【自家 消暑 甜品 】士多啤梨藍莓雪葩

其實之前我都有整個雪葩俾小小豬食，始終自家制嘅唔會加無任何添加劑，而且入口仲係啖啖真100%純水果，咁就可以食得安心又放心。不過之前用開嘅手動攪拌器壞左，用攪拌機嘅方法又好似有點麻煩，所以之後都冇再整。依家有新玩具咁方便，就當然要整多啲俾小小豬同自己食啦！

材料只需要士多啤梨及藍莓各一盒~

其實兩者份量都係好隨意，鐘意邊種生果就加多啲就得啦~

將士多啤梨嘅葉同椗切去，然係切開一半~

藍莓洗乾淨~

然後將所有生果放入冰格雪過夜(如果急食的話，最少雪起碼五小時)~

準備整雪葩前就先將生果由冰格取出，解凍五分鐘先~

然後將生果粒粒可以放入已換上粉紅色雪葩磨頭~

之後就可以壓成雪葩啦~

話咁快就有得食，小小豬話雪葩即係健康雪糕，所以就要用雪糕筒食先最好~

睇佢真係食得“Lam Lam”脷，仲一口氣食左兩大球雪葩添~

今次依個份量就可以整一盒士多啤梨藍莓雪葩，咁係依兩日就可以隨時食到好味又健康雪葩(每次食完記得放回冰格呀)。由於無加任何防腐劑，所以整出嚟嘅雪葩最好就係兩日食晒呀~

依家用慢磨榨汁雪葩機嚟整雪葩真係超方便，唔計將生果雪過夜都只係用左十五分鐘就可以有雪葩食，真係啱晒為食嘅小小豬。
亦都係因為有左依個新玩具，所以小小豬食生果動機就越來越多，由平日唔多願食，到依家行街市都會主動叫我買生果整果汁或者雪葩，對住依個為食豬，真係唔知好嬲定好笑呀！
BY小小豬的成長日誌