戴耀明老婆真身曝光 曾誓娶佘詩曼為妻 一個誤會促成閃婚

戴耀明首揭與未婚妻相識經過 一個誤會促成閃婚

戴耀明昨日（12日）接受娛樂新聞台訪問，談及認識Anna的經過。原來Anna是圈外人，從事投資金融行業，二人自2011年開始拍拖約六年，因為當時他不懂遷就對方，更因為小事經常嗌交，最後導致分手收場。

直到早前，他發現右手前臂腫起，醫生贈送他一句説話: 「一係良一係惡」令他跌入谷底，推算自己很有可能患上骨癌，他說：「我個吓突然間灰晒，成個畫面係黑白色。」戴耀明續說：「我行出嚟嗰陣，個心淨係諗到我係咪就咁玩完。」當時他心情十分低落，雖然未必是絕症，但想到要放棄拍劇，放棄工作等，就覺得人生毫無意義。他第一個打電話給媽媽後，第二個電話就是打給前女友Anna，交代「後事」，希望她能夠代為照顧年邁的母親，並預料自己有八成機會中獎：「話如果我有咩事，你幫我睇睇我阿媽…佢安慰我無乜事嘅，吉人天相」。

兩人交談中，談及到不如結婚「希望能夠沖喜一吓」，他說：「其實真正意義嘅係大家有個伴，有動力大家一齊行落去。」幸好，最好身體報告指出他並沒有患癌，這樣就間接促成復合和結婚美事。虛驚一場卻令他更珍惜眼前人，和前女友復合兼結婚。

未婚妻真身曝光 公開結婚造人大計

戴耀明更在訪問中首度公開未婚妻Anna的相片，相中人留著長頭髮，眼大大，皮膚白皙。他更笑瞇瞇大數未婚妻7大優點:「佢為人觀正面樂觀，仲不時有啲烏龍嘢，同我差唔多，好簡單，都係鍾意開開心心、睇嘢簡單、好容易笑。佢份人又好純真而且喜愛卡通。」他又指Anna有藝術天份，展示她的漫畫：「佢鍾意畫畫六格漫畫，平日佢都成日畫，有叫佢如果有時間、多餘嘅錢可以去出書。」

他又開心分享初步結婚大計：「都係搵大家最friend，最親嘅人食吓飯，開下Party就算。我淨係希望同佢都同屋企人，可以健健康康就得，自從呢單嘢次之後，好老實講，如果我不幸touch wood有事，佢突然間銀行過兩億畀我，我都笑唔出。其實做人好簡單，只要健康快樂同你想嘅人喺埋一齊，做你想做嘅嘢就已經好開心。」至於婚後被問到「造人計劃」，他只笑說：「我計過條數，呢單嘢有啲棘手，因為佢10歲嘅時候我都60，佢啱啱學識打波，試問自己仲有無精力同佢玩呢？所以我哋兩個都係覺得隨緣啦。」

曾因人工低捱麵包 靠排長一角入屋

戴耀明畢業於樂善堂王仲銘中學，中學期間已知道自己不喜歡讀書，參加校內話劇活動，從而對演戲逐漸產生興趣，中學畢後因投考TVB藝員訓練班不成功，於91年報讀亞洲電視藝員訓練班，翌年加入亞洲電視。其後他察覺自己默默耕耘的努力未有被留意，於93年離開亞洲電視後，媽媽希望他能學習一門手藝為生，故他曾當過半年電腦維修員，以完成媽媽對自己的心願。他於同年以黃翊《哭着笑》一曲參與1993年TVB第十二屆新秀歌唱大賽，未能躋身10強位置，也未能於熒幕上演出。

94年，他透過藝員訓練班正式加入TVB，一度只有2000元人工，要每日捱麵包。及後他繼續盡力演出，他的代表作為《鐵馬尋橋》中的排長、《巾幗梟雄之義海豪情》的「向山達也」一角，惜入行多年只有在《Sunday好戲王》中得「騎呢好色王」獎。

為媽媽而放棄發圍機會

戴耀明參演過的劇集超過150部，大多數的角色都是諧星，但原來他曾經在內地有機會發圍。於17年，他在內地拍網絡電影《爆裂老婆三歲夫》首獲擔正機會，卻因為放不下媽媽獨自一人留在港而放棄機會。他曾接受傳媒訪問時指因小時候爸爸遇上車禍，之後拐着走路，只可做清潔工作，一家經濟重擔落在媽媽身上。當年媽媽因母兼父職，得了胃潰瘍。

自從爸爸去世後，母子相依為命，有次他北上工作，媽媽突然屙血，他急回港，事後非常內疚。所以雖然在內地拍劇12小時甚至更少就賺到3至4萬人民幣（約3.3萬至4.4萬港元），是TVB兩個月人工，惟他最後仍甘心放棄高薪，留港照顧媽媽。