Q立方 王國 玩盡室內室外玩樂區
其實之前都見有好多朋友仔嚟玩過，見佢地嘅分享都感覺唔錯，尤其係可以一次過玩齊室內室外玩樂區，絕對係一個放電好地方呀~
玩樂地方都好大，而且可以玩盡室內室外地區，收費都唔算貴呀~
一做好登記手續，小小豬就已經爭取時間，除定鞋仔等入場啦~
拎住一袋兩袋同小朋友玩又點方便，所以我地租左一個儲物箱將隨身物件放晒入去，咁陪小小豬走嚟走去都方便。估唔到租金都只係$20，絕對係抵俾啦~
小小豬第一時間就當然係去室內最大型嘅攀登太空艙(不過….小朋友需要五歲以上入去玩呀)~
依個太空艙由兩個大型組件而成，小小豬係入面不停左穿右插，真係都唔夠佢走得快。最後我都係決定….企定定一邊等佢自行放電就算~
五歲以下小朋友唔可以玩太空艙，咁咪好悶。當然唔會啦，因為場內有兩個五歲以下小朋友專區，細小朋友係入面玩都可以安全啲嘛。
場內職員姐姐都好細心觀察，一見手帶唔係五歲以下小朋友嘅顏色，都會請佢地玩其他遊樂設施，就依一點都要俾個LIKE啦~
玩完太空艙嘅小小豬就轉戰立體互動戲區，唔同場景就有唔同嘅指令，我見成班小朋友係度左跳右跳都幾興奮呀~
場內仲有電影專區，播放夢工場嘅卡通電影，不過….好動嘅小小豬都係鐘意走走爬爬多啲…哈哈哈~
平日唔多機會打機嘅小小豬，今次仲唔係又可以嚟大解放。不過其實每次排隊都只係可以玩20分鐘，一場嚟到就俾佢玩一陣啦~
小小豬係入面都玩得不知幾開心，係城堡入面都唔知玩左幾耐呀~
其實我自已真係好鐘意玩旋轉木馬，因為一上到去就會幻想自己成為童話主角。不過次次入迪迪尼都係勁多人，怕排隊嘅兩位老細就當然唔陪我，所以仲唔趁今次大玩特玩~
全場最攪笑就一定係依個位置，因為長期都會有爸爸係入面瞓覺，總之就係一位離開就好快地由另一位頂上，都真係幾攪笑呀(但其實…..我試過…..一啲都唔好舒服呀…..哈哈哈)~
話咁快兩個鐘玩樂時間又過，小小豬玩到最後一分先肯離開，仲話下次嚟澳門玩一定要再嚟過哦。
其實我都想呀…因為我係玩旋轉木馬時見佢地嘅大型水上主題公園，見到有好多唔同嘅水上設施，真係好吸引，睇嚟夏天可都要計劃一下先得啦！
BY 小小豬的成長日誌
