吳香倫甜讚陳榮峻細心 最快下年中教堂行禮

撰文：東方新地
相片：新傳媒資料室

陳榮峻 – 無綫綠葉王

現年62歲的陳榮峻原名陳榮基，入行初期加入佳藝電視，其後參加1984年無綫電視藝員訓練班，畢業後一直效力無綫，不經不覺已經33年。多年來陳榮峻參演劇集無數，飾演過的角色多不勝數，尤其以奸角及公公角色為觀眾熟悉；另外陳榮峻早年在《怒火街頭》中飾演的根叔亦令人印象深刻。

太太離世大受打擊

2010年時，陳榮峻太太因腦部血管爆裂離世，枕邊人離世對佢打擊甚大，更曾想過自殺！幸好有陳錦鴻、陳國邦等好友不時陪伴開解，無綫高層曾勵珍亦在工作上提供協助。仔大女大，無債一身輕的陳榮峻曾有打算退休，不過同長子商量後，決定繼續留在演藝圈，默默耕耘。

陳榮峻 吳香倫譜出黃昏戀

陳榮峻向來生活低調，原來佢三年前遇到第二春，與現年57歲、同屬無綫資深演員的吳香倫相戀，譜出一段黃昏戀曲！兩人至今已三年，經常孖公仔出席活動，又會結伴去旅行。去年吳香倫仲同陳榮峻家人一齊到新西蘭旅行，感情相當不俗。

拍拖三年 有結婚打算

當時陳榮峻接受傳媒訪問，佢先感謝大家的祝福，承認與吳香倫拍拖三年，而且有再婚的打算！不過細節就尚未決定。陳榮峻又表示希望一切低調進行，始終大家年紀有番咁上下，只係想有個伴，亦希望雙方家長同意。去到佢哋的年紀，仍有決心去作婚姻的承諾，承諾互相扶持、彼此守護，實在係唔簡單！

陳榮峻盤菜宴上求婚

直至去年12月TVB盤菜宴上，陳榮峻在2千多人見證下向吳香倫下跪求婚， 黃昏戀正式開花結果！陳榮峻和吳香倫笑容燦爛地多謝大家的祝福，陳榮峻又指自己非常怕醜、不擅辭令，但為了心愛的人有一個難忘的回憶，佢都下決心豁出去！夠晒浪漫！

吳香倫讚陳榮峻細心

吳香倫日前與一班《溏心風暴3》演員出席活動，活動後接受本刊訪問，香倫姐表示陳榮峻係一個非常細心的人，又好關心自己的健康，令佢十分感動；另外又謙稱自己做得未夠好，因為自己向來比較慢熱，而陳榮峻就好爽快，因而產生少許磨擦。

最快下年中舉行婚禮

另外提到婚禮事宣，吳香倫稱佢哋希望在教堂行禮，所以再待教堂批出時間先可以正式決定婚期，最快都要下年年中！

吳香倫來自演藝世家

陳榮峻早年在節目《Sunday好戲王》中獲封「公公王」，可見佢演公公角色係幾咁深入民心！

至於女友吳香倫，原來出身自演藝世家，其父親吳殷志為粵語長片明星，11歲時已經在荔園登台唱歌，曾跟陳浩德、鄭君綿、鄭錦昌等人推出過雜錦專輯。吳香倫的妹妹吳江倫同為藝人。