老公完美示範 成功勸退老婆購物又不失溫柔
廣告
女人天性愛購物，有時可能貪一時之快買咗一堆雜物，依個時候身邊最好有個人可以勸自己忍吓手，而最佳人選當然係另一半！不過要成功勸退老婆購物真係唔係一件易事，近日有網友上載咗一段同老婆嘅對話，內容令人不禁嘖嘖稱奇，原因係網友用一堆甜言蜜語成功阻止老婆買衫，氹得老婆歡喜之餘又達到目的，認真高招！
撰文：Kayla｜圖片獲何先生授權轉載
網友何先生喺Facebook分享咗幾張同老婆嘅WhatsApp對話，老婆問佢件衫「好睇嗎」，何先生就神回「唔好睇，因為不是你」，簡單一句已經氹得老婆非常歡喜。
老婆其後再追問：「即係好唔好睇，如果我著」，何先生就繼續迴避問題，不置可否，反而再次讚老婆：「你著好睇過佢。」
見到老公咁答自己，老婆唯有下「最後通牒」：「我要你真實𠴱句，如果你覺得唔好睇我就唔買，快啲答我唔好講廢話。」何先生只有如實回答：「點解你咁鐘（鍾）意啲衫爛晒嫁（架）」，又答「唔好睇」。
因為何先生一句「唔好睇」，老婆就決定唔買，仲同老公講：「你真係高手，幫老婆慳返$1,000」。何先生見老婆乖乖就範咁抵錫，就再次出手氹老婆：「靚$10,000都要買，唔靚$1買黎（嚟）擺都係貴。不過老婆可以買，（只要）老婆喜歡😘」
網民大讚老公高招
何先生此番對話，令唔少網民嘖嘖稱奇，大開眼界，紛紛留言話自己「長知識」，認為「呢啲求生技能要終生學習」，更有人希望何先生開班授徒，傳授氹老婆秘笈。
老公分享「氹老婆四式」
對話一出，隨即受到網民瘋狂轉載，何先生坦言「冇諗過咁多人睇」，佢仲向讀者傳授「氹老婆四式」，各位老公學嘢喇！
1. 要讚美老婆，唔可以喺你面前讚其他人
2. 千祈唔可以一味叫老婆唔好買
3. 真誠解答到老婆問題唔可以敷衍
4. 最後都要支持你買
