感激老婆悉心照顧 陸永：依家係我照顧返你嘅時候了
廣告
農夫一連六日舉辦《農夫等錢洗演唱會2017》，演唱會迴響極佳，並於14日圓滿結束。成員陸永昨日於Instagram發表「愛妻宣言」，感謝勞苦功高的老婆Reina，並冧爆咁話：「而家係我照顧返你嘅時候了。」
撰文：Sunday Kiss
圖片：6wing_fama@instagram
感激老婆悉心照顧
結婚6年，陸永同老婆Reina一向於人前人後都咁恩愛，二人亦經常於社交網站發表「愛的宣言」。日前，農夫於麥花臣場館舉行六場演唱會，廿四孝老婆Reina當然要親身到場支持！除咗現身撐場，陸永仲話老婆每日不辭勞苦為佢管接管送。Reina近日病咗，但都因為怕傳染老公而戴住口罩瞓覺。朝早咳得特別厲害仲會特登掉去床尾瞓，甚至走埋出廳。
原來陸永將呢一切都放在心上。佢話過去呢幾日都只係顧住自己嘅事，將太太嘅關心當係理所當然，冇好好咁關心過佢。佢留言話：「對唔住，陸太，請好好保重，多謝你。而家係我照顧返你嘅時候了。」相信陸太見到呢番說話就已經甜到漏，加上有陸生照顧，一定會好快好返啦！
早前，陸永仲發文叫大家喺演唱會見到陸太時要同佢講聲唔該。原因係喺演唱會前陸永把聲突然沙晒，老婆Reina為咗佢走勻港九新界去搵開聲茶，又為佢沖養聲水，發護聲膠。陸永話如果冇太太嘅照顧都冇辦法撐到去正式開Show。
結婚6周年高呼我愛你
上年搞到咁大，今年無理由唔做返啲嘢㗎喎！今年陸永繼續出動送花攻勢，仲話想準備驚喜冧老婆，點知就俾Reina識穿咗，無晒驚喜啦！佢喺社交網站發文話：「如果有個人好中意驚喜，而佢同時又會千方百計去識破你製造嘅驚喜，咁應該俾一個點樣嘅驚喜佢先至最驚喜？」雖然好似有啲怨言咁，但陸永最後都補多句「我愛你」，Reina收貨啦！
另一邊廂，Reina就發文表示多謝老公送嘅禮物。「聰明嘅女人識破所有驚喜實在太唔聰明喇… 多謝老公送嘅禮物，仲有呢紮花！六週年快樂！」雖然驚喜被識破，但睇嚟呢個係呢兩夫妻嘅樂趣？
下一頁：思考型爸爸森美 從旁觀角度看子女
下一頁：DJ 朱薰 推崇「羅家英」教學法
關鍵詞
陸永
