吳岱融鍾淑慧 晒全家福 賀囝囝20歲生日
撰文：Sunday Kiss
圖片：吳岱融微博、TVB《1+1的幸福》、新傳媒資料庫
囝囝20歲生日 興奮post全家福
吳岱融 1995年同老婆鍾淑慧結婚，囝囝吳政樺日前20歲生日， 吳岱融 喺微博大曬一家人嘅合照，相當幸福！鍾淑慧仲錫咗囝囝塊面，一家三口樂也融融。囝囝吳政樺其實一直喺新加坡當兵，今次趁著生日同家人慶祝20歲，相信一家三口一定好開心！
年輕時怕結婚直至遇到老婆
2月嘅時候 吳岱融 同鍾淑慧參加綜藝節目《1+1的幸福》，節目中播返21年前的結婚片段，鍾淑慧都忍唔住話：「眨下眼就廿幾年啦！」不過結婚廿幾年， 吳岱融 越來越Man，鍾淑慧就無變過，連祖藍都大讚Keep得好好！
結婚多年，一直都咁恩愛，但吳岱融大爆年輕時怕結婚，因為覺得連自己都照顧唔到，點照顧老婆，點照顧一頭家呢？但直至遇到鍾淑慧！「當時我哋係套劇的男女主角，日日都見面，當我見唔 到佢時，個心又會話掛住佢，好想見佢！有一次印象好深刻就係，我哋等埋位時，我拎咗一粒細細粒發泡膠俾佢食，本身諗住玩下，整蠱下佢，點知佢真係食，我就覺得佢好傻，所以我就諗住娶佢返嚟治下佢啦！」
永遠當對方係初戀情人
節目中， 吳岱融 仲同老婆合唱《只有情永在》，好聽就不在話下啦！唱完仲深情一吻，真係冧冧豬！由拍拖到依家27年，都Keep住咁恩愛，吳岱融話：永遠都當對方係初戀情人！「一對夫妻成日喺埋一齊，多多少少都有啲唔開心嘅事，我覺得要多啲喺對方的角度睇件事，同埋我哋要保持一種心態係，永遠都當對方係初戀情人，有時兩公婆結婚耐咗，可能會唔記得，會習以為常！」
佢哋嘅囝囝20歲，因為吳岱融 是新加坡人，兒子現在在履行兵役，吳岱融大爆太太好唔捨得！「我記得當時一拎封招募通知書俾太太睇時，上面寫住下個月要當兵，佢啲眼淚就係咁流，真係好擔心，頭三個月都唔可以返屋企，好彩依家分派咗文職工作，可以每日都返嚟！」
Liza姐問到結婚咁多年，有咩最難忘呢？吳岱融就話：「有一次我酒後打架，仲整傷鼻骨，當時我喺醫院，我老婆嚟到之後，佢無任何責怪我的說話，只係純粹關心我，仲有不斷安慰我，呢種感覺真係好好。」有個咁關心自己嘅太太，真係要好好珍惜啊！
只要一息尚存，我一定陪喺你身邊
太太深情剖白時，說了一句：「呢幾十年可以同你喺埋一齊，我已經覺得係賺咗啦！」而吳岱融就回應，「我淨係想佢開心，當佢唔開心時，我會嬲自己，點解佢會唔開心呢？我只係想佢開心啫。」
