張繼聰哄老婆有橋又有戲 森美認口衰 自嘆不如
廣告
早前喺電台節目訪問人妻王謝安琪，阿Kay提到老公張繼聰平時係點哄自己時，令森美都自愧不如，究竟張繼聰出咩招咁厲害呢？
撰文：Sunday Kiss 圖片：新傳媒資料室、謝安琪IG、張繼聰IG
森美自認把口衰
成日喺電台節目同專欄教人追女仔嘅森美，舊年拍《森美旅行團》時，喺日落之下發表嘅愛妻宣言，令好多女性同胞都感動不已。
不過早兩日喺電台節目《公子會》，森美在訪問阿Kay謝安琪時，就自爆自己平時「口衰」，成日激嬲太太！
森美話：「女人成日都會問，『我有冇肥咗呀？』咁我以前就會話『你運動又運得少，跑兩步又嗌停，你點會瘦啫！』」Mean到連阿Kay都問「咩事呀你？」
點知落井下石都仲未夠，自稱對運動好認真嘅森美，仲要攞個計數機出嚟，同森美嫂計卡路里，森美嫂唔嬲到黑面行開至奇啦！阿Kay都睇唔過眼話：「你估佢而家需要個PT（私人教練）咩？」
講到呢方面，阿Kay都忍唔住要放一放閃，事關老公哄佢嘅方式，真係一種藝術！「我而家問張繼聰『我呢排有冇瘦咗呀？』佢就『咦！你企喺邊度呀？瘦到見唔到你呀！』森美聽完，都不禁叫絕！度哂對白，仲要交埋戲，邊度有得輸！
阿Kay講得興起，仲愈講愈多，話老公平時好多呢啲小心思！「好似平時行過我身邊，佢就會『哎呀～』咁扮跣一跣，跣咗出去！然後話：『嘩～好滑呀！』」
雖然阿Kay聽完係回咗句：「嘩～唔好咁啦！大家咁熟！」但係講完自己又忍唔住甜笑！
森美聽完阿Kay放嘅閃光彈，本來都話想請張繼聰嚟做節目嘉賓，但係講講吓就後悔喇！「唔可以俾佢拉高個standard，咁搞法我哋啲男人要做多好多嘢！」
