「皮膚白、眼大」全出局？外國人眼中亞洲女神竟然係佢！
外國人點評亞洲女神
成日有港人認為外國人對美的準則比起華人更寛鬆，不過事實又是不是呢？我哋立即睇睇在外國人心目中，最靚的華人女星有邊個先！
元祖級嫩模Angelababy
出道與文詠珊（Janice Man）齊齊以孖妹姿態出道的嫩模始祖Angelababy，雖然經常畀人質疑整過容，不過她的事業並無被負面報道影響，發展得愈嚟愈好！近年積極北上搵真銀的Angelababy唔單止係內地巴打同埋香港巴打公認的女神，憑住微厚嘴唇，成為外國人眼中的亞洲女神！
Victoria’s Secret內地超模劉雯
外表寡淡，一雙小小獨特的內雙眼睛，劉雯的美未必個個人都識得欣賞，不過喺一班外國男人眼中，劉雯似乎就符合晒外國人對亞洲靚女的標準。被譽為中國模特兒界「四大金剛」之一的劉雯除咗曾經參與Victoria’s Secret內衣騷，仲代言過唔少知名國際品牌，雖然喺香港唔一定個個人都識，但全球都有好高知名度。
C朗唔揀迪麗熱巴！要劉雯
除咗啲白人巴打鍾意劉雯，C朗邀上內地綜藝節目《我的最佳球星》擔任嘉賓時，要喺其中一個遊戲環節由三位內地女星中揀出一位最啱心水嗰陣，亦同大家一樣揀咗劉雯呀！C朗基本上第一眼就睇中劉雯，仲好肯定咁話「我覺得第三個漂亮」。其實C朗鍾情模特兒都唔係咩新鮮事，過往佢都同過多位唔同國籍的模特兒拍拖，果然眼光始終如一！
選美冠軍曾淑雅 Jumbo
香港藝人Jumbo作為全球百大美女排行榜2022嘅第41位，首次入圍之餘仲要喺香港入選嘅靚女之中最高排名，外國人就覺得佢笑容夠甜美，獲得 Smile of the Year 嘅稱號，再加上佢依家作為瑜珈導師，健康美嘅形象當然吸引唔少外國人！
公認靚女、自信美唔係人人識欣賞？
講完外國人公認最靚的華人女星後，當然要講下外國人不欣賞的類型！
苟芸慧
苟芸慧曾經奪得2008年多倫多華裔小姐以及2009年國際中華小姐冠軍，係網民公認又靚又有身材的大美人！2017年仲獲賽車手男朋友陸漢洋（William）送上鑽戒，兩人於2018年結婚。女神封盤，好多巴打都覺得非常可惜，不過啲外國人竟然覺得苟芸慧麻麻地喎！
鄭欣宜
「不要低頭，光環會掉下來……」鄭欣宜經過多年被網民唾罵之後，終於憑一首《女神》奠定女神的地位，更成為最受歡迎女歌手！完全係「因有自信，所以美麗」的代表人物。不過鄭欣宜呢種自信美，一班外國人似乎就唔太受落啦。
阿冰
阿冰喺 YouTuber 界向來都係靚女級數，清純外表吸引唔少港男追捧！不過喺外國人眼中，阿冰個樣就未係佢哋嘅心水，略嫌太普通咁話喎～
巴打難以理解！外國人對亞洲女神審美觀
自信美又好、內在美又好、肥美都好，總之全部以字面解讀都有個「美」字，不過有個「美」字又未必係靚咁解，所以話個個人對美的睇法都好唔同囉！而了解完外國人的眼光之後，有啲巴打都話好難理解呀！
七師傅：荷蘭老公覺得我靚女！
七師傅就喺節目《搵鬼做情人》大爆，話外國人根本「唔識睇人」，在香港被定義為唔靚、老嘅女生，去到外國反而好受歡迎！七師傅嘅荷蘭老公，當年都係因為沉醉亞洲文化，覺得七師傅同屋企海報上嘅亞洲女星好相似，所以對七師傅展開熱烈追求！不過個位女星係鞏俐喎⋯⋯
