《 紀念日 》超好戲童星大起底
面圓圓、眼大大嘅雪兒，今年只係得5歲，因為早前拍咗個維多C廣告，就畀人封咗做維多C妹妹，其實喺電視、廣告、宣傳活動同報章雜誌，幾乎度度都見到佢！我哋SundayKiss雜誌都成日搵佢影硬照架！
電影方面，原來除咗 紀念日 ，雪兒都拍過幾套電影，包括寒戰2、賭城風雲3、綁架七日情，但今次 紀念日 就特別重戲份，而且只係得佢一個童星，小編就同佢媽咪傾過，點解雪兒可以從中脫穎而出，得到導演葉念琛賞識呢？
下頁：casting內幕
雪兒媽咪話當初係透過Agent接洽，未去正式casting前，需要send一段由冇喊到喊嘅video俾電影公司，佢哋再從中篩選適合嘅小朋友嚟casting，雖然唔知實際數目有幾多，但雪兒媽咪話由於小朋友呢個角色好重戲份，加上係揀一個，所以電影公司方面都揀咗好耐，喺casting嘅時候，雪兒都要即場喊多次，之後就返屋企等消息。
後來Agent再whatsapp雪兒媽咪，要求佢拍多條雪兒喊得好慘豬豬嘅片，「當時我同雪兒做緊另一單job，收工之後我就搵咗間靜靜哋嘅育嬰室，叫雪兒諗下啲唔開心嘅事，又問佢記唔記得之前喺迪士尼度唔見咗媽咪，一邊講一邊等佢培養情緒。」雪兒媽咪仲保留咗當日拍嘅片send咗俾我哋，一齊睇下雪兒喊得幾慘豬，但一話ok就即刻笑返，真係好專業呀！
[youtube id=”9R1YTVoMhaY”]就係呢一喊，雪兒就俾電影公司睇中，邀請佢參與拍攝，飾演張繼聰同唐寧個女！
下頁： 紀念日 拍攝分享
到正式拍攝喊戲當日，雪兒媽咪都有啲擔心，驚囡囡表現唔好，仲問導演(葉念琛)有冇時間俾雪兒培養情緒，點知導演話：「唔使架喇！我哋一嚟就拍，亦唔打算拍好多次，會一take過，唔主張打佢、鬧佢，由佢自己慢慢嚟！」
雪兒媽咪聽到導演咁講都放心咗啲，喺未埋位前，就不停同雪兒傾偈。「我問雪兒有咩會令佢唔開心，佢話媽咪錫晒細妹就唔開心，咁我就順勢叫佢諗依家媽咪淨係錫細妹，唔錫你，妹妹整爛啲玩具，我唔鬧佢但鬧你，一邊講雪兒就一邊進入情緒，情緒開始好down。」
而因為嗰場戲係講唐寧離開咗，雪兒拍之前有問過媽咪：「媽咪，你係會老？會死架？」雪兒媽咪就答話會架！之後雪兒就更唔開心，到拍嗰陣佢對住鄧麗欣喊得好慘咁講對白，「契媽，可唔可以俾返媽咪我？」呢句對白雪兒頭三次都係喊住講，導演就一直叫佢重覆講，直到第8、第9次，雪兒就完全爆喊，喊得非常慘，就連在場睇佢拍嘅媽咪都睇到眼濕濕。
撰文：Heidi Lau
