今個月生得! 周汶錡透露 胎位低 醫生唔建議做運動

撰文：Sunday Kiss
圖片：周汶錡Facebook

暫停工作 休息直到BB出世

日前周汶錡（Kathy）出席畫展剪綵活動時，透露第二胎今個月出生，不過賣關子冇講係囝囝定囡囡，希望保持神秘。而佢之後亦都暫時冇安排其他工作，等自己休息直到BB出世，亦都會留返啲時間準備BB出世後的必需品，例如衣服、日用品，以及去醫院生產時要用嘅嘢。

陀第二胎比較Hea

由於有第一胎的經驗，Kathy就話自己今胎都比較hea，因為已經知道整個流程，所有嘢都可以慢慢預備。問到Kathy第二次懷孕，身體有冇比之前辛苦，佢就話基本上同上一胎一樣，完全唔辛苦，冇嘔又冇好容易就攰，胃口亦都冇變，Kathy解釋指可能因為自己的體質問題，所以身邊的朋友都話佢唔似大肚，整個過程就好似正常生活但個肚大咗。

胎位低 醫生唔建議做劇烈運動

Kathy表示今胎同上胎一樣，都是胎位低，所以醫生唔建議做運動。其實台灣藝人徐若瑄都有 胎位低 的問題，她更為了安胎臥床五個月。其實懷孕28周後，便可以檢查到胎位正不正，太高或太低都有機會影響生產過程，若發現 胎位低 ，應該多臥床休息，不要做劇烈的運動。

飲食貼士：多湯水忌糖份

Kathy就話要全面兼平均地吸收營養，所以佢咩都會食，例如豆、菜、肉等等。當然唔少得媽咪煲嘅愛心湯水，佢話其實同平時日常飲嘅湯差唔多，都係咩都中意飲，媽咪亦都唔會特別煲一啲好補嘅湯，太補其實都唔係咁適合佢體質。最重要係留意甜食，佢話自己比較少食甜食，因為會對小朋友唔好，所以Kathy提醒有計劃懷孕的媽媽要留意，準備生育同懷孕期間都盡量食少啲含糖份嘅食品。