【 白石燒烤 】夏日水上樂園 2小時水上狂歡 + 任時燒烤

白石燒烤 夏日水上樂園

嚟到白石燒烤場，小朋友們就急不及待要去玩水上樂園，我地一早BOOK左1:30-3:30那節，咁就真係時間剛剛好，換好泳裝就可以去玩。
坦白講我初時都有丁點擔心，好怕個衛生情況(尤其係啲更衣位置)。原來個洗手間兼更衣室都好乾淨，即刻放心晒~

場內仲可以租用儲物籃，咁玩起上嚟都方便啲~

其實我另一個擔心就係水質，好怕係啲死水入面玩。但我一望….啲水都好清，感覺都好乾淨，原來每玩完一節，工作人員都會重新注入新水以確保水質，又真係幾貼心呀！
場內有大大細細嘅滑梯、大水泡、香蕉船同埋波波水池，小朋友們入到場就已經不停走來走去，瘋狂大放電了~

不過其實唔止小朋友，我地大人都一樣玩得投入(我就係因為掛住玩，所以拍完片之後就走左玩，相都唔係好記得影。所以大家都係睇片啦)~

越大越細膽嘅小小豬又要驚又要玩高滑梯，最後就要姨姨抱住瀡~

平時嘅撐船仔就只限小朋友玩，今日終於我都可以玩啦，我仲唔玩返夠本…哈哈哈~

離我地依一節完結前大約20分鐘，工作人員就叫我地齊齊返上入口，唔係提早完結，係準備最刺激一環 – 水彈大戰呀~

工作人員一早準備好晒水彈，之後分為大人組及小朋友組齊齊大作戰呀~

不出3分鐘，所有水波也耗盡，大家都帶啲意猶未盡去換衫，準備去BBQ啦~

玩左兩個鐘，都真係幾肚餓，所以就係BBQ時間。由於我地一行10人，所以就叫左個10人海鮮餐。除咗腸仔、丸、豬扒、雞翼，仲有青口、海蝦同帶子。每一份食物都係獨立包裝，衛生得嚟而且份量都好好夠~

初時大家都好乖乖咁叉住燒，不過之後就開始有點懶，放晒係個網攤係度燒，哈哈哈…最緊要快有得食嘛~

初時我有擔心唔夠食，最後大家都食得好飽飽，仲帶左幾包豬扒返屋企添。
唔覺唔覺我地都係白石燒烤玩左大半日，我就真係玩到好攰，不過兩位小朋友就仲仍然精力旺盛，唉……好在今日有SY在場陪小小豬玩，如果唔係我一定冇咁攰多幾陪呀~

其實小小豬今日都未玩夠，係回程時不停問我幾時可以再嚟玩。咁又係….今日中途曾經落過雨，唔好話小小豬，我都有點唔盡興。哈哈哈…睇下佢乖唔乖啦，如果乖乖地就考慮帶埋佢去另一個小欖燒烤夏日水上樂園再玩多次啦！
BY 小小豬的成長日誌