親子好去處 聽故事 遊赤柱

其實我自己都好鐘意參加依啲導賞團活動，雖然地方可能我地成日都會去，但當聽住導賞員詳細地講解社區背景，可以明白更多地方歷史之餘，仲可以了解多啲當年嘅人民生活情況。輕輕鬆鬆嚟個親子遊，對我同小小豬嚟講都係一個好好嘅體驗呀！

[avrviframe id=”https://www.youtube.com/embed/yYQ0NaAqbM0″]

活動嘅第一站就係去參觀現存仍然運作嘅最古老赤柱郵政局~

星期日當然係休息，我地係唔可以入內參觀，不過只係門外都可以有故事聽。導遊姨姨為各位大小朋友講解郵政嘅歷史，仲為大家講解鑲有英國皇室徽章嘅郵筒。

原來香港依家都仍然有幾個皇室徽章嘅郵筒係中區，不過已經回歸關係，所有徽章同郵筒都已經塗改為綠色，變得不起眼了。姨姨仲叫我地下次去中區自己搵下依幾個有歷史嘅郵筒，搵日又帶小小豬去行下，睇下搵唔搵到先~

郵政局外仍然可以睇見英國皇室徽章嘅郵筒，同埋古代郵票售賣機，當然就只限展覽，所以我地睇時就只可以眼看手勿動，唔好破壞佢呀~

一場嚟到就試下買個郵票，依個小小豬講就話自己識，但最係都係要姨姨幫忙先成功買到個郵票。不過…其實依家真真正正需要寄信機會真係少左好多，我自己對上一次寄信都唔記得左係幾時啦~

之後我地就慢慢行下啲排檔市集，一邊行姨姨都有同小朋友講解市集背後故事~

嚟到第二個目的地，就係去感受大排檔風情，依間之前我地都想嚟食，不過勁多人等唔到位所以冇得食。唔怪得之咁多人，原來依間泗益係有超過60年歷史，好有在負責姐姐幫我地預先等位，終於可以一試啦~

一坐底就飲番杯咸檸七抖下先~

當然除左好飲之外，亦都有一個小故事。原來赤柱傳統有一個習慣，就係當有小朋友出世之後，佢地嘅家族就會為小朋友醃製一樽咸甘桔，就當係對小朋友一種祝福。一聽到依一環節，小小豬就問我點解佢冇咸甘桔，估唔到佢反應咁快，依一刻我都真係唔知點回應佢…哈哈哈~

當然唔少得最出名嘅免糖漿咖央西多~

食依款西多係唔洗落糖漿，配埋佢地自家製嘅咖央，外皮香脆咬落鬆軟而且甜而不膩，真心覺得好好食，我自己都可以食左大半份呀~

食飽飽之後就繼續行程，就慢步行出海旁睇下兩個歷史建築物。
卜公碼頭原係中環交易廣場，於1920年搭建，碼頭上蓋以「鑄鐵」建造。之後因為維港填海工程而清拆，但上蓋就保留係黃大仙摩士四號公園作為露天圓形劇場。直至2005年，建築署為赤柱海濱改善研究規劃設計，就將上蓋重置赤柱公眾碼頭，成為赤柱卜公碼頭。
之前只係覺得個碼頭風景好靚，原來背後係有一個歷史~

當然唔少得具有維多利亞時期色彩嘅建築物美利樓，佢採用左西式圓柱，以及中式的瓦頂，係香港殖民地時期早期最常見的建築設計，而美利樓則成為現存此類建築物中歷史最悠久嘅一座。當美利樓係中環嘅時候，曾經係一級歷史建築。但當被遷移至赤柱後，因位置不同，建築物料亦有所改動，所以由一級歷史建築降至不予評級啦~

初期美利樓係用作海事博物館，或可因為人流關係及地租問題，依家就變成餐廳及時裝店。其實都真係有點可惜，點解一座歷史建築物要變得咁商業？真係好值得令人反思。
特式物仲有係美利樓旁『同昌大押』石柱群，原來依幾條石柱係油麻地上海街重建項目中拆下，然後安放係度俾大家欣賞呀~

之後我地就去參觀最古老嘅天后廟，坦白講嚟赤柱咁多次，我都唔知有依個天后廟，今次都係第一次嚟呀~

估唔到門口嘅佈置都幾特別~

入內參觀之外，導遊姨姨仲講解海上守護神天后背後傳說~

場內仲有一件老虎皮標本，話就係NNN年前由一位印藉警員射殺，然係將老虎皮供奉於天后廟內，以保村民平安~

天后廟比一般廟有啲唔同，因為當年村民外出不便，但又各人供奉嘅神，所以就擺放唔同嘅神像方便村民~

神像介紹除左中文之外，仲附有英文，相信都係方便外國遊客了解我地中國文化其中一部分~

依個小小豬聽完姨姨介紹，仲學人試下求簽同問聖杯，仲好似有板有眼咁哦~

之後我地就入去赤柱廣場，原來依度係首個可以帶同寵物進入嘅領展商場呀~

我地主要就係嚟參觀揉合香港地道文化及新式設計為靈感嘅品牌~

第一次進入依類店鋪嘅小小豬真係充滿好奇，不停左睇右睇，好在都有留心聽哥哥介紹~

佢仲對個燈罩好有興趣，拎住隻假雞蛋係度玩~

最後我地就去左附近嘅餐廳，飲杯茶繼續聽姐姐講解赤柱歷史~

一切就由漁村開始，由1960年代起，漁民陸續從水上搬往岸上，漁民嘅故事就反映了昔日生活和赤柱變遷經過~

行左大半日，雖然小小豬都好乖乖聽書，不過小朋友始終都係鐘意玩，所以就去小公園大放電啦~

最後我地就去赤柱廣場上嘅空中情人觀景台~

依個位置睇風景真係唔錯，靚靚地吹吹風睇風景都真係一大樂事呀~

赤柱嘅歷史古蹟又點止咁少，不過由於時間關係，我地導賞團就只去到依幾個地方(其實都已經係接近兩個半鐘活動了)臨離開時，導遊姨姨仲介紹左我地去赤柱軍人墳場、八間屋、水僊古廟、赤柱大街舊屋、大王古廟同埋一條好靚又易行嘅行山徑，所以等我地下次再入赤柱時，可以參考下依啲地點呀！

香港其實仲有好多好好玩又有歷史價值嘅地方，與其名成日為搵新出親子玩意同小朋友去打咭呃LIKE，不如帶小朋友去認識多啲歷史背後故事，咁就來得更加有意思，對小朋友亦都有益啲啦！
 
BY小小豬Kinsey