張繼聰一家球場晒幸福 單手抱囡囡「的」波 Man爆！
廣告
張繼聰日前喺網上po咗段抱住囡囡「的」波嘅短片，不過網民嘅焦點都落喺佢嘅肚腩上，發現阿聰以往fit爆嘅身材竟然走晒樣！而阿聰就解釋原來一切都係為咗角色⋯⋯
張繼聰 為角色無悔
張繼聰日前帶住老婆謝安琪、囝囝張瞻、囡囡張靖(乳名KaKa Ball)一家四口去到石門嘅賽馬會傑志中心參加活動，佢喺網上po咗段片，留言話：「諗住『的』番一兩個鐘係個囡面前威吓，點知個波唔合作」原本焦點應該係佢又要抱住囡囡又要「的」波有幾高難度，但網民嘅金睛火眼第一時間留意到阿聰以往fit爆嘅身材竟然走晒樣，凸咗個肚腩出嚟！不過阿聰都好快作出回應：「將個焦點放係我個肚腩嘅朋友仔們，留意番，無錯，我係重咗幾十磅 (為咗角色，我無悔)」唔知係咩角色令阿聰要做咁大犧牲呢？
張繼聰單手抱住囡囡「的」波，要保持平衡，的確有啲難度，難得佢只有一兩下係「的」歪咗，都算係咁，不過個肚腩無論喺咩角度睇，都真係好凸出喎！
之後張繼聰再上載同囡囡KaKa Ball單獨喺草地上玩嘅短片，仲攬到實一實，標明話係「浪漫」，sweet到呢，小心老婆呷醋呀！
睇翻昔日張繼聰嘅爆肌相，唔只有胸肌同腹肌，仲要操到青筋都現埋，真係拍得住張家輝當年拍《激戰》咁fit！
