《 一屋老友記 》差唔多播到尾聲，三寶之前因為炒股票輸咗幾百萬冇錢還，搞到份工冇埋，老婆走佬，同大寶二寶又反晒面，眾叛親離！三寶心急要搵錢買樓、俾老婆買靚衫，一個人孭起頭家，現實中飾演三寶嘅張頴康，亦因為老婆麥雅緻冇得主持《東張西望》收入大減，所以要狂拍劇賺錢養家！
張頴康12年與港姐出身嘅麥雅緻結婚，14年生咗囡囡張雅喬。一家三口經常周圍飛，早前張頴康連續缺席咗幾次《 一屋老友記 》宣傳，就係為咗陪屋企人旅行！
兩人當年結婚時都係普通藝員仔，兄弟姊妹團最紅係龔嘉欣、鄭俊弘同揚明，但其實張頴康人緣唔錯，同鄭嘉穎、胡杏兒等一線小生花旦幾熟絡。
唔講唔知，張頴康原來係劉德華一手帶入行、有「劉華契仔」之稱！當年華仔將張頴康收歸自己公司「天幕」旗下，後來更出面引薦對方入TVB，真係當佢仔咁照顧！
張頴康劇集長拍長有，可惜多數係大配角唔起眼，直至今次演「三寶」先有多啲發揮。
而麥雅緻本來主持《東張》及《創富坊》，每月穩袋3、4萬騷錢，點知上年突然被調離肥雞位，搞到張頴康要獨力賺錢養家！好在張頴康一向受監製重用，依家《 一屋老友記 》又爆出，應該大把錢途！
