韓國節目訪問周潤發捐身家一事 發哥：「財產不是你永遠擁有的，我每天有三碗飯一張床就足夠」
撰文：叮叮| 圖片：新傳媒資料庫|編輯：YIU
發哥發嫂成立基金助人
因為周潤發每部電影嘅片酬都過千萬，所以咁多年嚟發個儲埋儲埋有成52億身家。比著好多人，如果有咁多身家，最多咪攞幾百萬出嚟做慈善，其餘嘅當然係留俾自己同埋屋企人啦！但發哥不愧為發哥，發哥早前居然話死後會將所有身家捐曬出去，喺上年11月發哥發嫂已經成立好周潤發慈善基金，揚言發哥死後全副身家就會擺落去，基金嘅錢將會百分之一百用嚟幫人，認真有心！
周潤發平日生活簡樸
既然周潤發有咁多錢，咁平日嘅生活肯定會好奢華啦，一定日日好似啲富商咁出入名人飯店，出場一定好有氣派，一堆保鏢跟住。錯錯錯！你地咁諗就大錯特錯！原來發哥平日生活好簡樸亦好親民架，發哥曾經俾人發現著住$96嘅衫、$15嘅拖鞋。發哥俾人問到點解貴為明星、富豪著啲咁平嘅衫呢？發哥就話：｢衫唔係著俾人睇嘅，自己著得舒服就可以。」
周潤發喺一個台灣節目更加自爆，自己早幾年先換智能手機，換嘅原因只係因為用咗17年嘅Nokia第一代手機壞咗，發哥嘅節儉真係無人能及呀！發哥仲話：｢我地其實並唔需要太多資訊， 而係應該學會傾聽內心嘅聲音。」發哥嘅說話真係發人深省！而且無論發哥喺香港定台灣都唔會帶住一堆保鏢出沒，反而非常親民，無論邊個見到發哥要求自拍，發哥都會一一答應。問到點解發哥咁親民，人人話同要自拍都答應，發哥幽默回應：「影個相2秒都唔需要，大家肯定好喜歡，我都好喜歡，而且反正我手好長！」
周潤發：「財產不是你永遠擁有的」
早前，周潤發喺《真實故事探索隊》呢個節目度被問到係咪真係會喺死後捐曬52億身家出去，同埋被問到捐曬成副身家出去嘅原因。發哥喺回答問題嘅時候，貫徹一貫作風，回答出一啲非常發人深省嘅說話：「財產不是你永遠擁有的，有一天走了以後，還是要留下來給別人。現在財產放在銀行，死了都不能帶走。想想死了要把錢送給誰，捐給有意思的機構，或是需要這筆錢的人是挺好的。」
而且原因二，周潤發更表示自己嘅幸福之道好簡單，自己并唔需要奢華嘅生活，「每天吃3碗飯，睡的就一張床，就那麼多，其他多的沒什麼意思。」發哥認真豁達，居然能夠確切領悟到「錢財身外物」呢句說話，做到唔貪戀錢財，幫助有需要嘅人。發哥真係一個好值得我地尊敬、學習嘅前輩！
