撰文：Sunday Kiss

惠英紅 早睡早起食得清淡

記：記者 惠：惠英紅

記：我今日見到你，真係好靚，你又冇修葺過，你點keep？
惠： 我好健康嘅，第一我唔食有味精嘅嘢，因為我身體受唔到，會骨痛，平時如果唔使開夜班，我十點鐘就瞓，朝早七點就起身，唔做gym就做瑜伽，我又鍾意游吓 水，食嘢好清，唔係食好多肉，每個幾禮拜，早餐淨食麥皮清腸胃，飲好多水。如果開早班，四點半要起身，夜晚我七點半就瞓。

一身私伙衣服受訪，舉手投足充滿媚態，她笑言最介意被指男仔頭，「話我男仔，其實我仲靚過佢，我好時代感，我自己化妝、自己襯衫，不知幾stylist，但從來冇人為意，成日都標籤我唔識着衫。」

記：有冇練中國功夫？
惠： 從來都唔做，我最唔鍾意就係動作，平時我係絕對唔會接觸呢樣嘢。
記：拍打戲前都要學啩！
惠： 因為我天生嘅動作細胞太發達，所以基本上喺現場你打俾我睇就得，走位都唔使。

鄙視軟飯男

記：姻緣呢？
惠：零！
記：想唔想有？
惠： 邊個唔想有？想但唔強求㗎嘛！同埋年紀愈大愈難，因為身邊好多朋友其實都埋晒岸，除非佢唔好彩死老婆或者離婚，但係又要啱㗎嘛，我嘅性格比較鍾意靜，唔係 好可以喺好嘈又煙又酒嗰啲地方，我一入去就頂唔順，個人好似打咗三日功夫咁，變咗我個圈子識嘅人唔係好多，同埋我覺得緣份嘅嘢冇得強求，不過我又覺得我係 一個好人，遲早都會有嘅，老啲嚟都冇所謂，最需要嘅伴其實係老年嘅伴。

直言以往常鑽牛角尖，最終自己受害，現時學會比以前看得開，「睇相話我係公主命，但係一個落魄公主，即係公主命，但冇實質公主應該攞晒嘅嘢，我係喎，我係全香港、美加最賣埠，但我片酬低於文藝片女星，就算攞住無數獎，都係低於佢哋，不過是旦啦，落魄公主都好過係丫鬟吖！」

記：你對伴侶有咩要求？
惠： 冇要求，要有擔帶、有膊頭，唔好使我一毫子，唔使我養，就係咁簡單！如果一個男人要用到我嘅錢，我即刻會鄙視，再愛佢都會開始減分，我又唔使人養，我都 OK、幾有（錢）嘅，最緊要人有志氣，一個人一使我錢，我就覺得佢冇志氣，好窮、掃街都好，掃街有志氣，我都覺得好，但幾靚仔都好，一副「我都係食軟飯㗎 啦！」嗰種我直頭朋友都唔會做。

積穀防飢

記：做人你仲有咩要求？
惠： 我依家嘅要求係健康，可能之前我嘅工作係用健康換錢返嚟，同埋年紀大開始有好多朋友離世，自己嘅阿哥（惠天賜）又離世，媽咪又咁啦，我覺得再有幾多錢都好，如果冇健康基本上都享唔到，所以依家對我最緊要就係健康。

記：你係咪永不言休？
惠： 我唔係，應該係退而不休，因為我覺得冇嘢做我會老得好快，會同社會脫節，我係一個由細掙扎上嚟嘅人，所以我嘅安全感比較少，我做任何嘢唔會安排明日嘅事， 我會安排十年嘅，即使我幾搏命儲蓄都好，我唔會安排我五十歲，我會安排我九十歲嘅生活，所以我會安排自己幾時應該轉另一樣嘢，我唔會蹉跎到好老都仲要拍 戲，我唔係呢種人。

全文完