張衛健 張茜共同面對兩度流產 細數10對圈中恩愛多年夫妻
撰文：東方新地｜圖片：新傳媒圖片庫、朱茵、黃貫中微博 、劉青雲IG | 原文刊於：東方新地
1.張衛健 陪伴太太經歷兩次流產
張衛健與張茜，一個來自香港，一個長在內地；一個來自單親家庭，一個從小受父母寵愛。不同家庭背景與成長經歷的人在片場相遇。至今兩人已經相識20年，結婚了11年，兩人的愛情經歷了很多波折。
1998年，張衛健與張茜相識，兩人共同出演電視劇《陳夢吉傳奇》，兩人有很多對手戲。張衛健經常主動找張茜一起對台詞，後來張衛健對張茜產生好感。當拍攝完《陳夢吉傳奇》後，張衛健邀請張茜一同去泰國旅游。在異國他鄉快樂地遊玩之餘，張衛健直言不諱地問︰「如果有天我真的破產，我們是否還能在一起？」張茜毫不猶豫地說：「本來我現在跟你在一起時，你也不是很富有！」短短一句話卻重如泰山，讓張衛健倍感溫暖。
張衛健曾對婚姻極度抗拒
直到2004年，張茜覺得已經拍拖數年，是談婚論嫁的時候，而且她還希望早日生個小孩，圓自己的母親夢。可每當張茜提到結婚生子這個話題，在不幸福的家庭中長大的張衛健，對婚姻極度抗拒，所以總是刻意回避，表示心中根本沒想結婚的事情，更談不上要生兒育女。面對張衛健潑來的冷水，張茜一怒之下搬離兩人的愛巢，兩人的戀情就此告一段落。
自從和張茜分手後，張衛健一直對張茜念念不忘，終於忍不住寫了封信給張茜。表示理解張茜的心思，知道女人們都是希望自己可以有個好歸宿，又指自己一直在克服障礙，拼命工作是他的逃避方式。張茜看著信，感動得淚如雨下，便打電話給張衛健，第一句話便說︰「從今往後，無論什麼時候，出現怎樣的情況，潮起潮落我們都一起度過！」
後來張衛健回到北京，決定向張茜求婚。張衛健並不是一次求婚便成功，由於第一次求婚連戒指都沒有準備，雖然張茜答應了，但他怕太太埋怨，於是又求了第二次婚。其實早在張衛健遇上股災瀕臨破產時，看到張茜對他依然不離不棄，張衛健一早已認定了張茜。
2007年，張衛健終於跟張茜在北京註冊結婚。之後一年，張茜懷孕，卻在懷孕8個月時，醫生發現張茜腹中女嬰心跳不正常，張茜告知張衛健。張衛健馬上丟下工作返回北京。當他抵達醫院，腹中的女兒突然停止了心跳。兩人哭得天昏地暗。此刻，張衛健體會到人生中從未有過的緊張，他非常擔心張茜流產後會出現心情抑郁，因而推掉一切工作，24小時寸步不離地陪伴著她，全心全意照顧太太的身心靈。
求婚兩次 婚禮選址暗藏愛意
那時，張衛健亦決心不再隱瞞，要把舉行婚禮的喜訊告知天下，徹徹底底地給張茜一個名份。張衛健還對張茜說︰「這麼多年，我拍過電視劇、電影，出過唱片，唯一沒有做過的就是結婚！我要辦一個最浪漫的婚禮，讓你在2009年農歷新年前做一個最幸福的新娘！」令張茜高興極了。
2009年，張衛健在菲律賓補辦大婚。婚禮選址在有四百多年歷史的菲律賓聖奧古斯丁教堂中舉行，寓意著兩人的婚姻屹立不倒。
共同面對兩度流產
2014年，張茜再次懷孕。這次兩人加倍小心，可惜懷孕8個月後，孩子還是走了。一對經歷了兩次流產的夫妻，確實是受到很大的打擊。
