送孫返學卡通雨傘被擅取 婆婆哭訴 網民成功「通緝」取傘男

撰文：K | 圖片：新傳媒資料庫

送孫返學卡通雨傘被擅取 婆婆哭訴 網民成功「通緝」取傘男

有網民於Facebook專頁「Tai Po 大埔」發文，指出自己一名男子將送孫返學婆婆的雨傘擅自取走。「今早帶小朋友返學，突然雷雨，好多人走避到大廈樓底，去到學校放底把遮係門口遮架，就見到把黃色好搶眼濕晒嘅Minions單眼仔直遮，特別顯眼，所以係學校避雨就望多2眼，之後就見到企係門口個裇衫大男人開左把遮走，一啲都唔得奇怪，話晒可能小朋友鍾意嘅，家長一齊用嘛！轉頭有個婆婆出去返入黎喊晒口，眼紅紅忍住就猛話唔見左把遮：『把遮係小朋友好鍾意，專登係萬寧儲印花換嘅，今日重要第一次用，有無攪錯呀！依家咁樣落雨，點算，點返去呀！咁嘅人都有，濕嘅有人用緊架嘛⋯⋯』」該名網民還表示希望擅自取走雨傘的男人做個負責任，有公德嘅男人（爸爸），盡快將雨傘歸還。

網民憤怒 ：同賊冇分別！

網民1：還？邊度可以咁益佢呀？！佢而家係偷野呀！偷走私人物品呀！唔係一般既還番就應該算囉！學校都有責任，因為比人有機會偷到野！

網民2：真係離晒譜！不問自取是為賊也，咁大個人點樣身教小朋友

有網民表示曾遇上同樣事件

網民3：我諗起我幼稚園有把媽咪送既藍色黃鴨公仔圖遮，雖然係日本城買，但我十分鐘意，有日同我好熟既朋友買咗同我一樣既，本來好開心，直到有日佢唔見咗佢把遮，然後拎咗我個把，我話係我既，因為有我名（我媽經常將我英文名混入我啲用品到，扮係商品一部分，成日無人知，得我知，我都因為咁而無咗幾個損友～），我解釋完，佢都堅持話係佢既，我媽就叫我送俾。我媽就同對方媽媽溝通，希望我個朋友唔好咁細就行差踏錯。世界總有呢一種自私人，成日覺得佢地好可憐。明明可以正常做一個人，係都要搞到偷偷摸摸過日子

雨傘終物歸原主

直至今早，婆婆的失傘在原處出現，最終雨傘物歸原主！