入貨幾蚊起 深水埗 辦年貨 攻略
廣告
農曆新年倒數中，今個新年 辦年貨 有咩玩法？小編唔帶你去7X9、咩品36X、價真X等等辦年貨，事關呢類「以食為先」嘅乾貨店開到成行成市，數量多過便利店，又唔係特別平。不如帶你直擊專賣平嘢、位於深水埗的福華街和北河街，幾蚊起就買到勁多種類的過年實用品，拎住一百蚊都買到笑。
1. 公仔產品多元化
公仔主題產品一向受小朋友歡迎。雞年雞公仔無論尺寸、花款一定佔最多，百幾蚊隻公仔尺寸大到可以當小童梳化坐，細細隻的匙扣亦夠可愛，價格十至百多元；而其他大熱卡通主題利是封、各式揮春、風車、地氈等賀年用品都一樣幾蚊起；兩位賀年之星包括財神大哥和招財貓款式產品亦夠多，換上kawaii和傳統裝扮一樣吸引一家大細。
2. 傳統新款齊Battle
揮春是每家每戶過年時的指定布置小物，短短的福華街就集齊傳統和新穎的設計，款式之多令人眼花撩亂，幸好現場廿幾間舖，貨款又唔會撞得離譜，各有特色，只要合心水就好入手，因為人多擠迫，返轉頭都費時不少，所以睇定以下款式，例如有剪紙、貼玻璃專用設計、立體、繡花、公仔主題、燙金字等，去到shopping要快、狠、準。
3. 拜年衫$20起
一出深水埗B2出口，正面望過去就係北河街，大家好自然都會被鐵皮檔口深深吸引，十多檔賣的全是小童賀年裝，最平見到有$20一條旗袍、$70兩件棉襖背心、$39賀年套裝，基本上$100內就買到，小鳳仙裝、唐裝雙面外套、中式毛毛球披肩和連身裙等，厚薄款齊備，買多幾款日日轉拜年looks影相「呃LIKE」抵晒啦！
4. 360度睇賀年擺設
筆者建議大家行街時多試試「抬起頭來」作全方位檢視，因為不論大細的賀年布置用品和擺設，它們擺放的位置均從高處伸延到地下，舖外伸延至馬路，一片紅噹噹的景象相當有氣氛，真的再一次睇到大家「暈到頭埋」。經典風車、燈籠、摺紙掛飾、布類掛飾、金魚、和風福袋、炮仗、大吉、桃花、彩帶、搖錢樹、金元寶、醒獅等琳琅滿目，能發光和擺動的布置用品特別受現場小朋友歡迎，隨時幫大家催旺學業、健康、財運和人緣，雞年全家平平安安。
