愛妻如命 林文龍 拒做怪獸家長

撰文：Sunday Kiss
圖片：微博、TVB.COM、新傳媒資料室

拍劇結緣 相愛22年

林文龍 跟郭可盈於1995年合作拍攝《萬里長情》結緣，當年佢哋拍完劇集就開始拍拖。兩人拍拖初時不被外界看好，全因女方名氣比林文龍高，加上郭可盈出身豪門，經常傳出很多不實流言。林文龍和郭可盈拍拖九年後結婚，時至今年已經結婚十三年，雖然結婚五年時曾被指有小三介入，但兩小口子今時今日仍然十分甜蜜，婚變傳聞不攻自破。

專一顧家 愛家又愛妻

林文龍 於新劇中飾演花花公子，跟中港台三地女生有不少親熱戲份，但卻沒有阻止老婆郭可盈觀看，老婆捧場之後更加大讚佢演技躍進。現實中的林文龍跟劇集中的角色完全是兩個人，不但專一愛妻，凡事以家庭為重，加上自己同老婆都不愛夜蒲，每天最期待就係做完嘢返屋企。

老婆係「惡妻」？

多年來老婆郭可盈被外界形容為「惡妻」，記者直接向他求證老婆是否惡死要話晒事，林文龍的回應認真得來又不失幽默：「咪住先，你呢個傳聞邊度聽番嚟先？係咪嗰啲知情人士透露或者身邊好友爆料㗎？佢係一個比較強勢嘅女仔，而且比我strong，可能因為強勢令某啲同佢合作過嘅人誤以為佢好惡，我完全唔覺得佢惡死。」林文龍肉緊為老婆澄清之餘，對老婆的愛、支持、疼惜亦隱跡於字裡行間。

女兒奴拒做怪獸家長

囡囡林天若（津津）出生後，林文龍更變為女兒奴，指囡囡為他帶來的快樂是無價的，所以每天工作過後都會即刻飛返屋企睇囡囡。雖然兩老婆極度疼愛津津，但就拒絕做怪獸家長，林文龍直指：「唔需要任何原因，只要望住個女我就會笑，望住錢係唔會咁笑。我同可盈一早有共識，囡囡成長過程以開心健康為大前提，壓力點都要有少少，冇壓力就冇動力，同時唔想佢承受好大壓力。唔一定要做叻人但一定要做個好人，一個人心地唔好幾叻都冇用。」

為愛女 幫老婆推劇

林文龍慶幸與太太對教育女兒的理念相同，不希望囡囡有太大的學習壓力，佢話：「我同老婆講到明，就算將來阿女入到Top 3嘅傳統學校，如果日日有幾樣功課做到半夜，連陪我嘅時間都剝削埋，我一定會幫佢轉去國際學校。」此外，林文龍亦奉勸各位想誠邀或重酬利誘郭可盈復出拍劇的人可以死心，因為囡囡唔容許媽咪離開身邊超過三小時，佢解釋：「佢兩個好似twins一樣，五年嚟冇分開過。我出去做嘢阿囡就同我講bye bye，阿媽出去做嘢佢就話唔好啦，做嘢留番俾daddy啦，媽咪喺屋企斟吓水得啦。」

問十次都答你生女

話文龍係女兒奴真係無錯㗎！佢話：「生女好唔同㗎，有日我個女無啦啦同我講，爸爸你真係好好，你等 我大個，我要同你結婚。聽到呢句說話真係甜到呢！你問我十次我都答你生女，你依家唔鍾意，生咗你就唔係咁講。你睇吓方中信，初頭夠話唔鍾意囉，睇吓佢依家對住個女個樣！」