【係愛呀！】再曬婚禮感動相 卓韻芝：感謝姊妹團陪我癲！
撰文：Joanne 圖片：卓韻芝FB、IG、大會發相
「婚禮就是簡簡單單開心一晚」
阿芝嘅婚禮冇大排筵席，只係請嚟一班親友，喺中環外國記者會「聚一聚、影吓相，食吓嘢」。Sammi接受訪問都有講，今次係佛系新娘同鬆散姊妹團搞嘅婚禮，冇接新娘玩新郎，不過就「好開心，好感動，喊死人」！阿芝今日（19/ 9 ）喺IG PO出多張婚禮相，感謝一眾姊妹陪佢癲，亦都好感激「那夜 我們的淚光 讓遺憾 變成圓滿」。
Sammi：「除了感動，就是感覺幸福。見證她和子賢踏上幸福的”起點”，（俞琤形容是「征途」）起點也好，征途也好，往後這關係都是必須努力付出和繼續交換溫柔。」
Sammi：「我常覺得，婚紗是一件，婚禮是一夜，婚姻則是一世。穿上身有自信就是最好的婚紗，溫馨洋溢愛的婚禮就是最好的婚禮，而細水長流式的婚烟可能就是美好婚姻的目標。」
Gigi：「今晚能成為一場姊妹，一齊祝福好朋友出嫁，每個時刻都好有愛…同歡笑同流淚，也是一種緣份！」
阿Sa：「真係識於微時之後咁多年大家跌跌碰碰 今日終於睇住佢踏入人生新嘅一頁 真係百般滋味在心頭 好感動呀！知道佢以後都會有個人好疼錫同照顧佢，真係好戥佢開心 老土都要講一句：『祝你地百年好合，永結同心！』」
入場前，成班姊妹嘅心情都好興奮同期待。
阿芝喺台上發言時，都眼泛淚光。
但係成班姊妹就喊得更加激動，Gigi形容Sammi喊到瀑布咁！
「婚禮不是婚姻」
阿芝喺籌備婚禮階段，都有好多朋友建議佢點樣搞，不過佢到最後都「咩都冇搞」，連婚紗相都冇影。因為佢一直都覺得，「婚禮是朋友聚首，影吓相，食吓嘢，輕鬆一晚。有時覺得咩都唔整，大家反而有個機會傾吓偈；說到底，婚禮不是婚姻，婚姻要hard work，婚禮就是簡簡單單開心一晚。」「婚禮嘅嘢，除了主人，no one cares！」
拍拖3個月，係咪咁愛呀？
阿芝同丈夫只係拍咗拖3個月就決定結婚，之前阿芝都喺訪問中講過，第一次約會梁先生就已經準備咗戒指求婚。喺公佈婚訊之後，阿芝就喺IG上面抒發：「訂婚發出的一個啓示：原來訂婚是否給予一個機會給疼愛你的人去表現愛。也許我平時太硬淨了，太率性了，太不容許他人去展現愛了。 」其實遇到一個「對的人」，就自然有勇氣去愛。
阿芝過去感情多姿多彩，有幾多個前度，可能都要坐低計一計。加上宣告結婚前冇耐，至公開有個「女朋友」，所以當婚訊一出，可能好多人都會質疑：「車！拍得嗰3個月，有幾愛丫！？」但係翻查阿芝嘅FB、IG，其實都留低咗好多愛嘅痕跡。
8月6號，阿芝嘅好友盧凱彤墮樓身亡當日，梁先生本來去咗剪頭髮，途中收到消息，於是立即趕返屋企安慰阿芝，事後阿芝先發現，原來梁生個頭係未剪完嘅。一個從事美術工作嘅人，竟然可以為咗所愛，放棄自己嘅外在嘅美觀，唔係愛，又係咩呢？
阿芝為婚帖寫嘅詩：「缺一塊詞 ， 原來是組成我的你。 萬盟歸一，今晚你身影圓滿故與事。」梁先生就係阿芝生命缺少嘅「一塊」。
阿芝嘅婚戒，都係同梁先生一齊親手打造，兩隻戒指由同一條白金分割而成，好有意思！
阿芝曾經喺FB發表過一段感受，主要係話梁先生就係一個個鼓勵佢勇敢去作新嘗試嘅人，敢於面對一切嘅「那一位」！
婚姻呢條路，希望你哋可以一齊勇敢行落去！
阿芝出嫁之日，下午向傳媒發放咗幾張着住裙褂斟茶畀婆婆同主婚人俞琤嘅相，阿芝婆婆笑到口都合唔埋！自阿芝媽咪離世後，兩婆孫相依為命，佢一早講明婚後依然同婆婆一齊住，認真孝順。
主婚人係阿芝嘅伯樂兼舊老闆俞琤！俞琤由細睇到阿芝大，今日見到佢嫁人，應該覺得好安慰！
原來婚宴之前都有進行過大禮同接新娘嘅儀式，過程都相當搞笑，今朝當新郎同兄弟團殺到，婆婆叫阿芝喺房裡面等候，點知婆婆掛住同孫女婿傾偈，一時太興奮，竟然唔記咗叫阿芝出嚟，直至阿姨提醒，新娘至見到新郎哥！
擔任主婚人嘅俞琤，喺婚宴中拖住阿芝進場，帶佢步入人生另一階段。
阿芝嘅婚宴會喺中環外國記者會舉行，佢話會一切從簡，只係希望同親朋好友一齊gathering， 分享自己嘅喜悅。
新房準備妥當
由於阿芝婚後依然會同婆婆一齊住，所以屋企早早已經佈置好晒喇！例如有一對好古惑嘅結婚公仔。
同埋一個剪紙「囍」字！阿婆對個「囍」字就最為欣賞！
80幾歲嘅婆婆見到阿芝結婚已經好開心，如果可以快啲抱曾外孫就更開心喇！阿芝要努力呀！
