張達倫攜老婆影大肚寫真 走型格、唯美路線
大玩型格唯美風格
張達倫穿上襯衫西褲，太太穿上透視黑色長裙，大玩型格主題！二人表情也十分交戲，擺出一副模特兒「Chok樣」。
另一輯相玩溫馨風格，跟型格主題形成強烈對比。張達倫太太Kimmy換上白色紗裙，肚子若隱若現，加上光線的配合，整體感覺十分唯美。
二人低頭微笑，輕撫肚子，畫面充滿著愛意。
張達倫：大肚婆都要做運動！
周日有什麼好活動？張達倫就跟太太到郊外散步，做運動兼享受二人世界。
散步之餘，當然不忘幫太太影靚相！
Kimmy的肚子已經十分大，令網友留言猜測她是否「陀孖B」。
張達倫 愛屋及烏
張達倫與Kimmy早於大專時期認識，Kimmy是達倫哥哥讀酒店課程的同學，當時兩人都各自有男女朋友，沒有走在一起。縱使相識多年，一直有聯繫，但各自有生活，Kimmy曾與一名外國人結婚，育有一個囡囡，現已13歲。離婚後與達倫在一個聚會中重遇，方發覺雙方就是Mr. and Mrs. Right，拍拖兩年決定舊年11月拉埋天窗，影婚紗相都帶同繼女一齊去，愛屋及烏。雖然達倫與繼女並非一齊住，但仍時刻關心對方：「我哋關係十分之好，我同佢好似朋友，我都大唔透。喺呢個時代唔可以再用長輩同後輩之分，小朋友唔會想同你溝通，佢哋已經成日對住部電話，你再敦起個款佢哋睬你都傻啦，所以我同佢會保持朋友關係。」Kimmy指囡囡也很喜歡繼父，出街食飯都會叫繼父一齊，又留意他所演的劇集。
太太預產期 比張達倫的生日僅早一天
今年10月兩人將迎接B仔出世，預產期比達倫的生日僅早一天，張達倫認為生日、父母親節等節慶，應該與父母慶祝，「我生日每年都希望同媽咪食飯慶祝，嗰日最辛苦其實係媽咪，唔係我㗎！」張達倫最希望囝囝有個快樂的童年，並將自己最好的教給兒子，幫助囝囝發掘長處，一齊踢波，長大後為興趣而工作，而非單純為搵錢去做工。
生仔生女隨緣
B仔即將出世，張達倫和Kimmy的心情既開心又緊張，達倫看見太太懷孕咁辛苦，對佢自然寵愛有加，每日也陪伴老婆左右，寧願自己睡少一點。達倫笑言生仔生女都好開心，但他坦言生仔會令兩邊家族感覺圓滿一點。「我阿哥啱啱生咗個女，老婆幾個家姐全部都係生女，加埋我繼女，所以今次係仔就覺得成件事好圓滿，唔使再生都得啦。」真的一個夠晒數？「唔知呀，睇吓生咗呢個點先啦，生多個對阿仔嚟講有個照應，好多人都叫我生多個嘅，隨緣啦。」
行街細心拖實
早前張達倫和太太去中環IFC行街街，二人去超市買了飲品和食物，埋單畀錢同拎戰利品全由張達倫包辦，臨走攞車，張達倫又一個箭步行去畀泊車費，然後再光速飛番去傍住大肚老婆，見佢全程好似保鑣一樣咁貼身，其實張達倫不嬲都有風度出名係好男人，加上老婆臨盆在即，緊張啲都好正常！
