2歲女扭計喊被鄰居投訴 港媽斥容忍度太低呻3大苦衷想絕招報復 網民批評自私

2歲女扭計喊被鄰居投訴

近日一名港媽在「香港討論區」發文，她抱怨居住樓下的鄰居多管閒事，一個月被對方投訴幾次。她指某日中午11點時，因為兩歲的小朋友在家中扭計，持續哭鬧約15分鐘，隨即接到管理處的電話，聲稱有人投訴，更詢問她是否對小朋友不好，要多關心小朋友。港媽感到莫名其妙，又指 自己並非第一次接獲投訴，之前都曾經試過因為小朋友嬉笑玩樂時的笑聲太大聲，被鄰居投訴要求控制聲量：「已經唔止（只）一次，之前小朋友笑得好大聲，又黎（嚟）投訴，話細聲滴（啲）。」

港媽斥容忍度太低呻3大苦衷 想反客為主投訴鄰居

港媽表示其實她已經盡量控制小朋友所發出的聲音，她指一來小朋友扭計喊實屬正常表現，畢竟小朋友未能自我控制，亦很難教導小朋友控制聲量；二來她解釋即使小朋友哭鬧，她都不會次次第一時間主動去哄，否則好難教好女兒。她更聲稱自己的小朋友只在日間發出較大聲響，並不是在凌晨時分嘈吵。

她又表示他們一家在同一大廈生活、居住過很長時間，一直沒有收到任何投訴，直言是新鄰居愛投訴，容忍度太低：「我地（哋）樓下搬到樓上就被人投訴，以前在同大廈樓下都無人投訴過。」她反問一衆網民意見，自己是否可以反客為主投訴鄰居。她呻鄰居無論事無大小都投訴，間接性滋擾自己一家人，更表示下次想過叫該名鄰居直接報警處理，讓警察查探自己是否對小朋友不好：「真係好煩呢滴（啲）鄰居。但係我小朋友喊時間唔長，根本唔大聲，去到差舘（館）我係咪可以告距（佢）誹謗。」

家長網民力撐：細路仔嘈好正常

網民對此的回應好壞參半，有人舉出政府制定的滋擾嘈音時間，指港媽的小朋友只是在早上哭鬧﹐而且持續時間不多於15分鐘，鄰居如果需要寧靜的環境，應該自行解決，而非作出投訴。有網民支持港媽表示：「無忍耐力，就唔好住香港呢啲比較逼地方，快啲移民住獨立大屋。樓主咁都被人投訴…小小嘢都嘈生哂」、「小朋友唔夠訓又喊，扭計又喊，唔舒服又喊，唔開心又喊，很正常吧！ 定係依家啲人自己帶假面具多，忘記咗有一種情緒叫唔開心，而唔開心係有可能會喊的」。

部分網民直斥自私 只顧自己

不過另一方面，有網民直指港媽非常自私，不願將家中的窗戶關掉，以減低聲量，港媽反駁：「我無理由為左（咗）距（佢）將全部窗關曬（晒）」亦有網民表示單單看港媽於討論區上的帖文，有合理懷疑她疏忽照顧小朋友，才會導致小朋友常常哭鬧。

更有網民批評港媽將自身教育子女的問題投放在他人身上：「試吓去投訴你個單位坐下，可能有另一番滋味」、「可能人哋係通宵工作，就係被你小朋友大叫幾聲嘈醒瞓唔返，然後無精神工作，人哋覺得受滋擾，有權向管理處投訴，而你多多少少的確有滋擾到人，唔投訴你係人情，投訴你係道理，你有唔啱在先仲想反告人誹謗，我真係唔知乜道理。」、「好正常？唔X識教就咪X生仔啦 最X憎呢啲父母，由個細路仔又喊又嘈唔X理，平時餐廳行街塔（搭）車都見唔少。」、「你個細佬仔嘈到隔離屋都聽到都好嚴重…自己搞唔掂個細路，仲要話人投訴佢？你就試吓報警或搵律師搞囉，告返人哋轉頭」、「永遠覺得自己無錯，係人地針對佢」。