邊個無家教？港媽投訴女孩盪鞦韆撞到BB飛起 網民唔撐群起鬧爆港媽

撰文：Clara | 資料、圖片來源：「生仔要考牌」、shutterstock

港媽不忿BB被鞦韆撞飛

事緣有名網民於Facebook專頁「生仔要考牌」投稿，打算公審一名港媽。網民公開對話內容，對話中港媽指自己本來帶BB到南昌的托兒中心，交托別人照顧BB，夠鐘就接回BB。回家途中，港媽帶BB到中心門口的遊樂場玩。BB對遊樂場的事物非常好奇，周圍行來行去、大叫，甚至走到鞦韆前面。結果BB被盪鞦韆的大姐姐撞到飛起，港媽自知未有看管好BB，不過更不忿小女孩的所作所為，逐將事件告知投稿的網民：「心裡面內疚，但更嬲啲細路明明見到BB行，仲唔停（，繼續盪鞦韆），心入面好嬲，覺得佢哋真係好無家教！」

網民聽完港媽抱怨，覺得港媽為人很有問題，於是以港媽的思維提出另一個例子：「即係咁，我見到馬路嗰啲車喺度行嚟行去，我覺得好好奇，跟住我行咗出馬路，點知被啲車撞飛我。我真係好嬲，啲司機明明見到我都唔停！真係覺得佢哋好無家教！」網民解釋，責任根本不在其他人身上，而是港媽與BB身上，但由於現在BB年紀小，還未分辦到是非對錯，所以責任理應落在媽媽身上：「大佬呀，其實韆鞦唔係話停就即刻停到㗎。唔通因為見到有BB就唔可以玩咩？自己、BB同韆鞦範圍保持距離仲好啦！」

網民因自私家長 身受其害

帖文引來很多網民留言，有網民因帖文勾起以前不快的回憶，批評港媽妄顧仔女與其他遊樂場使用者的安危：「小學嗰陣試過玩緊鞦韆，之後有個小朋友無啦啦喺我面前跑過，我撞到佢，之後佢老豆走過嚟鬧我。我嗰陣都好細個，完全唔知點好，惟有不停唔好意思。聽到小孩喊，被人鬧到狗咁，個刻驚到自己都喊……但依家諗返起，明明係佢自己跑過嚟，關我咩事？童年陰影真係多得呢啲無牌家長唔少。」

除了心理傷害，另外有個網民仲慘，造成永久身體傷害：「當年我四年班，打緊鞦韆，突然有個BB打橫行出嚟，我即刻扭避，最後鞦韆撞唔到個BB，但我就撻落地下。以前遊樂場是沒有軟墊，我臉部著地，撞崩咗隻門牙，結果我由10歲開始便崩牙直到現在。佢話人唔停無家教，佢有冇諗過突然剎停，最後受傷嘅可能就係玩緊鞦韆嗰個？個BB走咗去⋯⋯阿媽直頭無見過⋯⋯我記得自己喊住返屋企。」他提醒大家急停鞦韆很危險，千萬不要學習。

網民批評港媽無家教

亦有網民批評港媽未有看管好仔女，懷疑她只顧玩電話，卻不自覺有問題，反而將責任推在其他人身上：「你唔係應該喺後面跟實佢嘅咩？見佢行近就已經要跑快兩步啦！」、「自己都唔控制個BB」、「你接個B係咪應該拖實佢呢？坐喺上面盪鞦韆嘅細路應該都鬧你冇家教」、「我都覺得好無家教，有無教BB講唔好意思？」、「又係啲要人就自己小朋友嘅家長…地球好危險，做咩要生佢出嚟？」、「我仔好細個嗰時，我就教去公園韆鞦嗰邊要好小心，唔可以行咁近，自己唔教又話人，賴地硬」、「自己唔管住自己嘅小朋友，仲怪其他人？成個公園唔係只畀你一個BB玩」、「如果下次個B衝出馬路，咁係咪又一句『捉佢唔住』搞到個仔條命就咁斷送？」

最後他們給予港媽一些「建議」，揶揄她一番：「打鞦韆有得剎制？叫政府裝break啦！」、「帶多啦A夢時間停止器囉」、「應該叫人自己掛上去上面條鋼條度，等冇人先拋番落嚟再玩」