古天樂榮登最孝順影帝
撰文：Sunday Kiss 圖片：東方新地、ViuTV截圖及古天樂專頁
最孝順影帝
古天樂從影多年，演出角色無數，但之前竟從未攞過電影獎項。不過古仔今年在《殺破狼‧貪狼》飾演一位任警察的單親爸爸，罕有地親身上陣演出連場動作場面，內心戲又有感染力，最終佢憑此片打破宿命，在「第37屆香港電影金像獎 」中，首奪金像獎影帝！
首次演單親爸爸
古天樂的得獎作品，是由葉偉信執導的《殺破狼‧貪狼》，電影講述由古天樂飾演的香港警察李忠志得悉，其15歲女兒阿芝在芭堤雅旅行時突然人間蒸發，於是親赴泰國尋找失蹤女兒下落，幸得當地華人探員崔傑和同袍Tak協助追查，眾人根據線索，得知其女兒失蹤的原因，與曼谷市長候選人及其幕僚有關。
日日都係阿媽嗌起身
首奪影帝殊榮，古天樂天在台上公開感謝家人支持！「我想好想好想，多謝我屋企人！其實我咁大個人，都係同屋企人一齊住，每一日都係阿媽叫我起身。我唔可以唔同我屋企人一齊住。我覺得一個人，最緊要有一家人嘅支持。就等如我哋香港電影，一定要我哋所有香港人支持，我哋先可以將香港電影再做得更加好。」
絕頂孝順仔 最鍾意同父母遊埠
古天樂向來低調，外界對其私生活了解甚少，只知道佢鍾意買玩具。其實佢唔駛拍戲，一有時間就會同父母一齊去旅行。
舊年聖誕，佢就趁機帶父母到芬蘭睇北極光。仲話自己細個一直夢想可以去芬蘭聖誕老人村，仲話芬蘭係個唔錯嘅旅行目的地，亦因為有聖誕老人村及有機會欣賞到北極光，所以適合帶同老人家一起遊覽。咁貼心，又咁為老人家設想，「最孝順影帝」，非佢莫屬啦！
低調慈善家
古天樂因2008年目睹汶川地震摧毀咗好多人嘅家園，先決定成立「古天樂慈善基金」，幫助有需要嘅人，佢仲出錢又出力，私下經常跟進同了解興建學校慨進度，確保唔會出現豆腐渣工程。
曾幫「大佬B」還巨債
除咗低調做善事，古天樂喺圈中仲幫助過唔少人度過難關，「大佬B」吳志雄曾經公開感謝古天樂喺佢最困難時支持佢，據知「大佬B」喺1999年投資失利，蝕咗近億元，古天樂因為喺未紅時曾受過「大佬B」恩惠，所以幫佢還清巨債。此外，仲有指古天樂為感謝《陰陽路》監製南燕多年前嘅賞識，當對方患病時，一直喺經濟上支持對方，仲會久不久包機票、酒店請南燕一家去旅行。有傳古仔仲一直照顧前度女友黃𨥈瑩，每月都有畀生活費對方。