時至今日，太太流產一事對張氏夫婦陰影猶在：「如果上天讓我倆選擇，一是我們一擊即中有小朋友，或永遠不會再有小朋友，我寧願選後者，因為我們曾經歷傷痛的回憶，不敢再去面對多一次。」但這件事並沒有影響到兩人的感情，還經常在微博上分享兩人同行旅遊的照片。
兩人結婚11年，還能恩愛如初，可謂圈中的模範夫妻！
2.朱茵 全力挺夫
多年來朱茵對阿Paul的支持未停過，近年她復出幕前依然吃得開，更不時出面力撐阿Paul的所有演出與工作。上月阿Paul與夏韶聲、單立文等人在紅館舉行一連兩場《搖滾大俠奏HKBAND演唱會 》，右眼爆微絲血管的朱茵唔止帶埋黃鶯捧場，仲讓囡囡上台獻花，阿Paul接過花後跪低抱著愛女，父女更當眾錫錫。
近年朱茵阿Paul簽同一經理人發展，早前夫妻檔拍廣告，仲出動埋家中愛犬，主力sell溫馨。
恩愛20年
每年大時大節或朱茵生日，阿Paul都在社交網po相示愛，盡顯鐵漢柔情一面。
去年12月，朱茵憑內地電影《二次初戀》勇奪中美電影節影后，阿Paul在慶功宴上啜爆老婆。
今年情人節，阿Paul又寫詩冧朱茵，閃爆社交網。
3.劉青雲 郭藹明慶瓷婚
劉青雲同郭藹明(Amy)這對圈中模範夫妻，自94年拍拖，98年6月17日拉埋天窗，早前正正係二人結婚20周年，恭喜晒！這對令圈內、圈外人人羨慕的夫婦，結婚20年依然恩愛甜蜜，兩人婚姻的保鮮秘技，原來要多得雙碩士港姐老婆郭藹明，持家有道之餘仲溫柔識撒嬌，成功將老公治得貼貼服服！
結婚20年，劉青雲和郭藹明這對今年步入「瓷婚」的圈中模範夫妻，至今行街仍會甜蜜拖手，恩愛羨煞旁人，能夠令婚姻保鮮，劉青雲坦言全靠老婆郭藹明功勞，他大讚老婆說：「太太係我人生最好嘅禮物，佢好聰明，我鍾意咩、唔鍾意咩，唔使講佢都一清二楚！」
人生最大膽一次
事實上，當年鼓起勇氣追求現任劉太，劉青雲曾表示這是他人生最大膽一次。據知情者透露：「青雲同Amy 拍《大 時代》嗰時仲未拍拖，佢兩個喺埋一齊都係多得周慧敏撮合，94年Vivian開演唱會，因為知道青雲對Amy有意思，就邀請佢兩個一齊去睇演唱會，幫青雲製造機會，不過之後青雲再約會Amy，都要鼓起好大勇氣，始終當時Amy有學識又靚，而青雲事業先啱啱起步，冇車冇樓，第一次約 Amy去街，青雲仲硬住頭皮叫Amy揸車去接佢，然後一齊食飯，所以到依家佢都成日提起，好感激老婆當時冇嫌棄佢！」
復出要問准老公
眾所周知，郭藹明是美國南加州大學機械工程學雙碩士，當年Amy為青雲放棄工程師工作。想不到人妻婚後至今，仍然為陪老公放棄復出；三年前《大時代》翻播，一眾演員被炒熱，當時就有唔少人邀請Amy復出。Amy友人透露：「嗰時同無綫都出嚟傾咗幾次，不過除咗睇角色， Amy最著重係時間，講明一定要就咗老公檔期先，最後都因為怕困身陪唔到老公，所以傾唔成！」事事老公行先又識得撒嬌，相信就是郭藹明維繫甜蜜婚姻最佳秘技！
4.吳岱融 鍾淑慧 結婚23年
吳岱融與鍾淑慧結婚23年，婚姻也曾因摩擦出現暗湧，年初他曾推出情歌〈回去愛你十億秒〉送給他眼中賢良淑德、默默付出的老婆鍾淑慧，更夫妻檔拍MV，情到濃時咀嘴，MV更由囝囝負責剪片。
