圈中6個 浪子回頭 好爸爸

原文：東方新地
相片：奇妙電視截圖、新傳媒資料庫、微博圖片

1.鄭中基

2000年鄭中基乘搭飛機由美國洛杉磯去台北，途中佢飲酒飲到醉醉地，仲喺機上食煙大聲講野，當空姐同機艙服務員上前制止時，鄭中基激動打人，最後搞到被美國FBI拘捕。

直到同前有線主播余思敏奉子成婚後，鄭中基專注電影事業，一改無賴性格，現時育有一仔一女的他，不時哂全家溫馨照，變身成好老公好爸爸。

2.彭順

導演彭順四年前被發現與嫩模Liddy李悅彤喺圓方肆無忌憚當街偷食斷正，彭順被網民鬧爆兼狂插係賤男。

醜事曝光後，彭順即飛往馬來西亞箍煲，而太太李心潔最終選擇原諒老公，兩人和好如初。李心潔為老公誕下一對可愛孖仔，哥哥叫彭濟雲，弟弟則叫彭子然，一家四口樂也融融。

3.陳浩民

2011年被東方新地爆陳浩民於橫店拍劇時藉醉狼吻陳嘉桓，對佢上下其手。

事後陳浩民喺記者會中一哭二鬧三鞠躬四道歉，臨走時還作狀發軟蹄，要將臨盆嘅太太蔣麗莎攙扶，承認錯誤痛改前非，近年陳浩民修心養性，專心賺錢養女，五年抱四，認真厲害。

4.馬德鐘

「馬神」馬德鐘高大有型，先後跟郭可盈、陳慧珊、佘詩曼、郭羡妮等女星傳緋聞，06年有傳呢位人夫跟秘密情人Katherine秘遊泰國斷正，辣㷫老婆張筱蘭帶埋兒子移居法國，之後令他形象導致工作量大減，鳥倦知還的馬神親到法國同太太箍煲。

馬太張筱蘭重投老公懷抱，近年馬神專心打理飲食生意同養馬，放假陪下仔仔游水出活動。囝囝馬在驤除了遺傳爸爸高大靚仔基因外，仲係游泳健將，在第二屆亞洲法國國際學校游泳錦標賽中，勇奪七面金牌，一家三口幸福美滿。

5.林文龍

林文龍一直被傳扮好仔，實質經常偷食，蒲玩多過工作，靠老婆郭可盈養成頭家，結婚多年屢傳婚變。09年5月被踢爆偷食內地女星董維嘉，被人影咗相之餘重有一段疑似林氏夫婦嘅電話錄音。

林文龍最近喺《不懂撒嬌的女人》以型佬look冧師奶，人氣回升，喺社交網站貼相放閃，大哂同老婆囡囡Family day七歲獨生女林天若靚樣，羨煞旁人。

6.吳啟華

現年53歲的吳啟華為一代師奶殺手，入行後緋聞不絕，及後返內地發展，曾被指北上尋歡，07年佢同細佢21年嘅內地女星石洋子共諧連理，翌年誕下女兒吳熙兒，但三年前結束七年婚姻。吳啟華早前接受傳媒專訪，直言太少時間陪囡囡為此而覺得慚愧，是個不合格的父親，為了令女兒能感受家庭溫暖，會和前妻陪女兒去旅行，又不時大哂父女合照，慈父形象出晒嚟！