何伯1絕招令何太無法離婚 被趕後突讚房署1事 獲送元寶衣紙嚇到爆
廣告
憑上《東張西望》成名的何伯同何太近日因住屋問題再受關注,由於何伯一直未有辦理加名手續,上周五房署曾向他們發出通知,要求何伯搬離何太所租的公屋,為此何太曾在直播中不滿鬧爆房署「亂嚟」,但到昨日(8月14日)何太忽然改口風,還賣口乖大讚房署!她還大爆何伯用一絕招令自己不能夠離開……
何太突然賣口乖改口讚房署
在YouTube直播中,何太忽然轉口風,提到自己回公屋單位攞衫時,發現房署發出的信件,她說:「嗰封唔係收樓信,嗰日佢口頭同我講咗再出一封信啫,話從此之後,我老公冇得再喺度住喇!如果再繼續住呢,一係加名,一係搬遷咁。」
![何伯何太 公屋 何太同何伯一邊行商場一邊開直播。(圖片來源:何太YouTube)](https://imgs.orientalsunday.hk/wp-content/uploads/2024/08/01_112787827166bd87e6200ce-1024x576.jpeg)
稱已經同房署職員傾好咗
早前曾鬧爆房署職員的何太,此時突然「變臉」賣口乖,表示:「我都相信嘅,佢哋做嘢冇咁蠻不講理嘅,我哋明明9號嗰日傾好咗,同啲職員傾好咗,嗰晚我哋都上深圳過咗一晚㗎嘛!」強調何伯冇返到公屋單位過夜。
![何伯何太 公屋 何伯和何太一度現身不同的酒店。(圖片來源:TVB)](https://imgs.sundaykiss.com/wp-content/uploads/2024/08/8ff31f79-faed-495e-b8ed-2734cdd5e6f7_166889402466bb2be69a34f.jpg)
何太爆被何伯以死相逼 無法離婚
何太透露她正在考慮搬到租金更便宜的地方居住,並堅決拒絕為公屋單位加上何伯名,以免影響她討回何伯450萬的計劃。不過她坦言有離開何伯的念頭:
「邊個撐得到呢,我都想走呀,但我老公佢愛我,佢唔肯畀我走,佢係以死留難我呀嘛!」
讚房署唔會好似黑粉咁野蠻
何太又揚言:「就算佢(房署)使橫手收我樓都冇問題㗎,真係㗎喎,我OK㗎喎,我冇問題㗎喎!我唔會畀你哋逼上絕路㗎噃!我一直撐下去㗎噃!即使我瞓街,我都同我老公撐下去!」
何太續讚房署講理:「如果房屋署好似你啲黑粉咁野蠻,唔講道理嘅,使橫手攞走我間屋嘅,我都真係冇問題㗎噃!」何伯也在一旁加以附和:「人哋(房署)都識諗㗎嘛!人哋畀你玩呀?畀你牽住個鼻走呀?人哋何局長都話會查實質嘅嘢,唔係聽網上講嘅嘢,網上講嘅嘢係不可取不可信!」
![何伯何太 公屋 何太曾在直播中鬧爆房署「亂嚟」,又指「房屋署無證無據係無本事收我哋嘅屋」,如今忽然改口讚房署。(圖片來源:TVB)](https://imgs.sundaykiss.com/wp-content/uploads/2024/08/6e0c206b-0e76-471f-8291-1c5a19addba0_140462863966bb2be5b9350.jpg)
有外賣員搵上門何太被嚇親
由於經常被曝光所住酒店,何伯何太昨晚搬到深圳羅湖一間酒店居住,但仍極速被內地黑粉查到地址及房號,有黑粉更用外賣app幫何太訂購元寶衣紙、冥幣、避孕藥等,更於訂單中標示要求外賣員「大力敲門」,嚇到何太在直播中瞳孔放大,即時要「落播」。
不少網民認為何太「唔抵可憐」,又驚訝指:「點解連佢住邊間房都知咁癲」、「慘,而家連响大陸都不受歡迎」、「除咗抵死真係唔知講咩好了」等。
![何伯何太 公屋 何太在直播中被外賣員「大力敲門」嚇親。(圖片來源:無糧軍師Water YouTube)](https://imgs.orientalsunday.hk/wp-content/uploads/2024/08/04_116225754766bd88f8efbd9-850x1024.jpg)