怪獸家長玩手機懶理小孩亂叫　餐廳推1絕招父母投降　網民直指大快人心！

家長低頭玩電話懶理小孩於餐廳哭鬧　新加坡餐廳用1招即起阻嚇作用

不論乘搭公共交通、餐廳用膳、街上行走，不少人都怕遇到不受控制或大哭一場的小朋友，最怕的並非「未懂事」的小孩，而是應懂事但又懶應付的家長。曾有不少網民希望在飛機或地鐵中設立成人專區來避開「麻煩」，「專區」一日未見，先見餐廳老闆出招。很多人都指新加坡做事速度快，就連對付怪獸家長的速度都快人一步。新加坡餐廳「Angie ‘s Oyster Bar and Grill」在推行一個絕招：有網民指「一旦預約這家餐廳時便會收到確認訂位的簡訊，內容就預先警告客人，一旦小孩大聲吵鬧或失控，便會加收10新加坡幣當罰款」。

餐廳指措施為提供舒適的用餐環境　加收兒童吵鬧費阻嚇成效顯著

對於這項措施，店方曾解釋指過往收到太多投訴，店內常有小孩跑來跑去或騷擾其他客人，但家長又不加以監管，指「咁樣其實好危險，店員成日都拎住熱嘅食物同鋒利餐具，同時都好唔尊重客人」。為提供舒適的用餐環境，加收兒童吵鬧費是一個具阻嚇作用的方法，餐廳更表示「自從用咗呢個方法之後，確實嚟食飯嘅家長都唔敢放任小朋友，整體情況改善，對於所有人而言都是雙贏。

自稱「非兒童友善餐廳」　家長極度不滿：好無禮貌！

自從8月有網民在網上分享餐廳的新規矩後，有不少家長都表示極度不滿，斥其自稱為「非兒童友善餐廳」的舉動非常不禮貌，揚言不會光顧，指「我知有時小朋友嘅舉動係會影響到其他客人，但呢間餐廳可以用禮貌啲嘅方法去解決，而唔係好似而家咁。」不過餐廳亦有解釋，指99% 客人都非常理解此做法，「我知無辦法取悅到全部人，但可以盡最大努力制止自我中心行為，大家都要互相尊重。」

網民表示極度認同　港人：香港餐廳可唔可以仿效新加坡？

家長表示反對，但有更多的網民表示極度歡迎，就連港、台網民都紛紛發聲。有港人指「果然講到底都係要用錢去解決，一講錢班家長就即刻驚」、「其實如果唔係你班家長平時懶懶閒唔理啲細路，又點使逼到人哋出絕招」、「你估人哋出呢個措施唔使煩㗎？接你哋班家長投訴同埋逐個解釋都要時間㗎」、「唔想被罰錢咪放低部電話，望多兩眼自己個細路囉」、「家長本身都係有責任去看管小朋友，你話佢喊控制唔到都算，周圍跑都話管唔到，你唔好生小朋友啦」、「香港餐廳可唔可以都咁做，啲港爸港媽係要畀人懲罰吓」。

網民分享經驗：個細路係咁跑，個家長望咗眼就唔理

另外，網民指家長怪責別人沒有同理心前，應自我反省一下自己有沒有公德心。有網民分享曾在一間Cafe與朋友打算Chill一下，但遇著頑皮「坐唔定」小朋友於附近吵吵鬧鬧，四圍跑撞到人，但其家長卻坐在一邊自己玩電話，「最後個細路真係太騷擾，已經警告過佢幾次都唔聽，最後我選擇Kick低佢，佢啊媽先過嚟抱走佢」。說到底，網民指「唔係間餐廳或者街外人想討厭小朋友，而是家長逼人「唔鍾意你個細路」。

通情達理家長：絕對贊成　最憎人成日覺得有小朋友大晒

有家長表示贊成這種措施，「我個仔兩歲前不受控，係好少出街食，唔想騷擾人。最憎人成日覺得有小朋友大晒」，獲網民大讚通情達理，多一些家長有這種想法就天下太平了。有媽媽認同，絕對贊成這個措施，又提議另一項措施：「又或者劃分區域，唔想俾騷擾可以選擇。」她認為好多地方都有標明不招待6歲以下小朋友：「有時小朋友唔受控，唔駛班家長難做。」