已切好嘅瘦肉及螺頭放於底層。
- 再將花膠及薑片放入。
- 最後將桂圓及小冬菇放入,並加入水至八分滿,即可準備燉。
- 以精華燉模式燉三小時即成。
2.雙蓮百合桂圓燉湯
為咗令小JM訓得好啲,全家嘅睡眠質素又可以得以提升,我決定燉個預防失眠嘅安神湯畀家人飲!其實媽媽我都好需要飲,因為小JM一個瞓得唔好,就連大家都瞓得唔好,呢啲都係連帶關係來嘅。蓮子有助打電壓、安養心神、改善失眠及抗氧化;蓮藕有助清熱、健脾開胃,產後進食亦有助止血去瘀;鮮百合具清心安神、潤肺補氣、清熱止咳之餘仲有養顏嘅功效; 桂圓肉能安眠、補血,而且有改善心血管循環效用。
雙蓮百合桂圓燉湯材料
材料 | 份量 |
蓮子 | 隨心 |
蓮藕 | 隨心 |
鮮百合 | 隨心 |
桂圓肉 | 隨心 |
瘦肉 | 隨心 |
雙蓮百合桂圓燉湯做法
- 將新鮮嘅蓮藕洗淨,切成條片或小片,備用。
- 蓮子、鮮百合及桂圓肉用水稍作浸泡以除去雜質。
- 瘦肉切成小件,並汆水備用。
- 將全部材料慢慢放入燉盅之內。
- 再加3~4碗水入燉盅內,並蓋好。
- 燉盅膽注入適當水量後即可開始燉湯。
- 待湯燉好即可飲用。飲用前亦可按喜好加入鹽調味。
撰文:傑。斯與晴圖片來源:傑。斯與晴