互相扶持23年
89年拍拖，95年結婚，吳岱融與鍾淑慧經歷23年的婚姻，感情亦曾有過高低起伏，97年兒子Justin出世，二人忙著工作，兒子從小由婆婆湊大，不過近年他們一直把他帶在身邊，早年在國內奔波，夫婦二人決定定居番禺，安排兒子入讀當地的國際學校，前年Justin要返新加坡服兵役，吳岱融又陪仔返老家定居兩年，一家三口感情深厚。現在到吳岱融要留港搏殺，妻兒都在背後支持。
5.苗僑偉戚美珍 恩愛28年
外表睇唔出已經「登六」嘅三哥苗僑偉，同老婆戚美珍原來結婚已有28年，依然咁恩愛，三哥嘅大女苗彤亦都27歲大個女，前年仲成為港姐嘅御用攝影師，而24歲嘅囝囝苗俊就長駐喺加拿大。
一定照顧她一生一世
其實從以前開始三哥畀人嘅感覺已經係好瀟灑、成熟穩重，82年苗僑偉同戚美珍合作《飛越十八層》擦出愛火，90年結婚至今已經28載。雖然三哥間唔中都會傳出緋聞，但戚美珍依然相信三哥，三哥接受本刊訪問時曾經講過：「佢 (戚美珍) 為我生小朋友，每個人年紀都會大，樣貌會變，冇理由生完小朋友就丟咗佢，做男人要學識承擔，同你生活咁多年，唔可以半途拋棄佢，結婚時已經係一個承諾，我同太太經歷過好多風浪，一定照顧佢一生一世。」深情告白，難怪兩公婆能夠恩愛如此。
當年嘅三哥同三嫂！
82年 拍《飛越十八層》定情
82年苗僑偉同戚美珍喺《飛越十八層》擔任男女主角，三哥更一人分飾兩角，劇集大受歡迎，除令兩人走紅外，亦係兩口子定情之作。
87年29歲嘅三哥三嫂繼《飛越十八層》後，喺古裝劇《天龍神劍》再以情侶檔姿態示人，劇中兩人著古裝奉旨談情，份外溫馨甜蜜。
苗僑偉、黃日華半裸露點同師妹戚美珍大玩3P型格合照，當時已同戚美珍拍拖，相中黃日華仲keep住《過客》髮型，當年男星未流行爆肌，難得一見二人騷胸肌，勝在罕見。
6.梁家輝同老婆恩愛31年
60歲梁家輝與太太江嘉年87年結婚，至今恩愛足31年，早前5月20日，囡囡Chloe同Nikkie特別為兩人親手炮製咗一個靚靚蛋糕嚟慶祝，梁家輝仲一邊攬實老婆，一邊伸晒脷咁同老婆鬼馬合照，動作充滿童真。
之後佢又捉實老婆手仔一齊切蛋糕，認真sweet！
31年前嘅擺酒相，值得紀念！
仲有梁太江嘉年後生時嘅靚相，相當珍貴！
日常嘅恩愛照。
好sweet呀！
7.馬德鐘同太太 結婚25年
早前，馬德鐘50歲生日，翌日又係佢同太太張筱蘭結婚25周年紀念(銀婚)嘅大日子，馬太喺微博上載咗多張二人由拍拖到結婚嘅相片，並留言話：「由12歲開始認識你，到今天與你結婚步入4份1世紀，感恩一直同行。人生就是要將今天活得比昨天好。銀婚快樂！」
連當年前G4馬德鐘學堂畢業照都有！
而馬德鐘亦有轉載太太嘅發文，仲留言回應番老婆：「必須要每天都過得比昨天好。」好恩愛啊！
8.黎耀祥結婚近21年
