大談事業與感情 孫耀威冧講 Macy ：佢係我Best Buddy！

內容節錄至1020期《東方新地》

孫耀威 大談感情及Macy

孫耀威 90年代出道，誤打誤撞入娛樂圈，更加喺台灣爆紅，他說：「搭每程飛機去台灣，就好似超人變身做明星，台北飛香港就變番學生，大概九個月我喺香港仲未出道，我喺香港繼續搭火車返學，但台灣一落機就好多fans接機，一個人可以有兩個咁唔相同嘅身份，諗番都好得意。」當時 孫耀威 的唱片確賣得好好，真係閒閒地賣幾十萬甚至一百萬隻。「不過嗰時我仲係新人，新人嘅版稅好低，所以其實當年唔係賺好多錢，啲版稅買部車已經用晒。反而我真正賺錢係我開始去內地拍電視劇嗰個年代，99年我拍第一部台灣劇《懷玉公主》，好幸運破咗當年台灣電視劇嘅收視，於是我一路就喺台灣、大陸拍劇，片酬一部部升，香港嗰時好多雜誌話我銷聲匿跡或者被放逐大陸，但其實嗰段時間係我人生賺最多錢嘅時候。」

談到〈愛的故事〉上、下集都非常之紅，問 孫耀威 會不會有飄飄然嘅感覺？「我唔會承認我有飄飄然，但我睇番我當初對一啲事嘅處理方式，其實我諗我係有，甚至有少少一朝得志就語無倫次，我哋做娛樂圈，當你得嘅時候，真係好多人會圍住你，尤其是我去台灣嘅時候，真係萬千寵愛在一身，唔會知個世界真正係點，慣咗全部人都對你好好、搵錢好容易，於是好揮霍，到我大個睇番，有啲位我可以做得再好啲。」

事業好多低潮位 失敗中汲取教訓

談到人生真正的低潮位， 孫耀威 直言並非出道時，而是幾年前做生意的時候。「做藝人係畀大家捧喺手掌心、全部人包圍住，做生意真係一個人面對所有人，我試過好多行李，百幾公斤，一個人、冇助手、冇人set頭，走去propose我嘅生意，呢啲生活令我覺得原來做藝人係咁正、咁幸福，但亦都因為呢幾年做生意，經歷一啲難處、失敗，可能係合夥人喺蝕錢嘅時候走佬，或者畀好朋友離棄，經歷呢啲反而令我更加珍惜有嘅嘢，亦令我個人變得更加貼地。以前覺得冇助手、冇司機點掂？依家覺得自己揸車鍾意去邊就去邊、冇人聽住我講嘢仲好。」

現在經營西裝生意的 孫耀威 認為，以前嘅失敗或者點點滴滴都係一個教訓、學習嘅機會，唔好因為以前嘅失敗而冇咗信心，如果因為以前嘅失敗而唔去試，可能嘥咗之前嘅失敗。他堅持幕前一定係佢嘅主業，無論今日做幾多生意，幾成功、幾失敗都好，藝人一定係孫耀威嘅老本行，「唱歌、演戲我諗我呢世都冇辦法離開，而做生意我主要參與係設計，呢樣對我唔算係工作，正如做音樂、寫歌我唔會覺得係工作，對於我嚟講係創作，而創作對我嚟講係消遣，唔係工作，所以依家雖然好忙，但一啲壓力都冇，唔蝕錢就冇壓力㗎嘞。」

太太價值觀相近 認定是終生partner

一講到陳美詩， 孫耀威 表現好冧，「07年我第一次返嚟香港出唱片，去TVB拍MV，咁啱嗰日佢(陳美詩)簽約TVB，我哋喺canteen第一次相遇，我哋其實係大學嘅師兄、妹，當然唔同屆，認識咗之後，冇交換電話、冇任何交集，後尾喺藝人嘅團契小組相認番，開始傾偈，覺得大家好似價值觀幾相同，我同呢個女仔拍拖，喺佢面前，我可以繼續𥄫第二個女仔，我發覺喺佢面前我唔需要隱瞞或者扮一個點樣嘅男仔，我可以好真實地做番我，我哋乜都可以傾，當去到呢個位，我發現呢個人除咗係我嘅愛侶，佢亦都係我嘅Best buddy，我乜都同佢講，我就覺得呢個可以係我終生嘅partner。」

求婚過程好大懵 唔識講「嫁畀我好嗎？」

講到求婚過程， 孫耀威 就話自己好大懵：「我妹妹住喺瑞士，我每年都會去探佢，嗰度有間甜品店係我老婆好鍾意食嘅，到我想求婚又唔知喺邊度求，就包咗呢間甜品店，買通埋個老闆，當佢叫甜品，送嚟嘅係戒指、花同香檳，當我一跪低想講：「嫁畀我好嗎？」都講唔出，太多感觸，自己喺度喊，我太太見到都知發生咩事，亦都好感觸、好感動，兩個人就跪喺度喊，喊咗好耐，先識笑，完全唔識得影相、冇任何鋪排，但呢個就係我哋兩個真實嘅相處。」 孫耀威 話依家搵緊教堂，希望做番個儀式。

被問到44歲結婚係唔係計劃之內， 孫耀威 就話細個嘅心願係25歲結婚、30歲生仔，「我係好典型嘅family man嚟，我係要有下一代，好重家庭觀念嘅一個人，但係一過25歲之後，年年都話出年，一路話生仔，講到今時今日，暗瘡就有得生，哈！都想嘅，但人大咗就會諗多咗，生小朋友有冇能力去教育佢呢？養大佢呢？令佢成為好嘅人呢？依家社會咁動盪，呢個世界仲適唔適合人住呢？我係好想可以生一隊足球隊，但一諗到呢啲就好turn off。所以我會選擇唔特別諗，有就自然會有。」