三屆視帝黎耀祥同老婆梁耀蓮(Julia)結婚近21年，一直咁恩愛，問黎耀祥夫妻相處之道係點？佢話：「我哋相處係OK嘅、舒服嘅。學習啦，我成日覺得做人都係不斷嘅學習，做老公、老婆、仔女都好，因為無經驗，大家都係嚟到呢一世先識嘅啫，上一世點做我又唔記得咗，所以教仔嘅方法、同老婆相處嘅方法，其實每日都學緊。係咪好恩愛？其實我哋都有衝突㗎，一樣嗌交、一樣有唔開心嘅時候，我同我太太好明白，兩夫婦點樣走埋人生嘅路，最緊要大原則要好相同，譬如對錢銀、人生嘅步伐要同步或者近似，好彩我哋喺價值觀上都幾一致，又唔係太過緊張、又唔係太過hea，兩個都係積極做好自己嘅嘢，知足、努力，變咗兩個人行一條路，比較容易行。其實大家都知婚姻去到尾真係一個伴，個伴要啱，先至係一個伴，如果唔係盞搞，搵個人嚟喺身邊嗌交，咁不如自己一個好過啦！哈哈哈！」
有break就返屋企食飯
講到黎耀祥夫妻將親子關係做得好好，同囝囝都好close，黎耀祥直言：「OK㗎，其實我好著重，因為我成日覺得，好多人成日話為家庭做好多嘢，但到最尾忘記咗家庭，我分好多時間畀屋企，好彩我個人冇乜應酬，我唔係好鍾意應酬，又冇乜朋友，以前我收工就返屋企，有個break就返屋企食個飯，變咗我同個仔相處嘅時間好多，到佢大個，就會同我哋close好多。」
9.姜大衛李琳琳結婚44年
姜大衛同老婆李琳琳結婚44年，出名係圈中模範夫妻，11年李琳琳患上大腸癌，姜大衛停工悉心照顧老婆，陪她捱過最辛苦的化療期，姜大衛坦言：「嗰段時間我的確係好擔心，唯一可以做嘅就係共同面對，40幾年感情，其實唔需要講出聲都知，大家都係冇咗對方唔得！」
早前姜大衛就陪老婆恩愛出巡，當日John哥駕車同老婆到又一城，原來是約了岳母及老婆家人吃越南菜，即使全女班，John哥亦唔介意融入女人堆，同班女人有傾有講，之後老婆想行街，更做跟得老公陪老婆去揀化妝品，任老婆慢慢揀慢慢試，等足半小時一樣毫無怨言，然後再做司機接載大家，老夫老妻仲咁恩愛，的確羨煞旁人。
10.姜皓文同老婆殷寧 恩愛18年
姜皓文與殷寧(原名金慧英)結婚18年，人前人後表現恩愛，去年結婚周年紀念日，黑仔更送上檳城一層樓給殷寧，揚言要與摰愛「牽手相伴甘苦與共」。黑仔對於老婆多年來的遷就更是感恩，雖然時有嘈交，不過二人很珍惜這段關係。
拍拖行名店
黑仔笑言同老婆結婚十八年嚟成日嗌交：「初初結婚唔識得點去珍惜，唔識點去處理婚姻生活，兩個人生活，唔係咁簡單，唔係話住埋一齊，你就我、我就你，真係有種節奏喺度，大家要配合得好好。我覺得最忌一樣嘢，兩口子點樣發脾氣、點樣惡都好，唔好講啲真係太傷人嘅說話，一次就你、兩次就你，三次就真係唔得㗎嘞，唔可以郁啲話離婚、分開，千祈點嬲都要忍住唔可以講，除非你唔想段婚姻長久落去啦！老土啲講句人氹人係OK嘅，個節奏咪大家盡量去配合囉！」
去年10月，姜皓文趁結婚18周年，喺馬來西亞檳城買樓送畀太太。
愛玩煮飯仔
問佢閒時同太太做咩多？黑仔回答：「我有我，佢有佢，哈！佢鍾意啲花花草草，好鍾意魂遊太虛諗啲佢自己世界裡面嘅嘢，但係每年我哋都會一齊放假去旅行，因為我哋生日同結婚周年連住幾日，平時就一齊煮吓飯，依家我唔鍾意出街，飲酒又唔揸得車，我依家都少飲，因為我好控制唔到自己，我會追酒飲，飲完亂晒籠，又斷片，好恐怖㗎，試過同朋友返內地飲酒，飲到唔見咗我，我去咗第度唔知同邊個飲，瞓醒褲袋一大疊咭片，所以好危險。」
